|
شعر چلنگی
|
||
|
تورکجه مدرن دويغوسل وب صايفا |
نئچه شعر
نرمین کمال
فرق يميز يوخدور
هاميميز آچار ايتيرميشيک
اؤلميه جه یيميزی دوشونموشوک
خئيری يوخدور
سس وئره جه یيک
چاره ميز يئنه يوخدور
ايمکان وئره جه یيک اونلارا کی
حياتيميزی آلت - اوست ائتسينلر
اؤلنده هاميميزی شیلانقلا يوياجاقلار
سؤزدو ده دئييرلر.
چتين گونده حيات يولداش لاريميز
اوزوموزه توپوره جک لر
آتاجاقلار داشيميزی.
ملک کيمی گلميشديلر
گؤتوروب گئده جکلر زيبيللرينی.
بيز تک قالاجاغيق آخيردا
هامی ميزی قورد يئيه جک
دوياجاق آجی یب بير ده سوراجاق
يوز ايلدن سونرا ايسه
هئچ کيمين توکو ترپنميه جک
آدين گلنده
او آدی سنه
سئوگی ايله قويموشدولار
بئله دی بو ايی وئرميش جاميشلار
باکی
عؤمور بويو چاليشديق
ديوار کاغيذلاری آلديق
ياپيشقانلار
رنگبرنگ بويالار
باکينی ائو ائتديک:
ساحيل ایله باکسووئتی قوناق اوتاغی
ياسامالی ياتاق اوتاغی
احمدلی - اوشاق اوتاغی
درنه گول - اولدو مطبخ يميز
کئشله - آنباريميز
بوتون آبشئرون باغلاری – حَيَط يميز
خزرين ديبينه فايانس دؤشه ديک
يانلارينا کاشی ووردوق
اولدو حامام
اولدوزلار چيراغ يميز
قيشاجان دامی دا اؤرتريک
اؤرتمه سه ک ده دؤزه بيلريک
يوللارا خالچا سرديک
تبريز خالچاسی
تورپاغا گوزگو چکديک -
بولودلاری گؤرمک اوچون
هميشه اولمور
اوزو يوخاری گزمک
سئوديک بير- بيريميزی
اوچ ميليون آدام ندير کی
قومرولارا باش چکديک
اؤپدوک اونلاری ياتمازدان آز اؤنجه
سحرلر او قدر آدام آخيشدی
دومان ايچينده ايچری شهره
کی، من بيلميرديم،
دهليزه بو قدر آدام سيغار
دونيادان نه تاپديق
گتيرديک اوچ اوتاقلی ائويميزه
رسيملر ووردوق ديواريميزا
قاپی قويدوق باکی بوختاسينا
دميردن آغ آپپاق
زنگی
دينق دانق
گؤزلویو ده وار
اوتوروب سؤيود ديبينده
آلين تريميزی سيلديک
خزرده چيمديک
ايندی سوفره آچيريق، آرخاداش
قاچ، شوشا بازارينا
ساحيلدن باکسووئته جن اوزاناجاق سوفره آل
درنه گولده باکی قادينلاری
دویو دمله يير
اوخااای
شامدان سونرا
آزادليق مئيدانيندا
منه رقص بورجون وار
بورولغان
سيتم اری یير دوندورمالاردا
حوزنله کؤکله نير پيانولار
رء - رء - رء
ائولر دامير ياغيش ياغماياندا دا
قيش سرت کئچمير - قارغالار قاريلداياندا دا
خوشبخت دئييل يک هر شئی اولاندا دا
حياتين قانونلاری ايتيريب قوووه سينی.
بورولغانا دوشموشوک.
