شریفه جعفری اوز دیلیندن

 

                                  

شاعیر تانیمی

شریفه جعفری اوز دیلیندن

 شريفه جعفري 1356 دا ميانادا دونيايا گؤز آچيب و ايله همان شهريده

 ابتدايي، راهنمايي و متوسطه ني اوخويوب باشا يئتيرميشم . 17

ياشيمدان شعير يازماقا  باشلاميشام .

تانیش اولاق

 

شاعير تانيتما

 

بؤيوك عاليملر ، ضيالي داهي‌لر ادبيات زينتي شاعير و يازيچي‌لار مسكني اودلار دياري محشتم تبريز اؤز ايستي قويوندا بير باجاريقلي شاعير بسله‌ييب كي شعرلري اوره ك سيغاللايان و دويغو يارالداندير . بو لطيف احساسلي شاعير  1358 جي گونش ايلي اينقلابلار بئشيگي تبريز شهرينده آنادان اولوب و شكرانه عالم آديلا تانينيدير . شكرانه خانيم 1378 جي گونش ايليندن بري تورك و فارس ديللرينده شعر يازماغا باشلاييب . ديله‌ييريك اوز ادبي چاليشمالاريندا آدديملارين گوجلو گؤتوروب و آشار داشار تورك ادبياتا قالارگي اينجيلر آرتيرسين . بو حورمتلي شاعيره باشاريلار آرزوسيلا دامو آدلي شعرين اوخويوروق .

 

دامو

 

گوناها باتديغيم گونلر گوناهسيز
سن منيم قارشيما چيخميسان يقين
اوتوز گون تانري ايله حالاللاشسامدا
بو آخشام عوصياني گزيرم سين ـ سين

قورآن‌دان اَينيمه كؤينك بيچمه‌يين
آياغيم دامويا سورگوله‌نيبدير
خونچامدا ايري گول «خلعت خندان» لار
وولكانلار بويوما اولگوله‌نيبدير

دورمادان آلووا دويون سال مني
ايچيمه ، سن بويدا گوناه قالانيب
نه سويا راست گلدين ، نه سئله آخديم
سانيرام اوستومه اوجاق جالانيب

آ‎غيزدان ـ آ‎غيزا ائشيتميشم كي
قونشوموز پاي وئرير اودو اؤزگه‌يه
يول اوسته كورفزي اووجونا ييغيب
گيزليجه تؤك ـ داغيت بيزيم كوچه‌يه

قورخورام او دامين سنسيزليييندن
قاپيمي چالالار گئجه ياريسي
توكه‌نم نابلد سو اوجاقلارا
كابوسلار اوستومه ياغا هاميسي

گوناها باتديغيم گونلري سئوديم
آخي سن قارشيما گليب ـ كئچيرسن
ايري گول خلعتلري توي ـ دويون مالي
من منيم بويوما دامو بيچيرسن

 

ائل قيزي تخللوص ائدن معصومه خانيم مهين باقري تيكمه داشين ياخينلغيندا يئرله شن « گجين» كندينده ايشيق دونيايا گوز آچيب . يوخاري دويغويا يييه اولاركن اؤز رسامچيليق قلمين يوردونون موباريز و داهي اينسانلارين گنج نسله تانيتديرماغ يولوندا ايشله ديب و بو گونه قده ر « بابك‌،‌ ستارخان ، كور اوغلو،‌ شهريار ، پروين اعتصامي وعاشيق چنگيز مهدي پور» ون شكيللرين چكه‌رك قصدي وار گله‌جكده « فضولي ، صمد بهرنگي ، قاچاق نبي ، جوانشير ، نسيمي و دده قورقود»ون شكللرينده چكسين . بو هونرمند خانيم 18 ياشيندان بري شعر يازماغا قيزغين مارق گوستريب و چاليشير بو يولدا دا اؤز باجاريغين سيناسين . اونا اؤز توتدوغو يولوندا باش اوجاليق و باشاريلار ديله‌يه‌ركن آشاغيدا «ائل قيزييام» آدلي سربست شعرين اوخويوروق :

 

ائل قيزييام

توپراغي دوز باسيلميش

كؤنلو اوخلانميش

سينه سينه كؤز باسيلميش

يوردو تالانميش !

