| تبليغات | X |
|
شعر چلنگی
|
||
|
تورکجه مدرن دويغوسل وب صايفا |
تبریز!
آفیق آغدامی
درک ائده بیلمیرم فله یین ایشین،
سو کسمیش یولونو سؤنمز آتشین.
ایکی یه بؤلونموش بیر اوره ک دوشون-
گؤزلری یوللاردا قالمیشام، تبریز،
یئنه بولود کیمی دولموشام، تبریز!
ايكي شعر
رضا قصدي
1
ايسته ييرسن گئده سن
گئت ، گؤزه ليم !
قالما منيم قايديما
سن سیز
مینا جلیل زاده
گؤزلرین اوتانیر ، باخا اوزومه
سؤزلرین تیترهییر ، سویوق سسینده .
دئییرسن کی سئوگین ، بیتیب دیر داها
نه فایدا یاشاماق ، درد اتگینده ؟!
اوره ييم
رضا وعيدی
یاواش - یاواش داشیرام داشلانیر یارا اوره ییم
دیلیم یئرینده دولانمیر گئدیب هارا اوره ییم
ساز چالان
شريفه جعفري ( دنيز)
چوخداندي كؤنول سن كيمي بير ساز چالان ايستير
قوربانين اولوم چال، اورهگيم جان آلان ايستير.
بير دونيا سؤزوم قالدي سينهمده توزا باتدي
چال، كؤكلو سازيم جانه گليب دير،چالان ايستير.
بارماقلاروو چك سازيمين سيملرين اوينات
اينجيكليدي، يورقوندو، بو سيملر،سايان ايستير.
اوچماق هوسيم، دار قفسيم، سن دئنهنئينيم
غمسيز زامانا عشقي كؤكوندن دانان ايستير.
گل باغريمي يارما دئمه كي سن ده گئديرسن
بير توستولهنن كؤنلومه باخ اوت سالان ايستير.
دولوخسانير
محرم پريزاد ( سورگون )
غصه دويون اولوب پينه باغلايير
قابار اللريمده خال دولوخسانير
نه اوره ك تابلاشير نه درد اودولور
اَييلمز قامتده دال دولوخسانير
گئجه يارسيندا سينه دؤيونور
شادليق آزغين دوشور دؤنرگه دؤنور
شن يانان شاملاردا اوجاغدا سؤنور
قارا دؤوران سورور آل دولوخسانير
تاپدانير ياشاييش زاي اولور امك
قات قاتا دايانير سينه ده ديلك
شيرين آنا ديلده ، دينمه ، نه گره ك !
ديللي دانيشمايير لال دولوخسانير
ككلره لي ديللرده كلمه لر يانير
عشق حقيقتي چوخلاري دانير
شفت ايله آغي ني برابر سانير
قايماق دوداقلاردا ،بال دولوخسانير
گؤزه ليم باغ يولون اونوتما آمان
بيزي بير بيريندن آييردي دومان
اينتظار ساخلادي بير آغير زامان
كئچميشي بير يادا سال دولوخسانير
قسمت بئله ايميش يازيلار بئله
سارالار اوچقونوب آخيندي سئله
مئيدا گئنيش ايميش قولدورا ـ گئله
كي بوگون حاليما حال دولوخسانير
اپريميش قوجادير ايكي قات آنا
ديزه تابلاشمايير گومان يوخ جانا
كيمه آرخالانا كيمه دايانا
دئيره م بير دايان قال دولوخسانير
توپراقلار كاميندا ايگيدلر ياتدي
بابكي خايينلار ، دوشماناساتدي
كور اوغلو دؤوراني ، سونونا چاتدي
كؤهلن ديرناق ساليب نال دولوخسانير
« سورگون» لر نيسگيلين يازان آغلايير
ساز ، سؤز سيزلايير اوزان آغلايير
بي كسلر قبريني قازان آغلايير
« قبير» ده كؤوره لير سال دولوخسانير
ايشچي شاعير
سيما صمدي
سفره سين آچميشدي ،
بير ايشچي شاعير ؛
آجي شعرلرين ،
ياوان چؤره گه بؤكوب،
شيرين ـ شيرين يئييردي .
بوتون وارليلارين واريندان آرتيق ،
چؤره گي نين آراسيندا ،
هر نه واردي .
