| تبليغات | X |
|
شعر چلنگی
|
||
|
تورکجه مدرن دويغوسل وب صايفا |
چیلله آخشامی ایدی. قوجا بالیق دریانین دیبینده نوه-نتیجه لرینی اطرافینا توپلاییب اونلارا ناغیل دانیشیردی:
بیری وار ایدی، بیری یوخ ایدی، بیر بالاجا قارا بالیق وار ایدی. او آناسی ایله بیرلیکده کیچیک بیر آرخدا یاشاییردی. آرخین سویو دریه آخیردی. بالاجا قارا بالیقلا آناسی نین بیر قارا داشین دالیندا، یوسونلارین آراسیندا ائولری وار ایدی. آنا و بالا سحردن آخشاما قدر بیر-بیری نین دالینا دوشوب اوزور، هردن باشقا بالیقلارا قوشولوب سورعتله بالاجا بیر یئرده گزیشیر و گئری قاییدیردیلار. قارا بالیق آناسی نین بیرجه سی ایدی.
بیر گون سحر تئزدن، گونش دوغمامیش، بالاجا بالیق آناسینی یوخودان اویادیب:
آناجان، –دئدی، سنه بیر نئچه کلمه سؤزوم وار.
–ائه، سن ده واخت تاپدین! دانیشماغی سونرایا ساخلا. یاخشی اولار کی گزمیه چیخاق، –دئیه آنابالیق گؤزلرینی اوووشدوردو و اسنه دی.
–یوخ، آناجان، من داها بئله گزمه گی ایسته میرم. گره ک بوردان گئده م، –دئیه بالاجا بالیق اعتیراض ائتدی.
آناسی حئیرتله اونا باخیب سوروشدو:
–دوغوردان گئتمک ایسته ییرسن؟
–بلی، آناجان، حؤکمن گئتمه لی یم!
–آخی، آلاقارانلیقدا هارا گئتمک ایسته ییرسن؟
–ایسته ییرم، گئدیم گؤروم، آرخ هارادا قورتاریر. بیلیرسنمی، آناجان،اوزون موددتدیر کی فیکیرلشیرم، گؤرسن آرخ هارادا قورتاریر؟ آمما ایندییه قدر بیر نتیجیه گله بیلمه میشم.
دونن گئجدن گؤزومو یومماییب هر شئیی گؤتور- قوی ائتمیشم. بئله قراره گلمیشم کی، اؤزوم گئدیب آرخین قورتاراجاغینی تاپیم. بیلمک ایسته ییرم باشقا یئرلرده نه وار، نه یوخ...
–من ده اوشاق اولاندا بئله فیکیرلره دوشموشم، بالاجان! آرخین نه اوولی وار ، نه آخیری. ائله گؤردویون نه وارسا اودور. آرخ همیشه آخیر و قورتارمیر.
–یوخ آناجان، بئله دئییل. هر شئیین آخیری وار.
مثلن، گئجه سونا چاتیر، هفته، آی، ایل... مگر بونلارین سونو اولمور؟
بالاجا قارا بالیغین قیزیشدیغینی و دیل آغیزا قویماییب دانیشدیقینی گؤرن آنا بالیق دئدی:
–بوش-بوش سؤزلری بیر کنارا قوی، دور گزمه یه چیخاق. ایندی دانیشماق یوخ ، گزیب دولانماق واختیدیر.
–یوخ، آنا، من بئله گزینتیلردن یورولموشام. بوردان اوزاقلاشماق و باشقا یئرلرده نه لر اولدوغونو بیلمک ایسته ییرم. بیردن ائله بیلرسن کی، بونلاری منه کیمسه اؤیردیب، یوخ، آنا، چوخدان بو فیکره دوشموشم. البته، اوندان-بوندان چوخ شئیلر اؤیرنمیشم. مثلن، بونو باشا دوشموشم کی، بالیقلارین چوخو حیاتلارینی بوش-بوشونا کئچیردیکلریندن گیلئیله نیرلر. دایم آه-ناله ائدیر، هر شئیدن شیکایتله نیرلر. بیلمک ایسته ییرم گؤروم حیات ائله بیر قاریش یئرده او یان-بو یانا گئدیب قاییتماقدانمی، قوجالیب هئچ نه گؤرممه کدن می عیبارتدیر، یوخسا باشقا دونیا دا مؤوجوددور؟
–بالاجان، دلی اولوبسان؟ دونیا! دونیا! او باشقا دونیا نه دئمه کدیر؟ دونیا ائله همین دونیادیر کی، بیز یاشاییریق، حیات دا کی، ائله گؤردویون یاشاییشدان عیبارتدیر!
بو زامان ایری بیر بالیق اونلارین ائوینه یاخینلاشدی :
–قونشو، –دئدی،–اوشاقلا نه یین اوستونده بئله هؤجتله شیرسن؟ دئیه سن، بو گون گزمک فیکرینیز یوخدور؟
آنا بالیق قونشونون سسینی ائشیدیب جاواب وئردی:
–گؤر، زمانه نئجه دییشیب؟! اوشاقلار اؤز آنالارینا جیب-جیب اؤیرتمه یه باشلاییبلار.
–نئجه مگر؟ –دئیه قونشو ایری بالیق سوروشدو.
–گؤر بو جیرتدان هارالارا گئتمک ایسته ییر؟! هئی دئییر کی، ایسته ییرم گئدیم گؤروم دونیادا نه لر اولور؟ نه بیلیم، آخماق - آخماق سؤزلر!