نه بيله جك سينيز ! ؟

نه لر چك‌ميش

نه لر گؤرموش

داها بس دير بو قارانليق . بو دومانليق

خير وئرين

ائللر گلسين

گول چيچك لر عطير سپسين

گؤي گئنيش‌لنسين ، مايالانسين

بيرليك اولسون .

 

نه قده‌ر يوخسوللوق بيز

 

بير گون بير وارلي كيشي اؤز كيچيك اوغلون بير كنده آپاردي ؛ اوردا ياشايان اينسانلارين نه قده‌ر يوخسول اولمالارين اونا گؤسترسين . آتا ،‌ بالا  كند آداملارينين بيرينين داخماسيندا بير گئجه ـ گوندوز قولاق قالديلار .

سفرلري سونا چاتاركن يولدا كيشي اوغلوندان سوروشدو : « سفريميزه گؤره فيكرين نه دير ؟ »

اوغلان : « آتا ياخشي ايدي » دئدي

آتا سوروشدو : « اونلارين ياشاييشلارينا دريندن باخدين ؟ »

اوغلان : « هن ‌، آتا »

يئنه آتا سوروشدو : « بو سفردن اؤيرنديكلرين نه اولدو ؟ »

اوغلان بير آز فيكيرله‌شيب سونرا ياواش دئدي : « دوشوندوم كي اونلارين دؤرد ايتينه بيزيم بير ايتيميز وار . بيزيم حه‌يطده كي فواره‌نين يئرينه اونلارين سونو بلسيز آخار چايلاري وار . بيزيم حه‌يطده بزه كلي فانوسوموز وارسا اونلارين پارلاق اولدوزلاري وار . بيزيم حه‌يطيميز دووارلارلا حاصارلانيب آنجاق اونلارين باغلاري اوجسوز بوجاقسيزدير ! »

اوغلونون سؤزلرين ائشيدن كيشي نين ديلي توتولموشدور . اوغلان آرتيردي :‌ « آتا بيزيم نه قده‌ريوخسول اولماغيميزي منه گؤستردي‌يينه گؤره سنه مينتدارام . »

لاله جوانشیردن شعر

 

۱۳۵۷جي ايلده موغان دا آنادان اولوب،  تبريز دانيشگاهيندا بيولوژي اوزره تحصيلين بيتيره ن . ايلك شعريني مدينه گولگونون دونيادان كؤچدوگو گون يازان ، آياق اوسته تنهاليق شعر توپلوسونون يازاني ، ايراندان قيرقدان ياشايان اينجه دويغلو و درين دوشونجه لي ، شاعيرلاله خانيم جوانشيره باشاريلا ديله ييرك  بير شعرين اوخويوروق :

 

شعرلريم :             

و ايچيمي آزغينجا سيغاللايان كپنك لر ده لي كؤنلوم .

ده نيز،

هاواني ،

و سوسمايان آما اولماماسينا دا يانيلمايان هر شئيي

تا گؤزلريمين ساحيلينه دعوت ائتميش .

سن اي بولود باخيشلي ، ياغماياجاقسان

و من بير آيلي گئجه ده ساخلاناجام

پنجره نين چرچيوه سينده .

ده لي كؤنلومده ده نيز مي گورلاياجاق ؟ ( دونشونه جم )

و قيريلاجاق بير آن چرچيوه .

سوزوله جم آيلي بير گئجه نين پنجره سينده ن .

چيلغينلار ياشارميش ده لي كؤنلومده ،

چيلغين لار اؤلومو قوجاقلارميش .

و سن آلديرمادان سيسلي گؤنلره

ديلنچي قادينين سسينده بير « سه گاه » بسته سي اولورسانميش

اولورسان ده لي كؤنلوم .

آزغين و ياباني بير آغاج كؤلگه سي .

بير بارداق چاي گتير قيزيم ، چاي

ميخك قوخولو .