آپار
نورانگيز گون
اوره ك سوسور ، دوداق سوسور
نه بير حمير ، نه بير نفس
قيميلدانمايير يارپاقلار
گئجه يالقيزليق لايلاسي دئيير
يوخلايير قوللاريندا مئه نسيمي
خاطيره لريمي يئلله ييره م بئشيگ كيمي
كيمسه يوخموش ، بئشيگ بومبوش
كيمسه سيزليك يئيير ايچيمي
اوره ييم ايكي بؤلونور
هر گون بئله جه ، ياواش ياواش هر شئي اؤلور
آرتيق اللريم ” او موقددس آيريليغين “ اللرينده دير
ال اله وئرميشيك اونونلا
او ، چيچك مندن چوخ آغير
من اونون توشوندا خيلي يونگول گله ره م
چكير مني
اويونو او آپاراجاق
نه فرقيمه ، آرتيق آيريليغا اؤيره نجي يه م
بيز كي چوخدان تانيشيق
ائله اول كي تك رنگي - روف سوپسولوق ...
خوش گلدين سون آيريليق !
آرتيق قورخوم يوخ
حؤكم سنين دير
آپار بير يوللوق !
قايناق : قادينجا
قادين
گل اوتور بوردا بير آزجا دانيشيم سنله
گل اوتور بوردا بير آجا له له ييم سنله
هر يئرده اولورسام اولوم
بويالي دوكانلارين بوياسييام من
هر يئرده اولورسام اولوم
گؤزه ل دييه يَهري باغلاييبلار آرخاما
هر يئرده اولورسام اولوم
اوزه نگي آسلاييبلار يَهريمدن
اولوس - اولوس مني چاپديريبلار
گل اوتور بوردا بير آزجا دانيشيم سنله
بوجاقدا سئوگي ياشاديقيمدا
مني بئله سئوگيمه قوربان وئريبلر
ساتقين اللرده ساتيشا قويوبلار، بئله دويغولاريمي
بوشونا بَله مه گؤزلريمي
دويغولارينا قوربان گئتمه
هر يئرده اولورسان اول
سن ، من ، ...
اونوت!
سید حیدر بیات
اونوت!
دایره دارالیر
یومولور
یوماق کیمی
بیر اویونجاق
یاراماز بیر پیشیک الینده
پیرت
پیرت
پیرتلاشیر
و داها اونون اوجونو کیم تاپاجاق؟
دوشونجهنی دئییرم
حیاتی
و سئوگینی
و سنی
سوندادا واخت اولسا، بیر آز مندن دانیشاق
آز یوخ
چوخ یوخ
بلکه باجاردیغیم قدر
سئوگی سونموشدوم
سن آدلی بیرینه
دوز چورهکدن ده،
داها چوخ سئویردیم سنی
و موناجات ائتدیییم داغلارین باشیندان
***
اونوت!
دایره دارالیر
یومولور
یوماق کیمی
بیر اویونجاق
یاراماز بیر پیشیک الینده
پیرت
پیرت
پیرتلاشیر
و داها اونون اوجونو کیم تاپاجاق؟
آز یوخ
چوخ یوخ
بلکه باجاردیغیم قدر
اونودورام سنی
و سن باجاردیغین قدر
اونودولماییرسان
بو سیزیئف یالچینی تک
ابدی بیر اویون
قوم – قیش 85
نه بیلیم !!
شریفه جعفری
بلكه ده ايكي آه ،توققوشاندا من ،
عمله گلميشم ، آدام اولموشام.
بلكه ده ده ينده بولود – بولودا ،
ايلدیريم ته هري ، من دوغولموشام ،
نه بيليم ،
بير بئله اود اوره ييمه،
نئجه ييغيشيب دير، هاردان گليب دير؟!
شعريمين دوداغي گووه ريب آهدان،!
او قده ر ، چكميشم آه ، يورولموشام.
گل !!!!
حميده رئيس زاده (سحر)
حسرت ياش اولوب گوزلره دولماقدادي ؛ داي گل !
گوز ياشلاري آخماقدا سئل اولماقدادي ؛ داي گل !
هجران تورو دونياني قفس تك بورويوبدور
دونيا كيمي باغريم دا دارالماقدادي ؛ داي گل
سال داغلارا هاي ، گويده بولودلار ديله گلسين
يارپاق كيمي وارليق بويو سولماقدادي ؛ داي گل !