قونشو ایری بالیق:
–بالاجا،–دئدی،–دء گؤروم سن نه واختان بئله فیلوسوف و عالیم اولوبسان کی، بیزیم خبریمیز یوخدور؟
بالاجا بالیق دئدی:
–خانیم من بیلمیرم سیز عالیم، فیلوسوف نیيه دئییرسینیز؟ هرگون تکرار اولونان جان سیخیجی گزینتیلردن جانا دویموشام. بئله یوروجو حیاتی داها داوام ائتدیرمک ایسته میرم. ایسته میرم کی، بیر ده گؤزومو آچاندا گؤروم سیزین کیمی قوجالمیشام، اؤزو ده گؤز قولاقلاری باغلی بالیقلار کیمی قالمیشام.
قونشو بالیق:
–وای،–دئدی،–گؤر بو نلر دانیشیر ؟!
آنا بالیق دیللندی :
–هئچ دوشونمزدیم کی، بیر دنه اوشاغیم اولا، او دا بئله چیخا! بیلمیرم، بالامین قولاغینی کیم دولدوروب...
بالجا بالیق دئدی:
–هئچ کس منیم قولاغیمی دولدورماییب. آنلاماق اوچون منیم اؤزومون عاغلیم، گؤرمک اوچون ده گؤزوم وار!
قونشو بالیق بالاجا بالیغین آناسینا دئدی:
–باجی او پیچ-پیچ دانیشان ایلبیز یادیندادیرمی؟
–یاخشی یادیما سالدین، یادیمدادیر! تئز-تئز اوشاغیمین یانینا گلردی. گؤروم اونو گورباگور اولسون!
بالجا بالیق دئدی:
–بسدیر، آنا! او، منیم دوستوم ایدی!
–بالیقلا ایلبیزین دوستلوغونو ائشیدمه میشدیک، بونو دا ائشیتدیک!
بالجا بالیق :
–من ده بالیقلارلا ایلبیزین دوشمن چیلیگینی ائشیدمه میشدیم! آمما سیز او بیچاره نین باشینی یئدینیز!–دئدی.
قونشو دیللندی:
–بو، کئچمیشین صؤحبتیدیر
–کئچمیشی سیز اؤزونوز یادا سالدینیز!
آناسی دئدی:
ائله اؤلمه لی ایدی! مگر اوتوروب-دوروب نلر دانیشدیقلاری یادیندان چیخیب؟!
–اوندا منی ده اؤلدورون! چونکی من ده اونون دئدیکلرینی دئییرم،–دئیه بالجا بالیق گیلئیلندی.
آخیر کی، نه باشینیزی آغریدیم، سس-کویون صداسی باشقا بالیقلاری دا اورایا چکیب گتیردی. بالجا بالیغین سؤزلری هامینی عصبیلشدیرمیشدی. قوجا بالیقلار بیر-بیر صؤحبته قاریشیب بالجا بالیغا آجیقلاندیلار:
–ائله دوشونورسن کی، سنه رحم ائدریک؟!
–بیر قولاق بورماسی بسدیر!
بالجا قارا بالیغین آناسی اونلارا موقاویمت گؤستردی:
–کنارا چکیلین! اوشاغیما توخونمایین!
بو زامان بالیقلاردان بیر باشقاسی بالجا بالیغین آناسینا دئدی:
–خانیم، اوشاغینی لازیمین جا تربییلندیرمه دییین اوچون عذاب چکمه لیسن!
قونشو بالیق سؤزه باشلادی:
–سیزینله قونشو اولدوغوما خجالت چکیرم!
باشقا بیر بالیق دیللندی:
–نه قدر کی، بو ملعونون ایشی... گؤنده رک قوجا ایلبیزین یانینا.
بالیقلار بالجا بالیغی توتماق ایسته دیلر. دوستلاری اونو تهلوکدن اوزاقلاشدیردیلار. آناسی باش گؤزونه دؤیور، آغلاییر و دئییردی:
–آللاه، سن ساخلا! اوشاغیم الیمدن گئدیر. نه ائدیم؟ باشیما هارانین داشینی سالیم.؟
بالجا بالیق دئدی:
–آناجان، منیم اوچون آغلاما، گئریده قالمیش بو قوجا بالیقلارین حالینا آغلا.
بالیقلار یئربه یئردن چیغیردیلار:
–تحقیر ائلمه!
–گئت! سونرا پئشمان اولسان، داها بیزدن اینجیمه!
–بونلار جاوانلیق علامتیدیر. گئتمه!
–بورالارین نییه پیسدیر؟!
–باشقا دونیا یوخدور! دونیا ائله گؤردویون بو دونیادان عیبارتدیر. قاییت!
–عاغلینی باشینا ییغیب گئتمه کدن ایمتینا ائتسه ن، اوندا بیلریک کی، دوغوردان دا باشا دوشن بیر بالیقسان!
–بیز سنه اؤیرشمیشیک، گئتمه!
آنا بالیق دولوخسوناراق دیللندی:
منه رحمین گلسین، بالا! گئتمه!
بالجا بالیق اونلارین دئدیکلرینه اعتینا ائتمه دن اوزاقلاشدی. همیاشیدلاریندان بیر نئچه سی اونو آرخین گؤلمه چیه تؤکولن یئرینه قدر اؤتوروب گئری دؤندولر. بالاجا بالیق دوستلاریندان آیریلارکن دئدی:
–گؤروشنه قدر، دوستلار! منی اونوتمایین!
دوستلار:
–هئچ اونوداریق می؟ سن بیزی قفلت یوخوسوندان اویاتدین. بیزه ائله شئیلر اؤیرتدین کی، هئچ یوخوموزا دا گیرمزدی. گؤروشونه قدر، عاغیلی و جسور دوست!–دئدیلر.
