صاباح اوشاقلاریندیر

 

            

 

• صاباح اوشاقلاريندير

• يازار : مهدخت كشكولی

• چئویرن : بهروز صديقی

 
سيرلی ـ سئحيرلی كيتا‌بيندان

هله گونش چيخماميشدي. اوشاق‌لار قاچاراق داغ باشينا يئتيشديلر. داغ آغ بؤركونو باشينا تاخیب ، دینمز دانیشماز  اَيلشميشدي. اوشاق‌لار آراسيندا اولان بیر قیز اوشاغی داغا اوز توتاراق سؤيلهﺩي:  بؤركونو منه بورج وئررسنﻣﻲ؟

 

تورکان اورمولودان شئعرلر

 

                                       

 

شئعرلر

 

توركان اورمولو

 

 1

  تامام جانیم  

   

  بوشلادیم گؤزلرینی 

  بو پنجره 

  بو دا من 

رویا

 

                                                   

 

رٶيا

شبنم باقرزاده

رؤيامدا گؤردويوم
قارا حيجاب­لي چيركين قادين
تانري­نين وئردييي هئچ نه­يه
لاييق دئييل­سه ن دئدي
ائله او آن آييلديم
و دوشوندوم سحره قده­ر
هئچ نه­يه لاييق دئييل­ميشه م
حقيقتن ده
آناما
سئوگي­لي­مه
دوستلاريما
قزئتيمده چاليشان اينسانلارا
مني سئوه ن اينسانلارين
هئچ بيرينه
هئچ بيرينه لاييق دئييله م
تانري­دان مي گئلدي
بو مئساژ رؤيادا بيلمه م
كيمسه منه اؤيره تمه­دي
ياخشي اينسان اولماغي
هامي ساده­جه سئودي مني
سئودي­لر سئوگي­لرينه لاييق اولمايان بيريسي­ني
من هئچ تانريمي بئله سئوه بيلمه­ديم

 

رقیه صفری دن اوچ شعر

 

                                      

اوچ شعر:

رقيه صفري

 

دادلي اوره ك

سن بئینیمی تامسینیرسان

منسه اؤزومو یئییرم

نه دادلیدیر اوره ییم

صداقت دادیییر

هیییی

آز قالا بارماقلاریمی دا یئیه جه یم

نوش اولسون................!!!!!

 

 

خزرلی سئوگیلیم

خزرلی سئوگیلیم

دالغالاندی اوره ییمده

ساحیل گئجه سینده .

من قایالار مامیری تک

ساچلاریمی دارایارکن دالغالاردان

جوجریردیم خزرلنمیش اوره یینده.

 

 

اينسان اوغلو

قینامادیم اینسان اوغلونو

آرابایلا پیشییه چارپیب

آرخایا باخمادان کئچیب گئتدیکده

....

او محاریبه لر قوروب اینسان اؤلدوررمیش!!!

 

هایکو سایاق

 

                                    

 

هايكو ساياق

سيامك حسينعلي زاده ( ا رگين )

 

يئتر

اوره يي نفرتلرله

دولو اولان

چاققالين

دوداغيندا

قورولان

قوندارما

گولوشلر

نه قدر گولمه لي ، دئييلمي ؟

قارغالار

اؤز يئريشلريني ،‌ يئريسه لر

داها يئي ، دئييلمي .

بالاجا قارا بالیق

                                                

    بالاجا قارا بالیق 

 

    صمد بهرنگي

 

چیلله آخشامی ایدی. قوجا بالیق دریانین دیبینده نوه-نتیجه لرینی اطرافینا توپلاییب اونلارا ناغیل دانیشیردی: 

  بیری وار ایدی، بیری یوخ ایدی، بیر بالاجا قارا بالیق وار ایدی. او آناسی ایله بیرلیکده کیچیک بیر آرخدا یاشاییردی. آرخین سویو دریه آخیردی. بالاجا قارا بالیقلا آناسی نین بیر قارا داشین دالیندا، یوسونلارین آراسیندا ائولری وار ایدی. آنا و بالا سحردن آخشاما قدر بیر-بیری نین دالینا دوشوب اوزور، هردن باشقا بالیقلارا قوشولوب سورعتله بالاجا بیر یئرده گزیشیر و گئری قاییدیردیلار. قارا بالیق آناسی نین بیرجه سی ایدی. 

