| تبليغات | X |
|
شعر چلنگی
|
||
|
تورکجه مدرن دويغوسل وب صايفا |
گئجه لر
اوياق
خيالين باشيمدان كؤچوب گئتمه يير
درديني درديمه قاتير گئجه لر
هيجرانين شوم اوزو گؤزدن ايتمه يير
سونگو تك كؤكسومه بايتر گئجه لر
چوخ آغير سس سيز جه اؤتور دم لريم
تكليگي دويدوقجا آرتير غم لريم
قورومور گؤزومده قانلي نم لريم
سيزيلتيم گؤيلره چاتير گئجه لر
گؤزمون چاييندا يانير آخيشين
خيال دونياسيني به زير ناخيشين
اؤزو ايله آپارير مني باخيشين
بير دنير معنايا آتير گئجه لر
نه يامان يورولور سنسيز چاغلاريم
آجيشير كؤنلومده نيسگيل داغلاريم
سولوب سارالاندا آرزي تاغلاريم
خيالين قوينومدا ياتير گئجه لر
توخانيب كؤكسومه آيريليق اوخو
گلميرسن ، گلمه يير گؤزومه يوخو
هيجرينده اؤتوبدور اومودون چوخو
آزي دا ايتيبن باتير گئجه لر
گوندوزلر سس سيزجه اودورام دردي
سنسيزيم بو عؤمور منه هدر دي
هيجرينده اوياق ين حالي بتردي
گل گولوم ، واريني ساتير گئجه لر
كلمه لر
موغان
ياشايير كلمهلر، اينسانلار كيمي !
ياشادير اؤزويله يارانيشلاري
كلمهلر،
دوغرلور ـ چاغلانير ـ دوغور،
ساغير ـ ساغيلير
ياشايير اينسانلا بيرگه،
ـ بير ته هر !
ـ ميني ، آز
ـ بيري ، چوخ
ـ ميني ، آج
ـ بيري ، توخ
بعضا، كلمه لرده اؤلندن سونرا
ـ ساغيلير اينسان تك !
............ اؤگئي بير قوشا،
ـ اؤزومده حئيرانام بو قورولوشا !
ياشادان كلمه ني اينسانلاردي سه،
اينسانلار قيريلير، كلمهلر اوسته !
( بــيـــز ... )
اوياق
بـيلـمم نيـيه شيـطانـلارقـدرت وئـريـريـك بيــز
اينـساني اَزيـب حـيوانــا قيـمت وئـريـريـك بـيـز
الدن گئـده ن اينسـانليـغا ياس تـوتمـاييـب آممـا
دوزگون گئيينيب اوز ـ گؤزه زينت وئرريـك بـيـز
غيرت ائله قاچقيـن دوشـوب اينسان دامارينـدان
اوز حـاققـيمـيزي آلماغا ، روشوت وئريريك بـيـز
هر درده دوزه ركن دئييريك چاره سي يوخدور
ميـن يـاره ووران ظـاليمـه فرصت وئريريك بـيـز
پـروانـه سـايـاق فيـرلانـيريـق وارلـي باشـينـدا
پـولسوز ـ پاراسـيز مظلـومـا ذلـت وئريريـك بـيـز
خـائـن دولانــيـر ، خـــــادم آديـلـه آرامـيـزدا
مين اَيري لره گؤر نه قـداســت وئريريـك بـيـز
اؤز تورپاغيمـيز وارسـا دا غوربتــده اسـيريك
آواره لـيـــگي طـالـعـــــه نسبـــت وئريريك بـيـز
يانليش خيـاليلــه نه شيريــن اويغــو ايچينــده
ديـلسيــز داواري قــــوردا امـــانـت وئريريك بـيـز
ائل باغچـاميـزين گوللري كـوكـدن قـورومــاقـدا
يـاد گـوللــرينـه گونــده طـراوت وئريريك بـيـز
بير چاره بولاق شانلي حيات تاپماغا خاطير
يئرسيــز ياشــاييـب جانـلارا زحـمت وئريريك بـيـز
آپار
نورانگيز گون
اوره ك سوسور ، دوداق سوسور
نه بير حمير ، نه بير نفس
قيميلدانمايير يارپاقلار
گئجه يالقيزليق لايلاسي دئيير
يوخلايير قوللاريندا مئه نسيمي
خاطيره لريمي يئلله ييره م بئشيگ كيمي
كيمسه يوخموش ، بئشيگ بومبوش
كيمسه سيزليك يئيير ايچيمي
اوره ييم ايكي بؤلونور
هر گون بئله جه ، ياواش ياواش هر شئي اؤلور
آرتيق اللريم ” او موقددس آيريليغين “ اللرينده دير
ال اله وئرميشيك اونونلا
او ، چيچك مندن چوخ آغير
من اونون توشوندا خيلي يونگول گله ره م
چكير مني
اويونو او آپاراجاق
نه فرقيمه ، آرتيق آيريليغا اؤيره نجي يه م
بيز كي چوخدان تانيشيق
ائله اول كي تك رنگي - روف سوپسولوق ...