بالجا بالیق شیرریننان آشاغی سوروشوب آرخا نیسبتن سویو چوخ اولان گؤلمه جیه دوشدو. اوولجه اؤزونو ایتیردی. سونرا اوزمه یه و گؤلمه جه ده دولانماغا باشلادی. بالجا بالیق بو واختادک بو قدر سویون بیر یئره ییغیشدیقینی گؤرمه میشدی. سودا مینلرله چؤمچ قویروق گزیرشیردی. بالجا بالیغی گؤرن کیمی اونو مسخریه گویدولار:
–بیر بونون تهر-تؤورونه باخ! سن نه مخلوقسان؟!
بالجا بالیق آنی اولاراق فیکیرلشیب:
–خواهیش ائدیرم تحقیر ائتمه یین،–دئدی،–منیم آدیم بالجا بالیقدیر. سیز ده آدینیزی دئیین، تانیش اولاق!
چؤمچ بالیقلاردان بیری دئدی:
–بیز بیر-بیریمیزی " چؤمچ قویروق " چاغیریرییق.
او بیریلری یئردن دئدیلر:
– اثلیمیز، نجابتیمیز وار.
–دونیادا بیزدن گؤزلی تاپیلماز!
سنین کیمی یؤندمسیز دئییلیک!
بالاجا بالیق اونلارا بئله جاواب وئردی:
–سیزین بو قدر خودپسند اولدوغونوزو بیلمیردیم. آمما نادانلیق اوزوندن بئله دانیشدیغینیز اوچون سیزی باغیشلاییرام.
چؤمچ قویروقلار سسلندیلر:
–دئمه لی بیز نادانیق؟
–نادان اولماسایدینیز باشا دوشردینیز کی، هر کس اوچون اؤز تهر-تؤورو خوشدور. آللاها شوکور، سیزین هئچ آدینیز دا اؤزونوزون کو دئییل.
چؤمچ قویروقلار اوول عصبیلشدیلر. سونرا بالاجا بالیغین حاقلی اولدوغونو گؤروب سؤزلرینی دییشدیلر.
–سن اؤزونو ناحاق یئره یوروسان،–دئدیلر،–بیز سحردن آخشاما قدر دونیانی گزیریک، آمما اؤزوموزدن، آتا و آنامیزدان، سایسیز-حئسابسیز بالاجا قوردلاردان، بؤجکلردن باشقا هئچ کسی گؤرموروک.
بالاجا بالیق سوروشدو:
–سیز کی، گؤلمه جدن قیراقا چیخا بیلمیرسینیز، دونیانی گزیب دولانماقدان نئجه دم وورا بیلرسینیز؟
چؤمچ قویروقلار تججوبلندیلر:
–مگر گؤلمه جدن باشقا دا اؤزگه دونیا وار؟
بس نئجه؟ اؤزونوز فیکیرلشین، گؤرون یاشادیقینیز سو هاردان آخیب و سودان کناردا نه لر وار؟
–سودان قیراقدا دا یئر اولار؟ بیز ایندییه قدر سودان باشقا هئچ یئری گؤرمه میشیک. ها، ها، ها! سن دلی اولوبسان، نه دیر؟!
بالاجا قارا بالیغی دا گولمک توتدو. فیکیرلشدی کی، چؤمچ قویروقلاری باشا سالمادان چیخیب گئتسین . سونرا بئله قراره گلدی کی، اونلارین آنالاری ایله ده بیر-ایکی کلمه دانیشسین.
–آنانیز هارادادیر؟
بو زامان قورباغانین گور سسی اونو دیکسیندیردی. قورباغا گؤلمه جه نین قیراغینداکی، ایری داشین اوستونده اؤتورموشدو. سویا باش ووردو، گلیب بالیغین قارشیسیندا دایاندی:
–من بورادایام، –دئدی، –قوللوق؟!
–مؤحترم خانیم سالام!
–ائی اصل–نجابتسیز ووجود! نه اعللاملیق ائدیرسن؟ بونلاری اوشاق گؤروب آخماق-آخماق دانیشیرسان؟ بیر بئله عؤمر ائله میشم، گؤرموشم کی، دونیا ائله بو گؤلمجدن عیبارتدیر.
یاخشی اولار کی، ایشی نین دالیسینجا گئدسن، منیم اوشاقلاریمی یولدان چیخارمایاسان.
–یوز ایلده عؤمر ائله سن، یئنه گئری قالمیش، نادان قورباغا کیمی قالاجاقسان!
قورباغا حیرسلندی و بالاجا قارا بالیغین اوستونه جومدو. بو زامان گؤلمجه نین دیبی بیر-بیرینه قاریشدی. بالاجا بالیق آلدیغی تکاندان دیغیرلاندی، اؤزونو دردن آخان ائنلی آرخدا گؤردو. دره ایری-اویرو ایدی. داغین باشیندان باخاندا دره نین سویونو ائنلی، آغ ایپه اوخشاتماق اولاردی. دره نین بیر یئرینده داغدان قوپوب آرخا دوشموش ایری بیر داش سویو ایکی یئره بؤلوردو. ایری بیر کرتنکله ده قارنینی داشا سؤیکمیشدی. گونشین حرارتیندن لذذت آلیر، سویون تکینده اوولادیغی قورباغانی یئین ایری، یومورو خرچنگه تاماشا ائدیردی. ائله بو آن اورادان اوزوب کئچمک ایسته ین بالاجا بالیغین گؤزلری خرچنگه ساتاشدی. او، برک قورخدو و اوزاقدان خرچنگه سالام وئردی. خرچنگ بالاجا بالیغی گؤرونج:
–نه ادبلی بالیقسان، –دئدی، –گل قاباغا. بالاجا، قاباغا گل!
بالاجا بالیق:
–من دونیانی گزمه یه گئدیرم،–دئیه خرچنگه جاواب وئردی، جانابینیزین یئمه ینه چئویریلمک ایستمیرم!