هجرينده كئچن لحظه لري يانقيلي ساز تك
غم پنجه سي ، آه زخمه سي ، چالماقدادي ؛ داي گل !
سنسيزليگه دوزمك نه ساياق ممكن اولارميش
دوزودوم ، دوزوموم جانيم آلماقدادي ؛ داي گل !
گل قوي گونشين بايدا سي دونيايه جالانسين
باغريمدا قارانليق ايزي قالماقدادي ؛ داي گل !
ياتماز ، يولونو گوزلريم اولدوز كيمي گوزلر
گوزلر كوكو ، حسرتله سارالماقدادي ؛داي گل !
هر گون " سحر" آدديملارينين ماهني سين ايزلر
آچميش سحرين باغري قارالماقدادي ؛ داي گل !
من عئشق کوچه سینده یاشاییرام
سئوینج چیلغین
یاشیم 20 -
یوخ،
منزیل 20.
آچیق قاپی- باجالی
سینیق پنجرلی
بیر ویرانادا.
چیرکینلیگیمدن قورخور
قونشو اوشاقلاری.
اوتانیرام حالیمدان.
بیر سینیق میز،
بیر چولاق اساسی
بیر ده سن وارسان
اوتاغیمدا.
شکلینی ده آسمیشام باخیشلاریمدان
من ده یوخام -
ایتمیشم، ائله بیل،
گیلدیر- گیلدیر
گؤز یاشیملا بیتمیشم
سوندان سونراسی...
بو منزیل!...
ائ!
بو منزیلین هاواسی یوخ
نفه سین یوخ دئیه.
بو منزیلده یوواسی چوخ
آخماق هؤرومچکلرین.
سن وارسان،
بیر سنسن گؤزل -
گؤزللیک.
چیرکینلیگیمدن قورخور
قونشو اوشاقلاری.
اوتانیرام
آینالاردا بیر آغلار گؤزل وار
گؤزللیگینه حئیران.
بو منزیلده هر گون،
هر آن،
هر زامان
باش گیجلله ندیرن دومان،
حامیله بولودلار وار -
(اینانماسان دا اولار).
عئشق کوچه سینده یاشاییرام
منزیل 20.
آچیق قاپی- باجالی
سینیق شوشلی پنجره لردن
گئجه- گوندوز
بیر قیز باخار.
کؤکسونه یاغیش یاغار.
...عئشق کوچه سی...
...بیر منزیل...
...بیر قیز...
...گلیب- گئدن...
...یوخ...
...تزه گوللر اکدیم...
...اونوتدوم -
نسه دئیه جکدیم...
دوكتور سيد محمد حسين مبين (شيمشك ) ، محتشم تبريز شهري نين گؤركملي شاعيرلريندن دير . دوكتور مبين ، حكيم دير و ايللردير تبريزده ظبابت له چاليشير . او ايللردير بابا باغيندا يئرلشن جذامي لر مركزينده ، فخرله بو اينسانلارا خدمت ائدير . اونو جذامي لرين آتاسي آدي ايله آدلانديرييلار . اوشا اولدوغوموز زامانلار ، ابتدايي درسليك كيتابلاريندا دوكتور آلبرت شوايتزر آدلي بير حكيم ايله تانيش اولوردوق . دوكتور آلبرت شوايتزر ، اؤزو آوروپالي اولاركن ، اوزون ايللر آفريقادا قارا دريلي اينسانلارا اوره كدن خديمت ائتميشدير . شوايتزرين آدي درسيلك كيتابلارينا سالينيرسادا ، اؤز شهريميزده حكيمليك امكانلاريندان ال اوزوب ، جذامي لرله ياشاييب ، اونلارين يارالارينا و دردلرينه مرهم قويان دوكتور مبين ، تاسفله هله ده لازيمي قدر بوتون تبريزليلره تانيش ده ييلدير و اونو تكجه حكيم دوستلاري ، هم ده آذربايجان شعر و ادبياتينا مازاق گؤسترنلر تانير لار . دوكتور مبين شعرده شميشك تخلص ائدير و اوندان گؤزه ل ـ گؤزه ل شعرلر و منظومه لر ،او جومله دن « جذاملي سارا » ادبياتيميزا ياديگار قالميشدير . تبريزين قوجامان شاعيري حؤرمتلي كريم مشروطه چي( سؤنمز) جنابلاري شيمشك ي عزيزلمك اوچون اونون تجليل توره نينه منظوم بير مكتوب يازيب كي يئري گلميش كن بورادا او گؤزه ل مكتوبو بيرليكده اوخويوروق . هر ايكي قوجامان شاعيرلريميزه اوزون عؤمور و اوغورلو گونلر آرزيلاييرام
***
قارداشيم جان جيگريم ، سئوگيلي « شيمشك » :
ايييد اينسانلارا اؤرنك !