و ساچلارينين بنديني  آچمادان كئچمه لي سن

قيرميزي عطريني بوتون چايلارين .

جوتلونموش آياق قابيلارينين سيراسيني اونوت

ايچ و اؤلومو قوجاقلا ...

بير قادين ، آيي آنجاق دولان آيدا  چرچيوه يه چاغيرار

سن آياق قابيلارينين سيراسيني اونوت

ساچيني داغيتما دان پنجره ده‌ن

آچيق اولان بير بوشلوغا سلام دء .

 

قايناق : ياغموردان سونرا

یئنی یئتمه شاعیر ( سانای)

بو ياخينلاردا تمیز دویغولارا مالک اولان شعر دونیاسیندا یئنی دیل آچان ، ایچ پیچیلتیلارین ترننومه گتیرن ، حؤرمتلی «فاطمه خانیم سعادت » له تانیش اولدوم. اؤز وب صایفاسینین عنوانین www.sanay.blogfa.com منه وئردیلر . او صایفادا گزر کن شعرلریندن بیرین دریب ال گزدیرندن سونرا      ( شعرچلنگی ) نده یایيماسين اویغون گوردوم . اولسون کی گله جک گونلرده سعادت خانیمدان داها دولغون شعرلر بو صایفادا یایا بیلم .

 

يول يولداشی

 

  یول گئدیرم

                غملی توزلار بورویوبدور ماشین جامین

بو دئیین گن اوزون یولدا یالقیزلاییب

                               شوشه اوسته یارالدیرام شکلینی من

                                           یول یولداشیم اولاسان سن

                      خیال قوشوم اوچوب گزیر سؤزلرینده

                       او یولداکی ایزین یوخدور گؤزلرینده

گاه تیکیلیر یورغون گؤزوم

                                  عشقیم قدر ماوی اولان سمالارا

              گاهدان گؤیده دولوغسانیب

                                             اوره ییمه وورور یارا

یالنیز سنسن

سوسله یی بن ایشیقلادان یول لاریمی .

......

آنجاق نه دن ، قورخورام کی

                                   توم یاغمورلار

                                           گیجیگیندن یاغیب آلا

                                                              سنی مندن .

قافلانتی دونیاسین ده ییشدی

پنجشنبه ، دی آیی نین ۱۵ جی گونو موباریز شاعیر

« قافلانتی» اؤز دونیاسین ده ییشدی

 

مراد علی قریشی « قافلانتی» ۱۳۱۲ جی گونش ایلی چاراویماقین ، حیدر آباد کندینده آنادان اولوب . قافلانتي اؤز حیاتیندا بوللو عذابلار چکیب ، شاهلیق رژیمی نین دؤزولمز و غیر اینسانی شرایطینده یاشاییب ، عدالت سیزلیک لری قانی لا ، جانی لا دویوب و دوغما یوردو اولان میانادان تهرانا کؤچوب و محرومیت لر جایناغیندا بیر گونده دینجلیک گورمه ییب .

او آز مودت تهراندا قالاندان سونرا اؤز قلمین ، قارانلیق و ظولمون قارشیسیندا دایاندیریب او گونلرین آغیر شرایطین قلمه آلیر . ۱۳۵۰ جی ایلرده تهراندا فعالیت ائدن « دوستلار گؤروشو » درنگینده فعال عضو کیمی چیخیش ائدیر .اسلامی اینقیلابدان سونرا تهران دا یارانان « آذربایجان یازیچی و شاعیرلر جمعیتی » نین قوروجولاریندان اولور.

شاعیرین شخصیت ینده ؛ صنعتینده بارز شکیلده گؤزه چارپان جسورلوق ، مومارزلیک ، دونمزلیک کیمی غرور حس لرینین قایناغی محض یاشاییشی اولوبدور . آجیناجاقلی حیاتی اوندا رومانتیک خیاللارین باش قالدیرماسینا یول آچیبدیر .