–نییه بئله بدبینسن، قورخاقسان، بالاجا بالیق؟
–نه بدبینم، نه ده قورخاق. گؤردوکلریمی دئییرم.
چوخ یاخشی، ایندی دء گؤروم گؤزلرین نه گؤردو و عاغلین نه کسدی کی، سنی اوولایاجاغیمی خیالینا گتیردین؟
–اؤزونو بیلمه مزلییه وورما!
–بیلیرم، قورباغانین حرکتلرینه ایشاره ائدیرسن. لاپ اوشاقسانمیش کی، بابا! قورباغالارلا آرام اولمادیغی اوچون اونلاری اوولاییرام. اونلار ائله خیال ائدیرلر کی، دونیانین یئگانه مخلوقلاریدیلار و هامیدان خوشبختدیلر. ایسته ییرم اونلاری باشا سالام کی، دونیا کیمین الینددیر. سن ایسه قورخما، قاداسی! گل قاباغا. قورخما، گل!
خرچنگ بو سؤزلری دئییب یانلارینی باسا-باسا بالاجا بالیغا طرف یئریدی.
خرچنگ ائله گولملی یئریییردی کی، بالیغی ایختییارسیز اولاراق گولمک توتدو.
–ای یازیق،–دئدی،–سن هئچ یئریمه گی ده باجارمیرسان. هاردان بیلیرسن دونیا کیمین الینددیر؟!
بالاجا بالیق خرچنگدن آرالاندی. بو زامان سویون اوزرینه کؤلگه دوشدو. گؤزله نیلمز ضربدن خرچنگ سندلیه-سندلیه سویون دیبینه باتدی. خرچنگی بو حالینی گؤرن کرتنکله نی گولمک ائله توتدو کی، آز قالدی سوروشوب سویا دوشسون. خرچنگ ایسه آرتیق سویون اوزونه چیخا بیلمه دی.
بالاجا بالیق گؤردو کی، سویون کناریندا بالاجا بیر چوبان دایانیب اونا و خرچنگه تاماشا ائدیر. قویون-کئچی سوروسو ده سویا یاخینلاشدی. "مه-مه! به-به!" سسلری دره نی باشلارینا گؤتوردو.
بالاجا بالیق سورونو سو ایچیب قورتارانا قدر گؤزله دی. سورو گئدندن سونرا کرتنکله نی سسله ییر:
–کرتنکله جان،–دئدی،–من آرخین قورتاراجاغینی آختارماغا گئدن بالاجا قارا بالیغام. سن بیلیکلی، زکالی حئیوانسان. بونا گؤره ده سندن بعضی شئیلری سوروشماق ایسته ییریم.
–خه ترین هر نه ایسته ییر، سوروش.
–یولدا منی نره بالیقلا، ساققا قوشو ایله، بالیق اودان قوشلا چوخ قورخودوبلار. بونلار حاققیندا بیر شئی بیلیرسنسه منه دئ!
کرتنکله دئدی:
–نره بالیقلار و بالیق اودانلار بو طرفلرده تاپیلمازلار. خوصوصیله نره بالیقلار. چونکی اونلار دننیزده یاشاییرلار. آمما ساققا قوشونا ائله بو هندورده راست گلمک اولار. مبادا آلدانیب کیسه سی نین ایچریسینه گیررسن.
کیسه نه دیر؟ –بالاجا بالیق اونون سؤزونو کسیب سوروشدو.
–ساققا قوشونون بوغازی نین آلتیندا خئیلی سوتوتان کیسه وار. ب’زن تجروبه سیز، خام بالیقلار سودا اوزن قوشون کیسه سینه گیریب بیرباشا قارنینا گئدیرلر. ساققا قوشو توخ اولاندا بالیقلاری کیسه سینده احتیاط ساخلاییر.
–دئمه لی، اونون قارنینا گئدندن سونرا خیلاص اولماق اوچون چاره یولو یوخدور؟
–یوخدور. کیسه نی پارچالاماقدان باشقا هئچ بیر یول یوخدور. سنه بیر خنجر وئررم. ساققا قوشونون چنگینه دوشن دئدیییم کیمی ائدرسن.
کرتنکله قایاداکی یاریغا سورونوب خنجرله قاییتدی. بالاجا بالیق خنجری آلیب دئدی:
–کرتنکله، سن چوخ مهریبانسان، بیلمیرم سنه نئجه تشککور ائدیم؟
–جانیم تشککور نه یه لازیمدیر، منیم بئله خنجریم چوخدور، سنین کیمی عاغیللی بالیقلارا باغیشلاییرام.
–مگر مندن قاباق دا بورادان کئچن اولوب؟
––چوخلاری کئچیب. ایندی اونلار اؤزلری اوچون بؤیوک دسته دوزلدیبلر...
کرتنکله بونلاری دئییب قولاغینی داشداکی یاریغا دایادی:
–دء، ساغ اول،–دئدی،–بالالاریم یوخودان آییلدیغی اوچون گئتمه لییم.
کرتنکله یاریغا گیردی. بالاجا بالیق ایسه چاره سیز قالیب یولا دوشدو. هئی اؤز-اؤزونه سوال وئریردی: "دوغوردان می آرخ دنیزه تؤکولور؟ ساققا قوشون گوجو ائله منه چاتسین؟! بالیق اودان قوشون بیزیمله نه دوشمن چیلیگی وار؟ "
بالاجا بالیق اوزه-اوزه گئدیر و فیکیرلشیردی. یول بویو تازا شئیلر گؤرور، اؤیره نیردی. شلاله نین باشی اوسته آخماسیندان حظ آلیر، یئنی دن اوزوردو. کوریینده گونشین حرارتینی حیسس ائدیر و مؤحکمله نیردی.
