| تبليغات | X |
|
شعر چلنگی
|
||
|
تورکجه مدرن دويغوسل وب صايفا |
سازيم گئتدي
نادير پاشا
سازيم گئتدي
قارا اللر سينديرديلار
اونـو موغــان دوزلــرينده
سيـرلي سؤزلو تاختالاري
كوله دؤندو
ابليس قوران اوجاغلارين كؤزلـرينده
سازيم گئتدي
طراوتدَن يازيم گئتدي
پرده لـَنميش گيزلي گيزلي رازيم گئتدي
... ..يادي قالدي.....
گئجه لري سحره دَك، ايچين ايچين دردله شرديك
كدر جانا گوج سالاندا
بيرله شرديك
ائل غميند ن سؤز آچارديق
محبتين اوج بوجاقسيز عالمينده،گؤز اچارديق
اود تؤكردي كدريمه تئللريندن
سو سه پردي آلازلانيب ياناندا من
دو بيتي له
« اؤره ييمده مين درديم وار
بير آشكارا دئيَنميره م
منيم ايشيم حاققيناندير
ظولمكارا دئيَنميره م»1
سؤيله يرديك
بابك ايله، كوراوغلويلا
اوزون اوزون جيغيرلاردا بير گئده رديك
ديلغـم ايــله
حقيقتده ن سؤز آچارديق
ا َن قارانليق گئجه لرده نور ساچارديق
ايندي داها
هر بير ياندان كدر ياغير
گئجه لريم ، گئجه لرله
دويون دوشور آغير آغير
گؤز اؤنونده دوران آشار داشاردا
اؤز رنگين آتميش
سانكي عالم غمه باتميش
سازيم گئتدي
قارا اللر سينديرديــلار
اونــو موغـــان دوزلرينده
سيـرلي سؤزلو تاختالاري
كوله دؤندو
ابليس قوران اوجاغلارين كؤزلـرينده
ـــــــــــــــــــــــــــــــــــــــ
1- موكاييل آزافلي
زنگ آچدين
نادر پاشا
زنگ آچدين, خيالدان يوُموشاق سـسين
يـايـيلـــدي روُحـومـون سينيرلارينا
جالادي جانيما سئـوگي نغـمهسـين
سـو سپـدي عئشقـيمين جـيغيـرلارينـا
زنگـيْن چاغلاريـما قايـتاريب اوْ سـس
مـاوي رويـالاردا اوزدورور ايـندي
ائلهاميـْـن گوٍلـلَـهنميـْـش بوُ تاغــلاريــنا
منه شئعر ايــنجيسي دوٍزدورور ايـْـندي
سنـي طبـيـعـتـيـن سئــحيـْرلـي اَلـي
خيـال ايـْـپهييـْـندن ايـْـنـجه ياراتميـش
بـايـاض بـنـيـْـزيـْـنـده اوْ قارا خاليـْن
يـاشيـل يارانيـشدا اَن قريْب بيْر ايْـش
گؤزهلـسن, كامالين اوْنـدانـدا گؤزهل
هانسي بيْر پيْنارين سوُيون ايْچميْسَن؟
سئوگي قيـْـتليغيندا , پايٌيز چاغيندا
يازا سؤيـكهنميْسن ! يايا كئچميْسَن
آمـاندي گيْـزلي گـز گـؤز دَيهر سنـه
سَسيْـني دوُيـماسيـن هـر يـولدان اؤتـن
اوْ سوْنـسوز گؤزهلليْــك بـاغينـا هرگيْـز
دوٍشمهسيـْن نـه خـزان , نـه دوُمان, نـه چن
****
داها ...
داها بير قدح دن ايچمهيهجكدير
نه سو ـ نه ده چاخير ، دوداقلاريميز
سئوگي تونقاليلا قالانماياجاق
آلازدان دوشهجك اوجاقلاريميز
جاماكي داليندان سحره باخماق
ايرماقلار ساياغي دورودان آخماق
اؤلو خاطيرهلر چورويوب آنجاق
سونهيهجك ايشيقلي چيراقلاريميز
بيريميز اود اولوب، بيريميز ياغيش
بيري خئيير دوعا ، بيريسي قارغيش
بير ان ايستي ياي ، بير چنلي قيش
سئوگيسيز ، سولاجاق بوداقلاريميز
سن منه اولماييب سئويملي گلين
من سنه بير ايگيد ، كاماللي درين
گوندن تارلاشاجاق ، ايستيدن سرين
سئوگيدن بوش قالان ، بوجاقلاريميز
يئرينه قاييدان دئييلدير حاليم
سينيرلاري پوزموش داها ملاليم
مندن چوخ گولهجك ، سنه ماراليم
قاپيدان قاييدان ، قوناقلاريميز
« پاشا » نين كؤنلونو ائنديردين داشا
ييغيلماز بير يئره بو سينان شوشا
بيزيمكيده بئله يئتيشدي باشا
نه ائدهك داغليسين تيفاقلاريميز
آستارا ساحلينده
شعر : نادير پاشا
(رحمتليك شاعردوستوم رضا غفاريه )
آستارا ساحلينده
گوموش لپه لرايله
پيچيلدايان زاماندا
بيلمزديم كي آنلارين
آخيشي سني مندن بئله سي آلاجاقدير
ايكي ساري كوينه يه
اوتانجاق ساتاشاندا
بيلمزديم خاطيره لر قيغيلجيمي
كؤنلومده
ابدي قالاجاقدير
بيلمزديم بير گون گه لر
او گولوش باغچاسيندان
بير چيچك دره نمه رَم
دردين ياش پالتارلارين
گونشه سَره نمه رَم