قافلانتی شعرینده گئرچک حیاتدان یارانمیش بدیعی صورتلره ماراق گؤستریب ، اویدورما و ساختا مضمونلاردان قاچیر . شاعیر اوتوز بئش ایله یاخین دیر کی شعرله یاشاییب و یاراتدیغی اثرلر ، آذربایجانین چوخلو درگی لرینده یاییلیب و اونون شعرلرینی ائحتیوا ائدن نئچه کیتاب باسیلیب کی ( سئچیلمیش اثرلر ۱۳۵۸) و ( عؤمور آیناسی ۱۳۶۰ ) دان آد آپارماق اولار

بو گون قافلانتی نین انسانلیق عشقی له چیرپینان صنعتکار اوره گی ایشدن توشموشسه مصراعلارا چئوریلن نغمه لری ، انسانلیق خاصیت لری ، و ظولمه قارشی جسارت یارادان شعرلری دونیا دوردوقجا دوراجاق . قافلانتیدان بیر شعرایله بو سوزه سون قویورام .

 

                      حیاتدا وارام

 

قارانلیق گئجه دیر ظولمات قووشور
سانیرام داغ گلیب داغا یوووشور
ایشیلتیا ساری یول آختاریرام
اوره ییم تله سیر ، مقصده چاتسین ،
قاناد آختاریرام ، قول آختاریرام

آنا تورپاغیمی اؤپور آیاغیم ،
سیلیاندا دونوبدور دیلیم ، دوداغیم.
دویغولار ، قلبیمده قایناییر ، داشیر
یئنه ده دیزیمده قووت چوخالیر
اومودله ، خیالیم داغلاردان آشیر.

یولومدا ، مین بلا چکرکن باشیم ،
دونارکن چووغوندا کیرپی ییم ، قاشیم
کئچیرم کولکده قاردان ، شپه دن
بابام نسیمی تک ، حقی دیله ییب
اؤتورم دره دن ، داغدان ، تپه دن

تؤوشویه – تؤوشویه جیغیر سالیرام ،
آتام کوراوغلودان ایلهام آلیرام .
کولک شاللاقینی اوزومه وورور
غیرت داماریمدا قایناییر قانیم ،
ائللریم گؤزومون اؤنونده دورور.

نه دوستدان سسی چیخیر ، نه ده سیرداشدان
اوزونو دؤنده ریب قارداش ، قارداشدان
بوغازدا بوغولوب ائللرین سسی
قینیندان چیخماییر حققین قیلنجی ،
باتیر قیزیل قانا ظولمون تییه سی .

آنالار سیزلاییر ، بالاوای - دئییر ،
قارداشلار قاراسین باجیلار گئییر ،
آتالارین ، غمدن بئلی بوکولور
کیمسه ائشیتمه ییر هارایین ، هایین ،
گؤزلریندن ، قانلی یاشلار تؤکولور

گؤزلرین بره لدیب قارا قودوزلار،
آی اوربندین سالیب ، سؤنوب اولدوزلار
دان یئری سؤکولمور ، آچیلمیر سحر
قیزلار آداخلانیب ، قارا بخت اولور ،
چؤکور اوزلرینه غم توزو ، کدر

جیرانلار سیخیلیر داشین جارینا
بولبوللر حسرتدیر اؤز گولزارینا
چیچکلر سالیبدیر باشینا قارا
سئرچه لر ، آجیندان کول - کوس آختاریر،
کهلیک لر ، باشلارین قویلاییر قارا .

نیسگیل لر بیربه بیر قلبیمدن کئچیر ،
اینامیم حق یولون ، یوللاردان سئچیر.
طوفانلی دنیزده اوزمه لی یم من
اومود باغلامیشام خالقین گوجونه
دئییرم : هله لیک دؤزمه لی یم من

خالقین وورغونویام ، اونا باغلی یام ،
اورمولو ، تبریزلی ، قارا داغلی یام
منی سوسدورانماز قارانلیق ، کولک
آزاد اولمایینجا بو آنا تورپاق
دَج قالار سینه مده مین آرزی – دیلک

یولومدان آزمارام بوراندا ، چنده ،
یازیب یارادام دوغما وطنده ،
دییه رم : آی ائللر ! حیاتدا وارام
یازارام دونیادان کؤچه نه قده ر،
سیز آزاد اولماساز ، ساغالماز یارام .