او، سونرا ائله بیر یئره چاتدی کی، بورادا دره ائنله نیر، سو ایسه کوللوقلارین آراسیندان آخیب گئدیردی. بالاجا بالیق سویون چوخالماسیندان لذذت آلیردی. چوخ گئدندن سونرا او، چوخلو بالیغا راست گلدی. آناسیندان آیریلاندان بری بالیق گؤرمه میشدی. بیر نئچه ریزه بالیق اونو دؤوریه آلدی و سوروشدو:
–ائله بیل غریب سینیز؟
–بلی، غریبم. اوزاق یئردن گلیرم.
ریزه بالیقلار دئدیلر:
هارا گئتمک فیکریندسن؟
–آرخین قورتاردیغی یئری تاپماغا گئدیرم.
هانسی آرخین؟
–بیز بونا آرخ یوخ، چای دئییریک.
بالاجا بالیق هئچ نه دئمه دی. ریزه بالیقلاردان بیری دیللندی:
–خبرین وار کی، ساققا قوشو یولو کسیب؟
–خبریم وار بیلیرم...
باشقا بیر ریزه بالیق سوروشدو:
–اونو دا بیلیرسن کی، ساققا قوشونون نه گئنیش کیسسه سی وار؟
–اونو دا بیلیرم.
–بونلاری بیله-بیله یئنه گئتمک فیکریندسن؟
–بلی، بوتون بونلاری بیلیرم و گئتملی یم.
بالیقلار آراسیندا سس یاییلدی کی، اوزاق یوللاردان گلمیش بالاجا قارا بالیق چایین قورتاراجاغینی تاپماق ایسته ییر و ساققا قوشوندان دا قورخمور.
ریزه بالیقلاردان بیر نئچه سی بالاجا قارا بالیقلا گئتمک ایسته دی، لاکین بؤیوکلرین قورخوسوندان سسلرینی چیخارتمادیلار. حتتا اونلارین بیر نئچه سی بالاجا قارا بالیغا یاناشیب قیمیلداندی.
–ساققا قوشو اولماسایدی بیز ده سنینله گئدردیک...
چایین قیراغیندا بیر کند وار ایدی. کندین قادینلاری و قیزلاری چایین ایچینده قاب-قاجاق و پالتار یویوردولار. بالاجا بالیق اونلارین سس-کویونه بیر خئیلی قولاق آسدی و اوشاقلارین ایسلانمیش بدنلرینه تاماشا ائتدی، سونرا یولا دوزلدی. او قدر گئتدی کی، آخشام اولدو. بالاجا بیر داشین آلتینا گیریب یاتدی. گئج یاری آییلدی و گؤردو کی، آی سویا دوشوب، هر یئری ایشیقلاندیریر.
بالاجا بالیق آیی چوخ ایسته ییردی. گئجه لر آی سویا دوشنده یووادان چیخیب اونونلا بیر نئچه کلمه دانیشماق حسرتینده ایدی. آمما هر دفه آناسی آییلیب اونو یوواسینا دارتار و یئنی دن یاتیرداردی.بو دفه بالاجا بالیق آیین قارشیسینا چیخدی:
–سالام، ائی منیم گؤیچک آییم!
آی دا بالاجا قارا بالیغی مئهریبانلیقلا قارشیلادی:
–سالام، منیم بالاجا قارا بالیغیم! سن هارا، بورا هارا؟
–دونیانی سیاحته چیخمیشام.
–دونیا چوخ بؤیوکدور، سن هر یئری گزه بیلمه سن.
–عیبی یوخدور، باجاردیغیم یئره قدر گئده جه گم.
–اوره ییم چوخ ایسته ییردی کی، سحره قدر یانیندا قالام، آمما بؤیوک بیر قارا بولود منه طرف گلیر. قورخورام ایشیغیمین قاباغینی کسسین.
–ائی قشنگ آی، سنین ایشیغینی چوخ سئویرم. اوره ییم ایسته ییر کی، نورون همیشه یولوما ایشیق ساچسین.
–منیم بالیغیم، دوزونو آختارسان منیم ایشیغیم یوخدور، ایشیغی منه گونش وئریر، من ده اونو یئره ساچیرام.
بیلیرسنمی کی، آداملار یاخین گله جکده اوچماق، گلیب منیم اوزریمه دوشمک آرزوسوندادیرلار؟
–بو مومکون دئییل!
–دوزدور، بو چوخ چتین ایشدیر، آنجاق اینسان اؤز ایسته دییینه...
آی سؤزونو قورتارا بیلمه دی. قارا بولود گلیب اونون اوزونو اؤرتدو، یئره قارانلیق چؤکدو. قارا بالیق یئنه ده تک-تنها قالدی. بیر نئچه دقیقه حئیرت ایچریسینه قارانلیغا باخدی. سونرا داشین آلتینا چکیلیب یاتدی...صوبح تئزدن آییلاندا باشی نین اوستونده پیچ-پیچلا دانیشان بیر نئچه ریزه بالیق گؤردو. اونلار قارا بالیغین یوخودان آییلدیغینی گؤروب دئدیلر:
–صاباحین خئییر!
قارا بالیق اونلاری تانیدی:
–صاباحینیز خئییر اولسون!–دئدی. نهایت، آردیمجا گلیب، من دیین یولا دوشدونوز؟
ریزه بالیقلاردان بیری:
–بلی،–دئدی،–آنجاق هله ده قورخو جانیمیزدان چیخماییب.
بیر باشقا بالیق :
–ساققا قوشونون فیکری بیزی راحات بوراخمیر،–دئیه دیلندی.