دئديلر : ائل بو گلن هفته ده گون خوشلاياجاقدير ،
تزه دستانيني ،اول ، سن ايله باشلاياجاقدير ،
توپلاشاركن سني آلقيشاياجاقدير .
***
سن كي ،عؤمرون بويو خالق ايچره عزيزدين و عزيزسن ،
يويدا ،داغلارجا اوجالسان دا ، درينليكده دنيزسن ،
سن ايگيت ليكده ، كوراوغلو يلا اكيزسن ،
نيتي ، فيكري تميزسن .
***
سن ، او شيمشك كي ، قوراقليقدا افقلرده چاخارسان
وئره رك خالقا ياغيش مژذه سي ، سونسوز دا آخارسان
تشنه تورپاقلارا رحمتله ،سخاوتله باخارسان .
***
چاققيشاندا قرانيت قلپه لري ، سن دوغولارسان ،
قور اولوب داشلاناراق ، ائللره الهام دا وئررسن،
ايشيق عاشيقلري نين اللرينه شام دا وئرسن ،
اونلارين هر بيري اؤز شانينجه سندن پاي آلارلار،
سنه اولدوز وئره لر ، وجهينه سندن آي آلارلار.
***
گؤرمه ديم بير كسي كي ، سن قدر آلچاق گؤيول اوسون
بهره لي ـ بارلي آغاج تك ،
داللاري خالقا باش اگسين
ظاهري ساده اولاركن ،
معرفتله ايچي دولسون .
***
حقه دوغرو جغير آچدين بو فاغير خالق اوره ييندن،
خالقدان خاليقه چاتدين !
« خالقيميز ، حقه قووشان » ـ دئدين اولماز ، بو محالدي ،
كيمسه ده هر نه دئسه ، سوزودو بو صحبتدي بو ، قالدي .
***
سن ، او شيمشك كي ،بشر ، ايلك ايشغي اوندان آلارميش ،
چاخماسايدي ، گئجه وقتي ،بشر اؤولادي قارانليقدا قالارميش ،
شاختادان قيشدا دونارميش ،
***
ايشيغين اود ـ آلووون قايناغي شيمشكدي ـدئييبلر ،
اودي « شيمشك »كيمي لر ، آزدي ، و يا تك دي ـ دئييبلر ،
دوغرو اينسانليغا اؤرنك دي ـ دئييبلر .
***
من ، اوركدن بو سؤزه سس وئريرم ، گئت اوغور اولسون !
قوي بو سسلر قوووشوب داغلارا دوشسون ،
سسلرين عكس صداسي ،هامي سرحدلري آشسين ،
گونو ـ گوندن ده گور اولسون .
***
سنه «شيمشك » دئديلر كي ، چاخاراق قور سالانارسان ،
خالقيمين نيسگيلينه ،درديني دايم دوشو نرسن ،
دوشونركن ده يانارسان .
***
سن جذامي لر اوچون هم آتاسان ، هم ده حكيم سن ،
چوخلو بيلمز بونو كيمسن ،
مگر اونلار كي ، سنينله آغير ايللرده تانيشدي ،
يوكسك آماله قوووشسون دئيه رك سنله ياريشدي ،
ايشيغا دوغرو ، قارانليقلا ووروشدو .
***
سني ، احساسلي قلم صاحيبي تك وصفه چاليشديم ،
قلميندن چاخان آتشلره من يانديم ، آليشديم ،
سن ، « جذاملي سارا » ني ،
اونلار برابر ياشاياركن ، ياراديبسان ،
ياراداركن ده يانيبسان ،
سارانين درديني ، منجه ، سارادان ياخشي قانيبسان.
