| تبليغات | X |
|
شعر چلنگی
|
||
|
تورکجه مدرن دويغوسل وب صايفا |
نییه یاغیرسان یاغیش؟؟؟؟؟؟؟؟
نییه یاغیرسان یاغیش؟
سن کیمین گوز یاشیسان؟
بوش چیخان اومیدلره
یوماغا چالیشیرسان؟؟
نییه یاغیرسان یاغیش؟
روزگارلا بیر اسیرسن؟
یوخسا یئنه کیمه سه
کومه یه تله سیرسن؟
نییه یاغیرسان یاغیش؟
هر دفه سن یاغاندا،
یادیما دوشور او گون،
گوز یاشلاریم آخاندا
سانکی یاغیش دوزمه دی،
او گون منله آغلادی.
من گوز یاشی توکدوکجه،
گویلر قارا باغلادی.
داملا-داملا یاغدیقجا،
گوز یاشلاریم ایتیردی،
من فریاد قوپاردیقجا،
یاغیش کسکینله شیردی..
نییه یاغیرسان یاغیش؟
من کی ایندی خوشبختم...
یقین ایندی هارداسا
گورورسن بیر آغلاییش..
یاغ یاغیشیم، یئنه یاغ...
سن کی، کومک ائدیرسن!
تنها قالمیش اینسانین،
گوز یاشلارین سیلیرسن.................
****
روزگار اسیر، آرام-آرام...
دویورامسا اگر اونو، دئمک وارام!
روزگار اسیر،
کیملرسه خوشبخت آنلار، کیملرسه قم گتیریر.
روزگار اسیر یارپاقلاری تیتردره ک،
اورییمه، ووجودوما بیر سویوقلوق گتیرره ک...
روزگار اسیر، اوزاقلارا سس سالاراق،
یاتاغیندا دردسیز-قمسیز یاتانلاری اویاداراق...
روزگار اسیر،
کیمسه سیز و تنها قالمیش اینسانلارا کومک اوچون.
روزگار اسیر، موهاریبه، وحشی لیکلر گورمک اوچون.
روزگار اسیر دایاناراق، گوزله یره ک...
یالانلارا نیفرت ائدیب، حقیقتی سویله یره ک
روزگار اسیر، آرام-آرام...
دویورامسا اگر اونو، دئمک وارام
*****
کاش کی، یئنه سئوردیم
دلی دالغالار کیمی،
قوردوغوم خیاللاری قایالارا چیرپاراق.
کاش کی، یئنه سئوردیم
قریب دورنالار کیمی،
قاناد آچیب هر سحر سمالاردا اوچاراق.
کاش کی، یئنه سئوردیم
دوشونمه دن هئچ کسی،
دَیردی دوداغیما سئوگیلیمین نفسی.
کاش کی، یئنه سئوردیم
سوروشمادان، بیلمهدن
اویدوروب یالانلاری، حقیقتی دئمه دن.
کاش کی، یئنه سئوردیم
یاشایاراق، دویاراق،
قلبلرده سسسیز-سسسیز گیزلی یووا قوراراق.
کاش کی، یئنه سئوردیم
قاییداراق حیاتا،
سحر بسته لمک چون قاپیلیب حیسسییاتا.
کاش کی، یئنه سئوردیم
داملا-داملا، آناراق
اوزومو بو دونیانین ان خوشبختی ساناراق!!!
****
باخدیقجا اوزانان آغ بولودلارا،
آپاریر اوزاغا خیالیم منی.
باخدیقجا آغاران تانیش ساچلارا
داها دا چوخ سئویرم آی آنام سنی!!!
باخدیقجا اوزانان آغ بولودلارا،
آپاریر اوزاغا خیالیم منی.
باخدیقجا آغاران تانیش ساچلارا
داها دا چوخ سئویرم آی آنام سنی!!!
بلکه ده بو سوزلر سنه آدیدیر.
بلکه اونلارین هئچ معناسی یوخدور.
لاکین بونلاری یازان اوشاق قلبیدیر،
سئویلن آنایچون معناسی چوخدور.
ایستردیم سنین چون قوشام غزللر،
قلبیمده ان شرفلی آدا لاییق سن.
حصر ائده جم سنه گوزل شعرلر،
نفس آلدیغیم هر آن منه گرک سن!!!
****
(بوتون دمیر بارماقلیقلار آرخاسیندا اولانلاراایتیحاف ائدیرم!)
گوزله منی، گله جم
ایللرین سیناغیندان
چیخیب سنه دونه جم
تکی سن سئحر-آخشام
گوزله منی گله جم
هامی سهو ائده بیلر
بیلیرم نه دئییرسن-
...سن کی هامی دئییل سن!
-- گوزله منی گله جم.......
منی فرقلندیریردین،
هامیدان آییرد ائدیب
عومرونو صرف ائدیردین.
گوزله منی، گله جم
او ایللرین حایفینی
بیرجه-بیرجه سیله جم.
گئج اولسا دا، یئنه بیل
سنی خوشبخت ائده جم
گوزله منی، گله جم
یادیمدادیر سون گوروشه
هئچ واخت اونوتمادیغیم،
بلکه ده او سون اوپوشه
او نم لی گوزلرینی
قیریق-قیریق دئدییین
معنالی سوزلرینی
اونوتمادیم بیل کی، هئچ
هر گون فیکره دالاندا
دمیر بارماقلیقلاردان
ماوی گویه باخاندا...
گوزومدن داملا-داملا
قانلی یاشلار آخاندا
تک سنی دوشونورم
واخت گله جک بونلاری
هر آن سنه دئیه جم.
تکی سن صبر ائدره ک
گوزله منی، گله جم
پئشمانچیلیق چکیرم
ائتدیییم حرکتلره
قلبینی سیندیردیغین
او دَیَرسیز سوزلره..
اینان، نئجه پئشمانام
سنسیز کئچن ایللره
بیل کی، اولنه قده ر
تکجه سنی سئوه جم..
یئتر کی، سن صبر ائدیب
گوزله منی، گله جم ..................
****
گوزومدن یاش آخیر، قلبیمدن قانلار،
تالانیر، تاپدانیر وطن تورپاغی
یوخدورمو گوره رسن بونو قانانلار،
نییه تاپدالانیر وطن تورپاغی؟؟؟
آزغین ائرمنیلر شادلیق ائیله ییر
هر یئرده گوزلره کوللر اله ییر.
بیزیم آنالارسا، سویله ییر آغی
تالانیر، تاپدانیر وطن تورپاغی
گوره سن نه قدر چکه جک بو درد؟
باسیب میللتیمی سوستلوک، اطالت
دوزمه ییر بونلارا منده کی اوره ک،
تالانیر، تاپدانیر وطن تورپاغی
نییه یاتمیسان ای خالق، ای اولو میللت؟
نییه اوغوللارین چکمیر خجالت؟
گوره ن نه قده ر سورر بئله رذالت؟
تالانیر، تاپدانیر وطن تورپاغی
15/04/2007
|