 

نسیم خانیم جعفری ( گوزگو )

آذربایجاندا بیر ایجتیماعی شاعیر کیمی تانینان « آغ آتیم » و« گونش » عنوانلی شعر توپلوملارینین شاعری اولان  زنگانلی سایین هوشنگ جعفری جنابلاری بو یاخینلاردا بؤیوک قیزی نسیم خانیمین (گوزگو) آدلی شعر دفترین هدیه اولاراق منه وئردیلر .

قیسیر بولود دؤشونده /سنین آدینی یازدیم/بولودلار کیپریگیندن/سن الندین ! دییه ن  نسیم جعفری 1364 جی ایل بیر هونرمند عائیله سینده دوغولوب شعر و هنر باغچاسیندا بویا باشا چاتاراق نئچه ایل دیر صنعت عرصه سینه قدم قویوب اؤز یارادیجیلیق گوجو ایله دوشونجه لرین شعر دیلی ایله کاغاذ اوسته توکور .

م . کریمی جنابلاری گوزگو دفترینین اؤن سؤزونده یازیرلار :   « ... نسیم خانیمین شعرلرینده ، چاغداش قادین شاعیرلریمیزین – نیگار خانیمین ، سحر خانیمین – شعرلری ائتکی سی آشکارا گؤرونور .هر حالدا بونو اینانیریق کی زنگاندا یارانان تورکجه شعریمیزین بوندان داها گئنیشله نه جک و بوندان داها آرتیق خالق ایچینده یاییلاجاقدیر . بونودا آرتیرمالی یام کی گنج شاعیرلریمیز ، اؤزه للیک له خانیم شاعیرلریمیزین بو ساحه ده آددیم آتمالاری سبب اولور یئنی دوشونجه لر ، نجیب دویغولار ، گؤزه ل تعبیرلر و تصویرلر شعریمیزده اؤزونه یئر آچسین ، چوخ اوزاق دئییلدیر کی آنا دیلیمیزده یارانان گنج لرین شعرلری وطندن ائشیگه ده یول آچیب ، سرحدلری سیندیریب ، بوتون خالقلارین دردینی سؤیله مگه قادر اولسون ... »

منسه ،  نه یاخشی اولاردی نسیم خانیم اؤز شعرینده محللی و دانیش دیل سؤزلرین گتیرمکده ن چکینردی .

اونون اثرلرینین چوخو  فردی و اؤز دونیاسینا عایید دیر. ایه ر یازدیغی بیر سیرا آنلامسیز بیت لره گؤز یومساق ، شعر دونیاسیندا دانیشماغا ، یئنی ترکیبلرله تازا تصویر لر یاراماغا باجاریقلی گؤرونور . آرزیلاییرام نسیم خانیم   گله جکده داها دولغون وداها بارلی شعر یارادیب و ادب خزینه میزی بارلاندیرماقدا ایزی سیلینمز پایی اولسون . بو خانیما باشاریلار دیله یه رک ایکی شعرین اوخویوروق :

آیریلیق چارداغی !

 

آیریلیق چارداغیندا ، سنی

چاشقین بیر دالغالی خیالیمین قوملاریندا ،

جالادیردیم کؤنلومون ساحیلینه ...

سانجی لانمیش آرزیلار

گؤزومون دؤشون ساغیردی

بیر یالخی ، آری بیر خاطیره نین باغچاسیندا !

آمما بیلمه دیم ناسیل بیر قارقینلی اللرین گؤزله مگی ،

سوچسوز بیر باخیشین دؤزمه مه گی

سنی مندن

اوتدو !

سن قوتاردین منده !

من باشلاندیم سنده !