***
سن او دستاني يازاندا ، نييه اود توتمادي دفتر ؟
نييه سارسيلمادي اوستونده قلم گزديرن اللر ؟
سوز كي ، حقدن مايالاندي ، بئله جه روحلارا ايشلر ،
دونيادا ائلجه بيلنلر ، هاميسي بؤيله دئميشلر .
***
سني « آلبرت » ايله تمثيله ده منطق گوجو چاتماز ،
اودا آفريقادا ، سن تك ، قارا خالقين داياغي ايميش ،
گوندوز ايشلر ، گئجه ياتماز .
نئچه ميليون اويويان گؤزلرين آنجاق اوياغي ايميش ،
اودا اينسانليغا لايق كيتابين بير واراغي ايميش ،
چوخونون سيغناجاغي ايميش .
***
حيف اولا ،ايندي اليم چاتميري توتسون اتگيندن ،
هر زامان تبريزه دؤندوم ،ايشيق آلديم اوره گيندن .
فايدالانديم اؤيودوندن ،
دويماديم دوز ـ چؤرگيندن .
***
آتاميزدان بيزه ده آنديرا قالميشدي بو دوستلوق ،
سو ايچيب ، گؤز ياشيميزدان دا اوجالميشدي بو دوستلوق ،
بيز ايلن بيرگه قوجالميشدي بو دوستلوق ،
«كهنه دوستلوق » دئيه ، بيزدن ده باج آلميشدي بو دوستلوق ،
***
سني « اينسانليغا اؤرنك » سايان ائل ،هئچ ده يانيلماز
كيم محبتله ياشار ، ائل طرفيندن او ،دانيلماز خالق ايچينده ،
قورو ـ بوش سؤزله ، اؤلومسوز ، گؤزه ل آدلار قازانيلماز .
ائلين ايدراكينا آلقيش !
سو سؤزو ،ائل دئير آنجاق ،
او وئرن قيمته « تاريخ » ده دئييبلر .
او داكي ، سهل سانيلماز .
***
سو او سيمرغسان ، اي قارتال اوچوشلوم !
توتسالار آتشه هاردا يئله گين ، اوردا حاضيرسان ،
هر كلك قورسا دا شيطان ، اونو شيمشكله پوزورسان ،
شيطانا گور دا قازيرسان .
بهره لي ـ بارلي ، گوزه ل عؤمرونو تاريخه يازيرسان .
***
يوخسولا نسخه يازاركن ، اونا درمان دا وئررسن،
خالقيميز ايسته سه ، اوغروندا اونون جان دا وئررسن ،
وطن آزادليغي ايجاب ائله سه ، قان دا وئررسن ،
او شيرين جانيني قوريان دا وئررسن.
***
سانما كي من سني تبريك ائديرم چوخ دا اوزاقدان ،
سني باغريمدا دوياركن ،
اؤز ـ اؤزومله دانيشيرميش كيمي يم سنله باياقدان .
سئوگي سيزلر بونو ايدارك ائله مز باخسا قيراقدان .
سئوگي گئرچكده ، زامانسيزدي ،مكانسيزدي ازلدن ،
او ، كيمين قلبينه سينسه ،
او ، كيمين روحونا هوپسا ،
اونو قاوسان دا اوجاقدان ،
گله جك باشقا بوجاقدان .
***
كاش او شفقتله باخان گؤزلري نين جووجولرينده ـ
بيرجه تئل كيرپيك اولايديم .
گؤز قاشين كؤلگه سالايدي باشيما جانلي چينار تك ،
سايه سينده دوشونه يديم ،داشينايديم ،
احتراصدان بوشاليب ، بلكه محبتله دولايديم ،
سنه من قوربان اولايديم !