بالاجا قارا بالیق:
سیز چوخ فیکیرلشیرسینیز. هر شئیه فیکیرلشمک، اؤزو ده بیر دفعه يه فیکیرلشمک دوز دئییل. یولا دوشن کیمی قورخو بیزی ترک ائده جکدیر،–دئیه جاواب وئردی.
بیرلیکده یولا دوشمک ایسته دیلر. گؤردولر کی، دؤوره لرینده کی سو یوخاری قاخدی، باشلاری اوزرینه اؤرتوک چکیلدی. هر یئر قارانلیقلاشدی، قاچماقا ایمکان قالمادی. بالاجا قارا بالیق او ساعات باشا دوشدو کی، ساققا قوشونون کیسسه سینه دوشوبدور.
بالاجا قارا بالیق دئدی:
–دوستلار، بیز ساققا قوشونون کیسسه سینه دوشموشوک، لاکین خیلاص اولماق اوچون یول وار.
ریزه بالیقلار آغلاییب آه-زار ائتمه يه باشلادیلار.
آرتیق بیزم قاچماقا یولوموز یوخدور! تقصیر سنده دیر. بیزی یولدان چیخاردین!
–ایندی بیزیم هامیمیزی " قورت " ائلییب اوداجاق.
قورخونج بیر قهقهه سسی ائشیدیلدی. بو ساققا قوشو ایدی، گولوردو و گوله-گوله دئییردی:
ریزه بالیقلار نئجه ده گیریمه گئچیب! ها! ها! ها! ها! سیزین حالینیزا یانیرام، هئچ اوره ییم گلمیر، سیزی " قورت " ائله ییب اودوم. ها! ها! ها! ها!
ریزه بالیقلار یالوارماقا باشلادیلار:
–حضرتی-آغایی ساققا قوشو، سنین تعریفینی چوخدان ائشیدمیشیک، لوطف ائدیب موبارک دیمدی یینیزی بیر قدر آرالاسایدی نیز بورادان خیلاص اولوب موبارک ووجودونوزا دوعاچی اولاردیق.
ساققا قوشو دئدی:
–من هله بو ساعت سیزی " قورت " ائله ییب اودماق فیکرینده دییلم. کیسمده احتیاط بالیقلار وار، بیر قارنیمین آلتینا باخین.
کیسه نین آشاغی حیسسه سینده اییلنمیش بیر نئچه ریزه بالیق وار ایدی.
ریزه بالیقلار بیر سسله دئدیلر:
–حضرت-آغایی ساققا قوشو، بیزیم گوناهیمیز یوخدور، بو بالاجا قارا بالیق بیزی یولدان چیخاردیب...
بالاجا بالیق:
–قورخاقلار!–دئدی. –سیز ائله خییال ائدیرسینیز کی، یالوارماقلا بو حییله گر رحم دیللیک ائدیب سیزی بوراخاجاق؟
ریزه بالیقلار قورخویا دوشوب دئدیلر:
–هئچ، نه دانشدیغینی دا بیلمیرسن. ایندی گؤرسن کی، حضرتی-آغایی ساققا قوشو بیزی نئجه باغیشلایاجاق و سنی نئجه " قورت " ائلیه جکدیر!
ساققا قوشو دیللندی:
–دوغوردور، سیزی باغیشلاییرام، آنجاق بیر شرطله!
–شرطینیزی بویورون، قوربان!
–آزادلیغی نیزی بو بوش بوغاز بالیقی اؤلدورمکله الده ائده بیلرسینیز.
بالاجا قارا بالیق بیر قدر دالی چکیلیب ریزه بالیقلارا:
–ایننانمایین،–دئدی،–بو حیله گر بیزی بیر-بیریمیزین جانینا سالماق ایسته ییر، منیم باشقا فیکریم وار!...
ریزه بالیقلار آزادلیغا چیخماق ایسته یی ایله بالاجا قارا بالیغین دئدیکلرینه قولاق آسمادیلار، قالخیب اونون اوستونه دوشدولر. بالاجا بالیق یاواش-یاواش آرخایا چکیلیب:
–قورخاقلار!–دئدی،–هر حالدا گیره دوشموسونوز، قاچماغا دا یولونوز یوخدور. منه ده کی، گوجونوز چاتماز!
–بیز آزادلیقا چیخماق ایسته ییریک، اونون اوچون ده سنی اؤلدورمه لی يیک!
–عاغلینیزی باشینیزا ییغین! منی اؤلدورسه نیز ده قاچماق اوچون یول تاپا بیلمییه جکسینیز. حیله گر قوشا اینانمایین!
–سن اصلا بیزیم فیکریمیزی چکمیرسن، بو سؤزلری اؤز جانینی قورتارماق اوچون دئییرسن!
–ائله ایسه قولاق آسین، سیزه نجات یولو گؤستریم. من اؤزومو اؤلولویه ووروب اؤلو بالیقلارین ایچریسینده گیزلنه جه يم. گؤرک ساققا قوشو سیزی آزاد ائده جکدیرمی؟!
اگر سؤزومه قولاق آسماسانیز بو خنجرله هامینیزی قیراراق، قوشون دا کیسسه سینی پارچالاییب چیخارام. سیز ایسه ...
ریزه بالیقلاردان بیری اونون سؤزون کسیب:
–داها بسدیر!–دئدی،–من بو سؤزلره اینانماق ایسته میرم.
–و، بو سؤزلری دئیه-دئیه آغلاماغا باشلادی.