 

غزل

 

بیر گئجه تکلیک اؤنونده گلدی سس دان اویناییر

گوزگوده هر بی باخیشدا مین گؤز عیرفان اویناییر

جیرماق آتدیم گؤزلریندن بیر قیسیم پای آلماغا

گؤردوم ایلهام اورتاسیندا جان دیور اویناییر

من سخیلدیم اولدوزون شکلینده جان تاپماقلیقا

آی جالاندی ، گؤز قاماشدی ، گؤردوم هر یان اویناییر

گؤزلریمدن یاش آخار کن کیپریگیمدن شاخدی اوت

چیپ چالاندیم دالغا – دالغا منده طوفان اویناییر

منده یا هو هو دییر کن یا انالحق سؤیله دیم

گؤردوم الله  اولموشام روحومدا اینسان اویناییر

 

 

باخ ! منده کویلو قیز اولموشام

 

بو ياخينلاردا ( باخ ! منده كؤيلو قيز اولموشام ) 1362‌جي گونش ايلي تبريز‌ده دوغولان« ائلناز خانيم اسلام وند »‌دين شعر توپلوسو كيتابي اليمه چاتدي بو احساسلي شاعيره خانيملا هئچ تانيشليغيم اولمادان يازديغي سربست شعرلردن بوللو فايدالانديم . ( آچ گؤزلريني / هه ! / منم / بو شه‌هرين وحشي مارالي / ايسته‌رسن توفنگ اول ، / ايسته‌ر‌سن قورشون / من سورونه‌جه‌يم / يورغون ـ يورغون ) دييه‌ن بو دويغولو شاعيره‌دن  بير ده‌يرلي شعر سيزلره سونورام .

 

...

باخ !

من‌ده كؤيلو قيز اولموشام

تنديرلر ده‌بيشيريرم اؤزومو

هر گون ،

اوره‌ييمين زميسينه گيرنده

سارالان آرزيلاريمي دَرنده

سنسيزلييي اوراقلاييرام

سونرا گؤزلريمين آرخيندا يويورام اللريمي

اؤوسه‌له‌ييرم ايچه‌ريمي

بلكه ياساقليغيمي يئللر آپارا

باخ !

من‌ده كؤيلو قيز اولموشام

حسرت يوللارينا سريلن خالچالاري

اؤزوم توخوموشام اينان

ايلمك سالان بارماقلاريما باخ !

اوره‌ييمين اودوندان تؤره‌نميش

آل ياناقلاريما باخ

باخ !

من‌ده كؤيلو قيز اولموشام

تنديرلرده بيشيريرم اؤزومو.

ــــــــــــــــــــــ

كؤيلو : كندلي

 

کریم گل اندام

 

كريم گول اندام

درين دوشونجه و يئني فيكير صاحيبي اولان سايين دوستوم كريم آقا گول اندام 1326 نجي ايلده اورمو شهرينده آنادان اولوب 1352 نجي ايلده تهران حقوق فاكولته سين بيتريب .1341 نجي ايلدن ياراديجيليق عالمينه قدم قويوب ، 1354 نجي ايلدن بري آنا ديلينده شعر يازماغا اوستونلوك وئريب اؤزو دئيير « ايستر زامانين سرتليگي ايسترسه ده حياتيمدا اولان  معين چتينليكلره گؤره هله‌ده منيم شعريم اؤز لايقلي يئريني تاپا بيلمه ميشدير » 1377 نجي ايلده ( سؤزوم وار سنه دنيا ) شعر مجموعه سي چاپدان چيخيب . صبير سيزليكله يئني اثرلرينين يولون گؤزله‌ييريك . ايندي سه دؤرد سربست شعر بو دويغو شاعيردن .

 

ساده لوح :

هئيوا قورد سوز اولاندا

آلما قوردلو اولاندا

بادام آجي چيخاندا

قوز ايچي پوك اولاندا

انسان تعجب له نير !

سو بولانليق گلنده

هردن سود چوروينده

بارلي بوداق سيناندا

قيمتلي شئي ياناندا

انسان لار حئيف له نير!

آي گليب ايله بيتنده ، عومور هدر گئدنده ،

انسان نه حئيف له نير ، نه ده تعجب له نير !!