**********
گلين
سوسقون قاريلار اوباسيندا
قورلاندي بير گلين
داشي ياغديرديلار باشينا
ساچلاريني پايلاديلار
پاسلي بيراينام
اييله دي نفس لريني
و گولدو اركك جه سينه
بوتون يازي لار قويلاندي
و من
ان زيروه سينده
ائلناز نستوه
زیندانلارین ایچینده
سیلمان محمدی
آرتیق بیلیرم
دوشونمهیین یئری یوخ
پاسلانیر اورکلر
یالقیز آینالار کیمی
بیر داها اؤزومو گؤرمهیهجم
داریخیب سیخیلیر آنلاریم
بیرده، اونوتدوغوم اؤیکولریم یادیما دوشمور
داها نه بیر ائو، نه بیر ساحیل وار
کولکلر قیشقیریر
کیمسه منی بو دار قاپیلارآستاناسیندان آسیب
آچارینی ایتیریب اوچروملاردا
حئیف سؤزلریم اؤرهییمده، اونودولاجاغام
ایندی سسلر، دیوارلارین اوستونده قالمیر
گونش کیمی
ازیلیر منلیییم
نه واختسا اویانیرام
من یاغیش آلتیندا، ایسلانمیش کاغیذام
من بیرگونشی گؤزلهییردیم
حئیف گولگهلرین گولگهسینده
توزلو آینایدیم
گورشاد یاغیشلاری گوزلهییردیم
حئیف آلچاق داملارین آلتیندا.
کلهپچهلنمیش اللریدیم
آچار اللرینی، گزیردیم زندانلارین ایچینده
گؤیرچین گؤزلریمه، ماوی گؤزلرینی اؤزلهییردیم
سؤیله
کیم سیندیردی آینالاریمی
بیرده سنی گوره بیلمهدیم
حئیف! گلهجک اورهییمده اونودولاجاغام
بایاتیلاریم ایچیمده اونودولاجاغام.
چوروموش قانادلاريم
گؤيهرهجك
ماويليك لره
كيمسه واردي بيليرم
گليبدير دونيايا
قاريشيبدير وارليقلارا
تانيشيلماميشلاريق
گؤروشولمهميشلريك بيز
هئچ نه بيزي ساخلامادان
هارداسا تانيشاجاييق بير اولايلا.
او منيم بوتون يانديقيم اولايلار
او منيم ايتيرديكلريم
و دئيیلمهين سؤزلريمدیر
بلكه بير گون اؤتموشم كناريندان
يوللار آيريجيندا
بلكه سن او سان
گؤردوم بير گون سني شاه عباس ليمانيندا، ساحيلده
ماوی کؤرفز گؤزلرينده
و چالوسدا
دنيزين آدرسيني سوروشدون ساكيت بير كوچهده
بلکه سن گوزلری یاشلی تبریزیم سن
من آغلاميشام
گليشيني
يوللارا
داغلارا
آديني سؤيلهميشم
آينالارا
سونرا اويانيب آختارميشام نيشانيني
بير قيرميزي آلمانين عطرينده
بير چيچگين گؤيرهكليكينده
كيمسه واردي بيليرم
هارداسا تاپيشاجاييق بير اولاي لا.
۱
Məni buraxmayan
2 vurğunum var
2 dəlim!
Birinin adı yaşam
Birinin adı ölüm
Ucaboy yaşam gözəldir,
mənə baxar
şer yazar
şarab içər...
ölümsə
təkcə xəbər göndərər
sonda mənimsən deyər.
nəysə
mən sevgilimi seçmişəm
gedin deyin ölümə
yaşamla sevişmişəm.
۲
Haradaydın sən?
dünən pərdə dalına baxdım
yoxuydun!
Pəncərəni açdım həyətə baxdım
Yoxuydun!
Otaqları bir bir axtardım
dəlirdim
dolablara
çəkməcələrə
çantama bilə baxdım
yoxuydun!
Paltarlarımın ceblərinə
Saatıma
üzüyümə
istəkana
semavara
su səpilmiş küçələrə
Saray qaçırdan sellərə ...
Yoxuydun!
Nə boşuna üzüldüm!
yorğun arğın
xəstə ürəyimə döndüm
gözüm aydın
sən ordaydın varıydın ...