بالاجا قارا بالیق اونون آغلادیغینی گؤروب دئدی:
–بو آناسی نین ناز-ناز بالاسینی نییه یانینیزا سالیب گتیریب سینیز؟
او، خنجرینی چیخاریب بالیقلارین اوستونه جومدو. ریزه بالیقلار چاره سیز قالیب بالاجا قارا بالیغین تکلیفینی قبول ائتدیلر. یالاندان بیر-بیرلری ایله دالاشماغا باشلادیلار. بالاجا قارا بالیق اؤزونو اؤلولویه ووروب اوزاندیقدا اونلار یوخاری قالخدیلار:
–حضرتی-آغایی ساققا قوشو،–دئدیلر،–فضول قارا بالیغی اؤلدوردوک.
قوش گولدو:
–چوخ یاخشی ایش گؤردونوز،–دئدی،–بونون اوزینه سیزین هامینیزی دیری-دیری اوداجاغام، قارنیمدا ایستدی یینیز قدر گزه رسینیز.
ریزه بالیقلار ماجال تاپمامیش بیر آنداجا ساققا قوشو اونلاری اوددو. قارا بالیق ایسته جلد خنجرینی چکیب مؤحکم ضربه ایله قوشون کیسه سینی ییرتیدی و دئشیکدن چیخیب قاچدی.
ساققا قوشو آلدیغی ضربه نین آغریسیندان فریاد قوپاردی، باشینی سویا سالیب بالاجا قارا بالیغی یئنیدن توتماق ایسته دی. لاکین گوجو چاتمادی...
گونورتا ایدی. آرتیق نه داغ گؤرونوردو، نه دره . چای آخیب گئنیش دوزه ن لیکدن کئچیردی. چایین ساغ-سولوندان تؤکولن کیچیک چایلار اونون سویونو قات-قات آرتیریدی. بالاجا قارا بالیق سویون چوخلوغوندان لذذت آلیردی. بیردن آییلیب گؤردو کی، سویون دیبی گؤرونمور. او یان-بو یانا باش ووردو، هئچ یانا چیخا بیلمه دی. آز قالا غرق اولموشدو. اوره یی ایستدی یی قدر اوزندن سونرا دا الی بیر یانا چاتمادی. بیردن گؤردو کی، بورنوندا میرواری دیشلری اولان اوزون بیر حئیوان ایلدیریم سورعت ایله اونا هوجوم ائدیر. بالاجا قارا بالیق حیسس ائتدی کی، حئیوان او ساعت اونو پارچا-پارچا ائده جکدیر. چاپالاییب تئز سویون اوزرینه قالخدی . بیر موتدتدن سونرا سویون آلتینا ائندی. یولون یاریسیندا مینلرجه بالیق دسته سینه راست گلدی. اونلاردان بیرینی ساخلاییب سوروشدو:
–قارداش، غریبم ، اوزاق-اوزاق یئرلردن گلیرم. دئیین گؤروم بورا هارادیر؟
او دؤنوب بالاجا قارا بالیغا دئدی :–قارداش بیزیم دنیزه خوش گلیبسن!
بالیقلاردان بیری دئدی:
–بوتون چایلار و آرخلار بورا تؤکولور.
باشقا بیر بالیق ایسه:
–ایندی گئت بیر آز گز. سویون اوزونه چیخماق ایسته سن بالیق اوداندان احتیاطلی اول. بو گونلر او هئچ کسدن قورخمور. هر گون دؤرد-بئش بالیق اوولانماسا یاخامیزدان ال چکمیر،–دئدی.
بالاجا بالیق دنیز بالیقلاری نین دسته سیندن آرالانیب تکلیکده اوزمه یه باشلادی. آز سونرا دنیزین اوستونه چیخدی. ایندی او، قیزمار گونشین یاندیریجی حرارتینی اؤز کوریینده حیسس ائدیر، بوندان لذذت آلیردی. آراملا اوزور، اؤز-اؤزونه دئییردی: " بو ساعت اؤلوم چوخ آسانلیقلا منیم سوراغیما گله بیلر. یاشاماغا قادیر اولدوغوم حالدا اونو اؤزومه یاخین بوراخمامالییام "
بالاجا قارا بالیق فیکیر و دوشونجه لرینی سونا چاتدیرا بیلمه دی. بالیق اودان گلدی، اونو گؤتوروب آپاردی. بالاجا بالیق بالیق اودانین اوزون دیمدیکلری آراسیندا چاپالاسا دا اؤزونو خیلاص ائده بیلمه دی. بالیق اودان دیمدییی ایله اونون بئلینی ائله برک سیخیردی کی، آز قالا جانی چیخاجاقدی. دیگر طرفدن ده بالاجا قارا بالیق سودان قیراقدا نه قدر ساغ قالا بیلردی؟ اؤلومون قاباغینی آلماق اوچون لاپ بالیق اودانین قارنینا گئتمه یه رازی ایدی، آخی، اورادا کی، نمیش لیکدن ایستیفاده ائده بیلردی. بونا گؤره بالیقودانا دئدی:
–نه اوچون منی ساغ-ساغ اودمورسان؟ من او، بالیقلاردانام کی، اؤلندن سونرا بوتون بده نیم زهره دؤنر.
بالیق اودان هئچ نه دئمه ییب فیکره گئتدی:
" آی حوققاباز، ایسته ییرسن منی دیللندیریب آرادان چیخاسان؟ "
ساحیل گئتدیک جه یاخینلاشیردی. بالاجا قارا بالیق " قورویا چاتساق داها ایش بیتدی" دئیه دوشوندو و نهایت بالیق اودانا دئدی:
–بیلیرم منی بالالارین اوچون آپاریرسان. آمما ساحیله چاتانا قدر اؤله جگم، بده نیم زهر کیسه سینه دؤنه جک، بالالارینا نییه رحمین گلمیر؟!