خوش گلدين سون آيريليق !
آرتيق قورخوم يوخ
حؤكم سنين دير
آپار بير يوللوق !
قايناق : قادينجا
قادين
گل اوتور بوردا بير آزجا دانيشيم سنله
گل اوتور بوردا بير آجا له له ييم سنله
هر يئرده اولورسام اولوم
بويالي دوكانلارين بوياسييام من
هر يئرده اولورسام اولوم
گؤزه ل دييه يَهري باغلاييبلار آرخاما
هر يئرده اولورسام اولوم
اوزه نگي آسلاييبلار يَهريمدن
اولوس - اولوس مني چاپديريبلار
گل اوتور بوردا بير آزجا دانيشيم سنله
بوجاقدا سئوگي ياشاديقيمدا
مني بئله سئوگيمه قوربان وئريبلر
ساتقين اللرده ساتيشا قويوبلار، بئله دويغولاريمي
بوشونا بَله مه گؤزلريمي
دويغولارينا قوربان گئتمه
هر يئرده اولورسان اول
سن ، من ، ...
اونوت!
سید حیدر بیات
اونوت!
دایره دارالیر
یومولور
یوماق کیمی
بیر اویونجاق
یاراماز بیر پیشیک الینده
پیرت
پیرت
پیرتلاشیر
و داها اونون اوجونو کیم تاپاجاق؟
دوشونجهنی دئییرم
حیاتی
و سئوگینی
و سنی
سوندادا واخت اولسا، بیر آز مندن دانیشاق
آز یوخ
چوخ یوخ
بلکه باجاردیغیم قدر
سئوگی سونموشدوم
سن آدلی بیرینه
دوز چورهکدن ده،
داها چوخ سئویردیم سنی
و موناجات ائتدیییم داغلارین باشیندان
***
اونوت!
دایره دارالیر
یومولور
یوماق کیمی
بیر اویونجاق
یاراماز بیر پیشیک الینده
پیرت
پیرت
پیرتلاشیر
و داها اونون اوجونو کیم تاپاجاق؟
آز یوخ
چوخ یوخ
بلکه باجاردیغیم قدر
اونودورام سنی
و سن باجاردیغین قدر
اونودولماییرسان
بو سیزیئف یالچینی تک
ابدی بیر اویون
قوم – قیش 85
قانلي سالام
اوياق
نه يازيق كي اؤزگورلوك آغاجي قانلا سوواريلير .
بو گون دار آغاجی آسيليب و قیزیل قانلار آزادليق آغاجين سووارماغا آخير . حسرتلر سینه ده قویلانیب ، آرزیلار اؤکسوز اولاراق ، اؤزلرين ايتيرنلرين اعتراض دوداقلاری یالتاقلیغا آچیلیر- یومولور؛ ظولم داغین ییخان یومروقلار دوست باشینا چیرپیلیر ، قارا باسمیش شهرین اوره یی اضطرابلا چیرپینیر ، آینالارین توزو سيلينيب دوست دوشمندن آييرد اولونماقدادير ، آلدانیب آلدادمالارين دوزلوگه قالیب گلمه سي دووراني كؤچه مه ده دير ، اؤزگورلویه هاوار دورانلارين سايي آرتيقلانمادادير ، یئنه کوهنه حامام کوهنه طاس اوز گوسترسه ده ، یئنه کافتار ایله توکولره میدان وئریلسه ده ، بیلیک و محبت اولکه سی کینه آتلارینین دیرناغی آلتیندا قالسادا ، دردلر درمانسیز ، سورغولار جوابسیز و قولاقلارین کارلیغیندان و اورکلرین داشلیغیندان آنالایان لار اینجیک چكيب ِ دردیمیز آغیر داش کیمی چیینیمیزي يورسادا ، بئله بیر دورومدا بیزی یاشادان صاباحلارین عشقیدیر و یالنیز بیر اود دئییل کی بیزیم آرامیزدا یانیر ساده بیر یاشاییش و درین عشقیدیر و بو آزادليقا اولان یاشاییشدیر بیزیمله آددیملاییب الیمیزی گونشه چاتدیراجاق .
سازيم گئتدي
نادير پاشا
سازيم گئتدي
قارا اللر سينديرديلار
اونـو موغــان دوزلــرينده
سيـرلي سؤزلو تاختالاري
كوله دؤندو
ابليس قوران اوجاغلارين كؤزلـرينده
سازيم گئتدي
طراوتدَن يازيم گئتدي
پرده لـَنميش گيزلي گيزلي رازيم گئتدي
... ..يادي قالدي.....