بهروز صديقي ده ن شعرلر :
1-
شنه
دهره
چاپاجاق
هاچاناجاق
باغریمین
اؤلکه سینده
قورخونون
یاللی – قانلی آتینی
قیرواق – قیرواق
چاپاجاق
شنه
دهره
چاپاجاق
2-
آددیم – آددیم
آددیم
آتدیم
یولون اوسته
گؤیرمک چون
سولغونلاشدیم ، گؤیرمکدن
3-
سنه بویون ایمه یه جه یم
ای قارانلیق
ای قورخولوق
سنی سئومه یه جه یم
شعرسیز کئچن
گونلریم کیمی
4-
دهره قورخوسونو
یاشایان آغاج
خزل مزاریندا
قویلانار آنجاق
5-
گؤیلومده
گؤیریر
گوجلو گومانلار
گؤره ن بیر ده سنی
گؤره جه یم می؟
آلیب سوراغینی
یاغان یاغیش دان
سنسیز لیک کوچه سین
دولانیرام من
یوخولو ، گیلانار آغاجییام کی
باهارسیز
قانیما
بویانیرام من .
6-
سئویردی
سئویلمه ییر دی
ایچیردیم باخیشیندان
بارداق – بارداق آغرینی
و سونرا بیز
ایسلانیر دیق
یاناقلاردا شیریم آچمیش
لال یاغیش دان
آیریلیردیق
چؤکموش گئجه بویاسیندا
ایکی جانسیز کؤلگه کیمی
آیری - آیری
قویلانیردیق .
7-
دوستوم !
بیر پاپریز آلیشدیر
گئجه نین
لال اوره یینده
کی باتاقلیقدا
نیلوفر گولونه
اوخشار الیم
دلی داریخیر
اوره یین له ...
8-
هاف ...
هاف...
هاف...
ایت هورور
گوندوزون
گول دوداغیندا
وارلیغیم ؛
قارانلیق
قارانلیق
قارانلیق
ایلانلار آغزیندا گئدیر
باخ !!
جاوانلیق
9-
سن ای سو سسلی سئوگیلیم !
سئوه جه یم
سنی من
بیرینجی شعریمین
چاپ سئوینجی تک .
10-
باخیشی قارلیم
او یاخشیم
بیر آخشام
اوره ییمین گئجه سینه گله جک
و
اللریم یوخوسوندان دوراجاق ...
بیر آخشام
او یاخشیم
تکی منه گتیررسه
گلیمین
اوتورمارام
من یاسیندا الیمین.
يارالي قوش
... و قارلي
قيروولو
دونوق بير آخشام
داخماما دؤندوم
تلم _ تله سيك
كوچه نين سونوندا
دووار ديبينده
وورولموش كورپه قوش
قانادي كسيك
نه دني
نه سويو
نه گئنيش سما
پايي آل قاني ايدي
وسونسوز يارا
آلديم اللريمه
قيزيل قان قوشو
گتيرديم
من ائوده قفسه سالديم
اؤزوم ايسته مه دن
اؤزوم بيلمه دن
يارالي او قوشدان
گؤيلري آلديم
سن دئمه گؤرپه جيك
او يالقيز بالام
صوبحه دك دؤنمه ميش
او هئچ ياتماميش
گونشه اوخشايان
گون اللري ايله
قارانليق قفسين
قاپيسين آچميش
بير كاغيذ قوياراق ماسامين اوسته
دونيانين ان گوزه ل شعرين يازميش :
تانري گؤيلري قوش اوچون ياراتميش .
سيتم
بدري رحمي ايوب اوغولو ( 1975 ـ 1913)
اؤنده زئيتون آغاجلاري آرخاسيندا يار
سنه 1946
مؤوسوم
سون باهار
اؤنده زئيتون آغاجلاري نئيله ييم ، نئيله ييم
داللاري نئيله ييم
يار يولونا تؤكولمه ديك ديللري نئيله ييم .
يا ر، يار! ... سني قار ساپلي بير بيچاق كيمي
سينهمه ساپلاديلار
ده ييرمان ميثالي دؤنر باشيم
سئودا دئييل بو بير ظولوم
گل گؤر مني دارماداغين .
تئل ـ تئل چؤزولوب ( آچيليب ) قالميشام .
يار ، يار
جانيمين توخوموندا تيكان
گؤزومون ببه يينده سيتم وار .
سالام ايله حارام
بيز دونيادان گئدر اولدوق
قالانلارا سالام اولسون
آمما هئي بؤيله گئده جكسه بو دونيا
قالانلارا حارام اولسون
***
معلوم
حليم شفيق گؤزل سون ( 1990 ـ 1913 )
شعر بير امكچي دير
ان گؤزه ل شئيلر يارادير
بير يئرده راستلاشسان اونا
گير قولونا بيزه گتير
***
آرازانليق
محمدعلي نهاوندي ( موغان )
گؤزلريندن ،
شيرين ، آخير
آرازانليق شلاله سي
... دوداقلاري كؤهنه ايچكي
... ايلش ايچك .