بالیق اودان بیر آنلیق فیکره گئتدی: " احتییاط یاخشی شئی دیر. هر ائحتیمالا قارشی اونو اؤزوم یئریم، بالالاریم اوچون ایسه باشقا بالیق توتوم... بیردن بو، بیر کلک ایشله ده ر... یوخ، جانیم، هئچ بیر کلک ایشله ده بیلمز ". سورا گؤردو کی، قارا بالیق سوستالیب جاندان دوشور. اؤز-اؤزونه دئدی:
" دئیه سن اؤلدو، آرتیق اونو اؤزوم ده یئیه بیلمرم ". ظریف و یوموشاق بالیغی یئمه کدن احتیاط ائله دی. آنجاق یئنه قارا بالیغی سسله ییب اؤلوب-اؤلمه دی یینی معیین ائتمک ایسته دی. دوشوندو کی، یاریم جاندیرسا یئسین، اؤلوبسه ... دیمدیکلرینی آرالایان کیمی قارا بالیق اونون آغزیندان خیلاص اولدو. بالیق اودان آلداندیغینی گؤروب، بالاجا قارا بالیغی تعقیب ائتدی. بالاجا قارا بالیق هاوادا ایلدیریم کیمی شیغیییب آشاغی دوشور، آغزینی آچیب دنیزین روطوبتلی هاواسینی اودوردو. نهایت سویا دوشدو. کؤکسونه یئنی نفس دولدو. بالیق اودان دا ایلدیریم سورعتی ایله شیغیییب آرخاسینجا سویا باش ووردو، آمان وئرمه ییب یئنه ده بالیغی اوددو. بالاجا قارا بالیق بیر خئیلی واخت باشینا نه گلدی یینی حیسس ائتمه دی. بیرجه اونو حیسس ائتدی کی، هر یئر قارانلیق و روطوبت لی دیر، چیخیش یولو ایسه یوخدور. ائله کی، گؤزلری قارانلیغا آلیشدی، آغلاییب آناسینی ایسته ین بیر ریزه بالیق گؤردو. یاخینلاشیب اونا نصیحت وئردی:
–قالخ آیاغا، آی بالاجا ! باشینا چاره قیلماق حاققیندا فیکیرلش، آغلاماقدان، آنانی چاغیرماقدان بیر شئی چیخماز.
ریزه بالیق سوروشدو:
–سن کیمسن؟ مگر گؤرمورسن گئت-گئده محو اولارام؟ آنا... آی آنا، هارداسان، ایمدادیما چات! داها من سنی گؤره بیلمه ییه جه يم، آنا!
بالاجا قارا بالیق:
–داها بسدیر، جانیم،–دئدی،–سن بوتون بالیقلاری روسوای ائله دین.
ریزه بالیق آغلاماغینا آرا وئرن کیمی بالاجا قارا بالیق دئدی:
–من بالیق اودانی اؤلدوروب بوتون بالیقلاری آزاد ائتمک فیکرینده یم. سنی اونون قارنیندان خیلاص ائدن دن سونرا بونو حیاتا کئچیرمک ایسته ییرم.
–سن اؤزون اؤلومله ال باخاسان. بالیق اودانی نئجه اؤلدوره بیلرسن؟
بالاجا قارا بالیق خنجرینی گؤستریب دئدی:
– بونلا اونون قارنینی جیراجاغم. هله لیک منه قولاق آس، گؤر نه دئییرم. من بالیق اودانین قارنیندا او طرف-بو طرفه گئدیب اونون عصبلری ایله اوینایاجاغام. بو زامان او منی مسخرییه قویوب باشلایاجاق قهقهه چکیب گولمه یه، ائله کی، دیمدیکلرینی آچیب گولمه یه باشلادی، جلد اؤزونو باییرا آت.
–بس سن؟
–منیم فیکریمی چکمه. بو بدجینسی اؤلدورمه میش باییرا چیخاسی دئییلم.
بالاجا قارا بالیق بو سؤزلری دئییب بالیق اودانین قارنیندا او طرف-بو طرفه وار-گل ائتمه یه باشلادی. ریزه بالیق ایسه اونون آغزیندان باییرا آتیلدی و سویا دوشدو. چوخ گؤزله دی، خیلاصکاریندان خبر چیخمادی. بیردن گؤردو کی، بالیق اودان هاوادا مایاللاق ووروب فریاد قوپاریر...نهایت، او مووازینتینی ایتیریب شاپپیلتی ایله سویا دوشدو، یئنه بیر قدر چاپالایاندان سونرا طاقت دن دوشدو. لاکین بالاجا قارا بالیقدان یئنه ده خبر چیخمادی و ایندی یه قدر ده بیر سس-سوراق یوخدو.
بورادا قوجا بالیق ناغیلینی بیتیردی. اوزونو اون بیر مین دوققوز یوز دوخسان دوققوز نوه و نتیجه سینه توتوب دئدی:
–داها یاتماق واختیدیر، بالالاریم، گئدین یاتین!
نوه-نتیجه لری اوندان سوروشدولار:
–ننه جان، آخی سن بالاجا قارا بالیغین باشینا سونرا نه لر گلدی یینی دئمه دین؟
قوجا بالیق دئدی:
–و دا صاباحکی گئجه یه قالسین، بالالاریم. آرتیق یاتماق واختیدیر. گئجه نیز خئیره قالسین!
اون بیر مین دوققوز یوز دوخسان دوققوز بالا بالیق بیر آغیزدان: –گئجه نیز خئیره قالسین!–دئدی و یاتماغا گئتدی. ننه نی ده یوخو آپاردی. بالاجا قیزیل بالیق ایسه نه قدر چالیشدی سا یاتا بیلمه دی. صوبحه ده ک دنیز باره ده فیکیرلشدی...
|