آلين يازيمداسان

 

                          

آلین یازیمداسان 

‌پري (ساري گلين )

 

  هارا باخیرام سن اورداسان، یانیمداسان 

  آدین دیلیمین ازبری، الیمده کی سازیمداسان 

   

  سن اولموسان واریم، یوخوم، تک دیله ییم 

  درد اورتاغیم، چوخومدا هم آزیمداسان 

   

  نئجه اونودارام سنی، اورییمین آرزوسونو 

  باغلانمیسان قده ریمه، آلین یازیمداسان 

   

  نه فرق ائدر آیلارین، فصیللرین دییشمه سی 

  سن هم قیشیم هم باهاریم یازیمداسان 

   

  سنسن سسله دی ییم، آللاهیمدان ایسته دی ییم 

  تانرییا ائتدی ییم هر دوادا، نییازیمداسان 

   

  خیالینله گولرم خیالینله من آغلارام 

  هر سئوینجیمده، آخان گؤز یاشلاریمداسان 

   

  سندن اوول ده یاشاییردیم هئچ بیلمیرم 

  تک بیلدی ییم بو گونومده، صاباحیمداسان 

   

  دء سنی سئومک نییه گوناهدیر نییه یاساق 

  یاشادیغیم هر گؤزللیکده، سوابیمداسان 

   

  سانما کی ال چاتمازیمسان، چوخ اوزاقداسان 

  داماریمداکی قان، جاندان اؤته جانیمداسان 

   

  سنسیز هئچ اولمادیم قالمادیم، اولمارام کی 

  آخی چکدی ییم هر نفسده سن حیاتیمداسان 

   

6 یانوار 2006 

            قایناق: http://www.sarigelin1.com

ساز چالان

                                    

 

ساز چالان
شريفه جعفري ( دنيز)



چوخداندي كؤنول سن كيمي بير ساز چالان ايستير
قوربانين اولوم چال، اوره‌گيم جان آلان ايستير.

بير دونيا سؤزوم قالدي سينه‌مده توزا باتدي
چال، كؤكلو سازيم جانه گليب دير،چالان ايستير.

بارماقلاروو چك سازيمين سيملرين اوينات
اينجيكلي‌دي، يورقوندو، بو سيملر،سايان ايستير.

اوچماق هوسيم، دار قفسيم، سن دئنه‌نئينيم
غم‌سيز زامانا عشقي كؤكوند‌ن دانان ايستير.

گل باغريمي يارما دئمه كي سن ده گئديرسن
بير توستوله‌نن كؤنلومه باخ اوت سالان ايستير.

 

دولوخسانیر

 

                               

دولوخسانير                            

 

  محرم پريزاد ( سورگون )

 

غصه دويون اولوب پينه باغلايير
قابار اللريمده خال دولوخسانير
نه اوره ك تابلاشير نه درد اودولور
اَييلمز قامتده دال دولوخسانير

گئجه يارسيندا سينه دؤيونور
شادليق آزغين دوشور دؤنرگه دؤنور
شن يانان شاملاردا اوجاغدا سؤنور
قارا دؤوران سورور آل دولوخسانير

تاپدانير ياشاييش زاي اولور امك
قات قاتا دايانير سينه ده ديلك
شيرين آنا ديلده ، دينمه ، نه گره ك !
ديللي دانيشمايير لال دولوخسانير

ككلره لي ديللرده كلمه لر يانير
عشق حقيقتي چوخلاري دانير
شفت ايله آغي ني برابر سانير
قايماق دوداقلاردا ،‌بال دولوخسانير

گؤزه ليم باغ يولون اونوتما آمان
بيزي بير بيريندن آييردي دومان
اينتظار ساخلادي بير ‎آ‎غير زامان
كئچميشي بير يادا سال دولوخسانير

قسمت بئله ايميش يازيلار بئله
سارالار اوچقونوب آخيندي سئله
مئيدا گئنيش ايميش قولدورا ـ گئله
كي بوگون حاليما حال دولوخسانير

اپريميش قوجادير ايكي قات آنا
ديزه تابلاشمايير گومان يوخ جانا
كيمه آرخالانا كيمه دايانا
دئيره م بير دايان قال دولوخسانير

توپراقلار كاميندا ايگيدلر ياتدي
بابكي خايينلار ، دوشماناساتدي
كور اوغلو دؤوراني ، سونونا چاتدي
كؤهلن ديرناق ساليب نال دولوخسانير

 

« سورگون» لر نيسگيلين يازان آغلايير
ساز ، سؤز سيزلايير اوزان آغلايير
بي كسلر قبريني قازان آغلايير
« قبير» ده كؤوره لير سال دولوخسانير

 

ایشچی شاعیر

 

              

ايشچي شاعير

 

سيما صمدي

 

سفره سين آچميشدي ،

                   بير ايشچي شاعير ؛

آجي شعرلرين ،

             ياوان چؤره گه بؤكوب،

                                     شيرين ـ شيرين يئييردي .

بوتون وارليلارين واريندان آرتيق ،

                                چؤره گي نين آراسيندا ،

                                                  هر نه واردي .