گئديش حاقديرسا آنجاق
يئرسيز زامان گه لَنده
سانكي ياشيل تارلاني
باياض تومورجوقلاري
شيديرقي دولو دؤيور
باش گؤتوروب بو آنلار
گئديرسه ده تله سيك
اوره يين گؤينَرتيسي
نه آزالير نه سؤنور
ال گؤتورون ياخامدان
سيميتن مالخوليالار
داريخديران گومانلار
مني راحات بوراخين
خاطيره لر قيريقي
اي زَهَرلي....تيكانلار
دوست آختاریب یار گزیره م
دوستا آختاریب یار گزیره م
آددیم – آددیم ، آغاج – آغاج
اوبا – اوبا ، اویماق – اویماق
صمیمیت ایزله ییره م
دؤنوم – دؤنوم ،
اوزاق – اوزاق ، یوللار بویو
اومودومون ، یورولمایان کؤهله نیله
آزادلیغین زیروه سینه
قووزانیرام ، یاماج – یاماج
کؤکسومده کی سارسیلمایان ایراده یله
دولانیرام ، قاپی – قاپی ، کوچه – کوچه
ان قارانلیق گئجه لرده ن
گوندوزلره بویلانیرام
اولدوز – اولدوز
بیر چیچه یم
چینقیللارین آراسیندا دوشسمده تک
وطن عشقی
یار سئوگیسی
یاشاداجاق منلیگیمی
سالاجاغام هیممتیمله
اورکلرده یقین کی کوک
و گوله جک اوزومه ده
بیر گون سحر
عؤمور بویو گؤزله دیگیم
شن اؤزگورلوک
تبریز ۱۳۶۴
يامان سنسيزله ميشم (قيزيم سولمازا)
سولماز گولوم، سئوگيليم
غوربتده سندن ساري
يالنيز هر ، سحر آخشام
كدري ايزله ميشم
يامان سنسيز له ميشم
بير ال يئتير ايتيرهك
ظولمت ديارلاريني
سال آياغا، داغيًلسين
هيجران ديوارلاريني
آهيًنلا دؤندهر كوٍله
كؤچموش قرينهلردن
قالميش قودوز ظوٍلمتين ،
ظولمون چوروك داريني
باري بير يوخوما گَل
سيغين قوينوما سولماز
اؤز ياشيل قوللاريني
قورموش بوينوما سال
قارانليق چيخيب گئتسين
گئجه م اولسون صاف آياز
صاباحي مبهم سولماز
بير گئجه يوخوما گَل
دانيًش شيرين ديل ايله
اوره گين گؤينَرتيسين
باشين آغيرـ آغريسين
قووٍ گئتسين آغ ال ايله
گئجه لر يورقونويام
منه اول دولوسو اولدوز
ايشيقلي سحر گتير
بوتون عزيزلريمدَن
من اوچون خبر گه تير
اوٍره ييمه قور دوٍشموٍش
يانيرام هر آن گوٍلوٍم
دء هاچاق چكيلهجك
باشيميزين اوٍستوندَن
بو چن بو دومان گوٍلوم
بو آغيًر گوٍنلريمين
بير آني ايله دؤنموٍش
اوٍره ييمين آغريسي
گؤزوٍمده سئله دؤنموٍش
سولماز گولوم
آي منيم بخت اولدوزوم ، دان قيزيم
غربتده سندَن ساري
يالنيز هر، سحر آخشام
كدري ايزله ميشم يامان سنسيزله ميشم
نادیر پاشا
نادير پاشا دان ، کؤوره لدیجی بیر شئعر
ساغالماز يارا
ايچريمده ساغالمايان ،مني سيًخان
مين يارام واردير
كؤنلوٍم سوسوز بايير بير چؤل
جادار جادارديًر
آدديم باشي گؤز به ره لدير فلاكت ، كدر
هارا گئتسه م
آجي بير غم يولومو گؤزلـَر
هر ساده جه بير پوزقونلوق
نياز دولو هر بير باخيش
درد اولور منه
آ ليشيرام هر باخديقجا آنا وطنه
باغچاداكي چيچكلري
گؤردوٍكجه سولغون
چينارلارين قامتيني
گؤردوٍكجه يئرده
اوره ك، گيزلي سيزيلدادير پاسلي سازيني
آدديم آدديم
دولانديقجا اوبادا ائلده
كدر باخير، آجيق گه زير
قوشدوقوم، شعرد ه
قايالاردا صؤحبت آچير ،آجي كده ردَن
ياماجلاردا بيرجه داملا
ياغيشين، نمين
حسره تينده گؤزلريني
تيكيبلر گؤيه
گور بولاغلار قورويوبلار
داها سئل آخمير
قاري ننه ايش اوزاتمير
ايلديريم شاخمير
باغ باهاري
خياليندان، چيخارتميش چوخدان
ياشيل تئللي چيچك لرين
سولموش ايرَنگي
داها بوردا ، موچورله مير
گيلاس آغاجي
به زك وئرمير،بو باغچايا
چيچك ، چه لنگي
شيطان تورون بوتاغلارين اوستونده قورموش
باغ دئمه كي، اوزگؤزوٍنده نيكبت اوتورموش
قارا بؤوه،خاللي ايلان
هر كول ديبينده
گؤزله ييرلر حريص حريص
گه ليب گئده ني
او تيكانين
بودا ديشين
قيجيدميش، آنجاق
چالماق ايچون
هر گوناهسيز يولدان اؤته ني
ايچريمده ،ساغالمايان،مني سيخان
مين يارام واردير
كؤنلوم،سوسوز بايير بير چؤل
جادار جاداردير
۱۳۶۳- تبريز
|