ائله بير بورولغانا،
سو دا ايچه بيلميريک
فينجان دوشور اليميزدن
دانيشا بيلميريک
کيمين سه خَترينه دَيير سؤزوموز
ماشینلارا مينه بيلميريک
کيمين سه آياغی نين اوستونه چيخير آياغيميز
داعوا دوشور
بو مين اينجی ميليون اونجو يئمه یيميز
يئيه بيلميريک اونو قايداسينجا
چنگل پيچاق قالمير اليميزده
نه قادين گلير نه کيشی قوناغی
هميشه شيت شوخلوق لاريميزا
قارشيليق وئرن دوستلار
ايندی قاشقاباق ساللايير عادی سؤزوموزه
کئف اوچون يئدی یيميز دوندورما بئله
زهرلنمه وئرير
آمبولانسا مؤحتاج ائدير
بس بيز نئجه ياشاميشيق ايندييه کيمی؟
پارکا قالخيريق فيکريميزی داغيتماغا
اوتوردوغوموز صندل تزه رنگ لنميش چيخير
سئويملی پالتاریميز بولاشير
بلکه هارداسا نه ايسه ايليشيب
ايشلر قاريشيب بير- بيرينه
حيات قاريشيب
توفنگ
توفنگ ساتيرام، آل بير توفنگ
قيسالوله ليدی، آغزی نيکئللی
اون دؤرد کاليبرلی
اونو چوخلاری ايسته ييب مندن
وئرمه ميشم
ياخشی مال ياخشی آدام اوچوندو - دئميشم،
سنين کيمی بير موشتری گؤزله ميشم
اونونلا کيمی ايستسز…
گؤزه گؤرونمزلری ده قاديردی وورماغا منيم توفنگيم
مثلا، آز بولودلو بير گونده
آللاهی اؤلدورمک فيکرينه دوشسن
و سمايا توشلاسان منيم توفنگيمی
ماسماوی گؤيلر… چکسن تَتيگی
بير دقيقه کئچمز کی
دوز يانيندا يئره گوپپ ائديب بير مئييت دوشر…
گئريسينی حل ائتمک سه سنه دوشر
يا بير چالا قازيب گؤممک اونو
يا بير شوران باتاقليغا آتماق
گئجه نين بير عالمی
دفنه آغاجلاری انديشه قوپاراجاق قصبه ده…
يا دا هئچ گيزلتمه مک: باغيرماق کی، من
بو گئجه بو توفنگله
آللاهين اؤزونو وورموشام، گوللله ميشم آللاهی
اورگی نين نه بيليم هانسی مدجيگيندن دليب کئچيب.
هله هئچ بير مجلله ده يوخدور
يازيلماييبسا دا جزاسی بئله جينايتين
سنين آزادليغين،
منيم توفنگيم
قادین ایلک دفعه
قادين ايلک دفعه سيگارئت چکنده
کيشيلر کيمي
آلير بير دوستونون
ماسادا قالميش قوتوسونو
سيييرير بير دنه سيني
قاچير باييرا
چکيلير کوْر بوُجاغا
نه اولاجاغيني دوٍشونمهدن
هانسي اوٍجدان يانديراجاغيني بئله بيلمهدن
آليشقاني فيلتيره وورور
قادين ايلک دفعه سيگارئت چکنده
بئله اوْلور
سوْنرا توتونلو اوٍجو سينايير
چييرتکه سسينين موشايعتيله
ائله اوْلمورمو، عزيزيم؟
سيگارئتي ايکي بارماق آراسيندا توُتماق
کيشيلر کيمي،
خوْش گلمير اوْنا
اوْن بارماغييلا قوْيور
بوياسيز سوْلغون دوْداغينا
بورنونا، آغزينا، بئينينه
سوٍمورهجگيني بيلمهدن
علمي ثوبوتلارا اؤنم وئرمهدن
او آن
آجييير بوْغازي
آجي - تانيديغي
ايستياوْت و سوْغاندان
قوُرو آجي
توستو کَسير نفهسيني
قهوهيي گؤينرتي،
مخمري و ايتي
گؤزوندن ياش آخير
سيگارئتي يئره آتير
باخيب کؤزرمهسينه
يانغين چيخاجاغيندان
اؤلورجهسينه قوْرخولار کئچيرير قادين
کؤزو مونجوقلو صندلي ايله
تاپدالايير
کيشيلردن داها ائکولوژي
ازيشديرير
توز ائدير
کيمسه بير سيگارئته بونجا آياق
صرف ائتمزدي آمما
بوغازيني آريتلايير
آريتلايير
آريتلايير
يايليغيني تاپماق اوٍچون
چانتاسيني آختارير
گؤينرتي قارايا دؤنور
و قهره دؤنور
بوغازدان ايچري نسه سوٍروشور
هله ده دردين
بئله اوووناجاغيني دوٍشونور،
کيشيلر کيمي
اوٍستونه بوغاز دردي ده گلير
اؤلهسن، ياناسان سني،
اونا درد چکديرن قوووه
سيگارئتين ائتديييني دوٍشمن ائتمز
قوْرخور دانيشماغا قادين
سسينين دَييشهجگيني گؤزلهيير
البته، بو اولماياجاق
اصلاحاتلار
نوماييشلر
پارتلاييشلار ايستهيير،
بوُنلار دا اوْلماياجاق
ساچي و نفهسي اوٍچ گوٍن توتون قوْخوُيور
قادين ايلک دفعه سيگارئت چکنده
بئله اولور
سوْنرا بيلهجک
سيگارئتي يان توُتماق
لازيم اوْلدوغونو
و قوْخونو
ساققيزلا گيزلتمک يوْلونو
"داويدوفف" آدلي آغريتمايان
قيز سيگارئتي اوْلدوغونو
|