 

اؤلچولر :

بير اولدوز تانيانا منجم سؤيله يرلر

مين اولدوز سانيانا دؤنوب مجنون دئيرلر !

چاليش حياتين بويو اؤلچولر قاريشماسين ،

چؤمچه ايله چكرلر

قاشيق ايله يئيرلر

هر چند كي ، بو حياتدا محبت لي اولانا ،

بعضا ده لي دئيرلر !

 

منيم بوتون وارليغيم :

منيم بوتون وارليغيم محبت دير ، نفرت دير !

محبت هر كيمسه يه كي ، محبت قوخوسو اونون بورنونا ده يه !

نفرت دير او كيمسه يه كي ،‌محبت بيلمه ين كيمسه يه بويون ايه !

منيم بوتون وارليغيم صميمي بير باخيشدير

باخشلارين تانيش دير ! گل بير مني دانيشدير ،

منيم بوتون وارليغيم اوره ك دولو گولوشدور

چؤره ك سيز سفره ن اوسته

گل منه منت ائيله

گولوشونو بؤلوشدور !

منيم بوتون وارليغيم عالمده دوستلوغومدور

قوهوم قارداش يوخومدور

دوستلار منه قوهومدور !

 

غيرت :

غيرتي ساتماق اوچون آپارمازلار بازارا !

يوخسا اوندان ذره جه

چاتمازدي يوخسوللارا !

وارين ديرسا سنين دير

كيمسه سندن آلانماز.

او ائله وارليق دير كي

دشمن ده اونو دانماز .

ايتيره ن تاپا بيلمز

او راحات اله گلمز

داملا ـ داملا چوخ اولار

بيردن ـ بيره يوخ اولار .

 

کیتاب و شعر تانیشلیغی

 

« آتالار سؤزونون انكشافي » كيتابينين يازاني چاليشقان تدقيقاتچي ، ذووقولو شاعير و حؤرمتلي اولو اينسان سروريم محرم آقا پريزاد ( سورگون ) جنابلارين اؤز « هيجران داغي » شعر توپولوسو كيتابينا يازديقي قيسا اؤن سؤز دن پارچالار سئچيب او دويغولو شاعيري تانيتديراراق بير سربست شعريندن فايدالانيريق .

« ... گونشين 1323 نجو پاييزين اوچونجو آيي كي محرم آييلا مصادف اولورموش فرقوزاد كندينده دونيايا گؤز آچميشام و تحصيلاتيمي رَخدَهنه كنديندن باشلاييب ، نقده ، اورميه ، مهاباد و نهايتده تبريز دانشگاهيندان جغرافيا ليسانس فاكتيله قورتاريب و بو گونه‌ده‌ك نقده شهرينده آموزش و پرورش اداره‌سينده معلم‌ليك پئشه‌سينده خدمت ائدرم] ايندي ايسه تقاعد اولوبلار[ و فراغت چاغلاريمي موسيقي‌له تانيش اولدوغوم قده‌ر اؤزوم اوچون باش دوموگو ياراديب و يا آذربايجان عاشيق سازي و يا شيراز تاري دوزه‌لديب قوشورام ، ادبيات و شعر ايله رابطه‌ده چاليشماقيمدا ، آچيقلامالييام كي ايلكين چاغلاريمدا ، آنامين عشقيله باغلي ياشاييشيندا ، اؤزو اوچون ترنم‌لو و يا تحسرلو موزون زمزمه‌لري ، داها دوغروسو منده بير گئنيش خيال ياراتديقدا ، ايچ دويقولاريمي جانلانديريب بسله ييردي ...  .  »

يارغان

گئجه دن ياريريق ايشيغا ، بير يول

نه سس چيخاتمالي

نه ده بير سمير

مقصد آيدين سحر

نيت‌لر ده‌مير

چونكو بارا دولسون

اوره‌كده ديلك

ائيله ترپه‌نيريك

سانكي بير ايپك

اينامدان گيئمه‌ميز

عشقدن ياراق

صبحه‌ده‌ك اوياق

ظلمتي ياريريق

بيز واراق ـ واراق .