..........
ـ گؤزلرينين ساغليغينا !
***
ياغار خاطيره
حميده رئيس زاده ( سحر)
هر اولدوزدان
بير باخيشليق سئوينج
هر يولون نهايتيندن
بير توزقون دؤنوم
هر دنيزده ن
بير بارداق طراوت قالدي
گؤزلريمين آيناسيندا
هر يازدان
بير ياغار خاطيره
آياقلاردان
تكجه بير ايز قالدي
قلبيمين يارپاغيندا
سندن
دويغولار اؤلچوسونه سيغماز بير سئودا قالدي
من قالديم
دونيا قالدي .
***
مهر آيينين 16 ينجي گونو دونيا اوشاقلار گونو بوتون دونيا چيچكلرينه قوتلو اولسون .
دوشونجهلي اينسانلار گلين بيزده اوشاقلار كيمي گولوشلريميزي بؤلوشدورك ، كينهلري آرادان قالديريب اورك دولو سئوينجله بير ـ بيريميزي سئوك ، اوشاقلارا مهريبان اولوب اونلار اوچون اليميزدن گلني اسيرگهمهيك . حيات باغچاسينين طراوتلي گوللرين ياشاييشين كولك و شاختاسيندان قورويوب هميشه باهار نفسلي ساخلاياق . اونلار يئخيليب ، دوروب آياق يول گئتمهيي اويرنرلر؛ گلين بيزده يئخيلمالاريميزدان گوج آليب نائليت يوللارين ايناملار آددملاياق .
اوشاقلاريميزا آتا ـ آنا اولدوقدا يئتيم بالالاريدا خاطيرلاييب ، اللريندن توتاق . دكتر مبين « شيمشك » جنابلاري( محبت تشنه سي )عنوانلي شعرينده يئتيم اوشاقلار ديليندن بئله يازير :
محبت دريادير/ اوج سوز ـ بوجاقسيز/ محبت ايچينده / من بوغولموشام / كيم بيلير / بلكهده بير گون/محبت گؤرمهميش/ من دوغولموشام / آتاسيز ، آناسيز/ سارماشيق كيمي / ساريشيب حياتا/ ياپراق آچميشام .
شعر : بولنت اوزجان
اوشاقلار اولماسايدي
اوشاقلار اولماسايدي
بئلهجه سئومزديم ياشامي
بئلهجه سئوينج سازمازدي اورهييمي
بئلهجه دايانمازديم آجييا
بئلهجه شعرلر يازمازديم
اوشاقلار اولماسايدي
آنالار بئلهجه گؤزل اولمازدي
***
شعر ناظيم حكمت :
دونياني اوشاقلارا وئره ليم
دونياني اوشاقلارا وئرهليم هئچ اولمازسا بير گونلويه
آللي ـ پوللو بير بالون كيمي وئرليم اويناسينلار
اويناسينلار توركولو سؤيلهيهرك اولدوزلارين آلتيندا
دونياني اوشاقلارا وئرهليم
ايري بير آلما كيمي
ايستي بير كوماش كيمي
هئچ اولمازسا بير گونلوگونه دويسونلار
دونياني اوشاقلارا وئرليم ، هئچ اولمازسا
هئچ اولمازسا بير گونلوگونه اؤيرتسينلر بيزه
يولداشليغي
اوشاقلار آلاجاق
اليميزدن دونياني آلاجاق
و اؤلومسوز آغاجلار تيكهجكلر
دونياني اوشاقلارا وئرهليم
***
ـــــــــــــــــــــــــــــــــــــ
يوخاريدا يازيلان ايكي اوشاق شعري بو ياخينلاردا دونيا اوشاق گونو موناسيبتيله ، «بيليم يولو تشكيلاتي»تشبوثي ايله اورمودا كئچيريلن مراسيمده مهندس عليرضا صرافي ، ديلماج درگيسينين صاحيب امتيازي و سوروملو مودورو اؤز دانيشيقلاري آراسيندا اوخويوبلار .
|