*****

 

« موغامات آذربايجان » كيتابينين ترجومه ائده ني ، صفالي شاعير و موسيقي چي  دوستوم  مجيد آقا  تيموري فر « صفا » جنابلاريندان بير شعر

موغامات

آي‌ مـــوغــامــاتيــــله‌ هـــم‌دم‌ اولـــمايان
سيرلي سؤزلر موسيقي دن آلمايان
ديققت ايله گوش قيل هر شؤئبه يه
كؤنلون اولسون هر زامان عشق آشيان
هر موغامين « گوشه » لرله شؤئبه سي
روحومزودا گوجلو بير ايزلر قويان
« راستي » دينله گؤر نئجه سؤيلور اوزان
وارليغين سيررين نصيحت له ، اينان
گاه وطن دن سؤز آچير گاه خالقيدان
گاه ايگيد ليك جارچي سي دير « خاوران
« شوشتر » ين لحن ايله اولموش كؤنلومه
خان ننه مهر و محبت لر سالان
« شور » آنام دير وارليغين صاف گوزگوسو
جوشموش اوندان شوئبه لر هر بير زامان
« چارگاه » ين هر گوشه سي بابك لرين
گور سسيني عرصه لر ايچره يايان
اوندا كي « منصور» ، « حاصاره » زور گلير
دوشمانين اوردوسونو ائيلير تالان
ياخشي قيز زينت وئرندير طايفايا
آي « سه گاه » ين سؤزلريندن ذووق آلان
وار « بايات شيراز » دا چوخ نغمه لر
او گلين دير موسيقي ده آدلانان
گز موغام عائيله سيله اول تانيش
دوي حوضونلو سؤزلري عشقينله يان
گل « هومايوني » اوره كدن دينله ييب
گؤر صفا اولسون قبولون شايگان

قیش 1380

 

******

 

آذربايجان ائلينين شنليك و نيسگيللرين تام باجاريقلا اؤز سازيندا سيزلايان و دويغو شعرلريله اوركلر‌ي اوخشايان ، ( گؤزومده بير دوداق دويغو ) شعر كيتابينين شاعيري ،  سازلي سؤزلو  شاعير دوستوم فرمان فرضي « يورغون» جنابلاريندان بير شعر

من سئویرم ...

 

من سئويرم گؤزلريني ، يول لاريمي گؤزله‌ينده
من سئويرم ديزلريني ، ايزلريني ايزله‌ينده
من سئويرم آل ياناقي ، انتظاردا سارالاندا
من سئويرم گئن اوره يي ، حسرت ايچره دارالاندا
من سئويرم قارا ساچي ، دؤشونجه دن آغاراندا
من سئويرم ياشاييشي ،عشقي ايچون اؤله‌ن زامان
من سئويرم شيرين جاني ، دوز يولوندا وئرنده جان
من سئويرم قادينلاري ، داياناندا مرد يئرينده
من سئويرم هجرلري ، نبي لرين سنگرينده
من سئويرم سارالاري ، سئل ساچيني ديده ن زامان
من سئويرم چوبانلاري ، سئل آرديجا گئدن زامان
من سئويرم « يورغون » لوغو ، صاباح لارا يول آچاندا
من سئويرم آليشماغي ، قارانليقدا نور ساچاندا .

******

( آچين پنجره ني ) دويغولو شعر توپلوسونون شاعيري ،  احساسلي و نزاكتلي دوستوم رحيم آقا گؤزل دن بير گؤزل شعر

چيچك

 

ساحيلده دوغولموش گؤزل چيچك ،

دنيزين هاواسيلا غيدالانير

و يانير

سانكي بير ماياق

دالغالانير دئيه سن بايراق ،

اؤز ـ اؤزل رنگيله بير داها ،

دوغما ساحيلي جيلوه‌لنديرير .

سويا احتراملا باش انديرير .

گول آچير سودا ،

بوراخير دنيزه ـ

ماراقلي بير ايز.

گوللنير دنيز .

دئمك ،

او چيچك

اؤز گؤزلليگيني دنيزدن آلير ـ

دنيزه سالير .