گئجه لري سحره دَك، ايچين ايچين دردله شرديك
كدر جانا گوج سالاندا
بيرله شرديك
ائل غميند ن سؤز آچارديق
محبتين اوج بوجاقسيز عالمينده،گؤز اچارديق
اود تؤكردي كدريمه تئللريندن
سو سه پردي آلازلانيب ياناندا من
دو بيتي له
« اؤره ييمده مين درديم وار
بير آشكارا دئيَنميره م
منيم ايشيم حاققيناندير
ظولمكارا دئيَنميره م»1
سؤيله يرديك
بابك ايله، كوراوغلويلا
اوزون اوزون جيغيرلاردا بير گئده رديك
ديلغـم ايــله
حقيقتده ن سؤز آچارديق
ا َن قارانليق گئجه لرده نور ساچارديق
ايندي داها
هر بير ياندان كدر ياغير
گئجه لريم ، گئجه لرله
دويون دوشور آغير آغير
گؤز اؤنونده دوران آشار داشاردا
اؤز رنگين آتميش
سانكي عالم غمه باتميش
سازيم گئتدي
قارا اللر سينديرديــلار
اونــو موغـــان دوزلرينده
سيـرلي سؤزلو تاختالاري
كوله دؤندو
ابليس قوران اوجاغلارين كؤزلـرينده
ـــــــــــــــــــــــــــــــــــــــ
1- موكاييل آزافلي
بولاق
اویاق
بير بولودلو آخشام چاغي يا گونش چيخماميش بير سحر ، دينج خلوت چولون آراسيندا ، قايالار اوسته اوتوروب ساحاتلار بير بولاغين غريبلي یينه گؤز تيكمك اولار . ساحتلار ، گونلر و هفتهلر بولاقدان دانيشيب يازماق اولار . بولاقدان نه قدر دانيشسان آزدير .
بولاغين آخار سويونا داليرسان سسسيزجه سني اؤزونه چكير اونونلا گئديرسن ، داها قاييتماق ايستهميرسن ، اونون آخارليغيندا ايچ دردلريني يويوب اؤزوندن آييريرسان ،سايداملاشيب دينجيليك دويورسان .
بولاغين هئچ نهيي يوخدور ،نه باغي وار نه سارايي و نه نئچه قات بؤيوك تيكينتيسي . اونون گؤز قاميشديران قصري ده يوخدور . بولاغين اوشاغيدا يوخدور بئله اصلن ائوي ده يوخدور . اَيهر بولاغين ائوي ايلك دؤنه ديشارييا چيخديغي يئردير ، نه دن بس يولا دوشوب اورادا قالمير . دئمك اورا اونون ائويديرسه نه دن اورا اورهك باغلاييجي حالي يوخدور . ايهر بولاغين باغي او سودان دويوزدوردوغو باغدير ، نه دن اوراني بوشلاييب بير آن دايانمادان اؤتوب گئدير .
او آخديقجا اؤز وارليغيندان چئورهسينده اولانلارا ياشاييش پايلايير ، طبيعته شورلا شعور بخش ائدير ، اورهك اوخشايان نغمهلري ايله هرزادي مست ائديب ديريليك موشتولوغو وئرير.
ايهر بولاغين ساراي لا قصري اؤز وارليغي ايله اونلارا گؤز هلليك باغيشلايان حووضلاري اولان كاخلاردير ، نييه اورادا قالمير ، بوياقلي كاشيلار و بولور ديوارلارلا اونا زور ائديب ساخلاياندا ، اوره يي سينيب طراوتين الدن وئريب كدرلهنهرك اييلنير و قصرله كاخين هاواسين پيس قوخو ايله دولدور.
بولاغين هئچ نهيي يوخدور ، اينانين حتا بوياغي دا يوخدور ، هئچ زادا يييه دورماز ،بونونلا بئله بوتون گوللر بوياقلارين اونا بورجلودورلار . بولاغين اييي يوخدور ، آمما بوتون گوللر اؤز عطرين اونا بورجلودورلار . بئله دئييلسه اَيهر بير گون اونلارا سو چاتماسا اؤز بوياق ،عطير و طراوتلرين الدن وئريب كدرلي حالدا بويونلارين چييينلرينده بير بوجاقدا سوسوب قالارلار . بولاغين بؤيوك بوغدا آنباري يوخدور ،آنجاق بوسبوتون بوغدا تارلالاري گؤزهلليك و دهيرلرين اوندان آليبلار .
گؤرونور كي بولاغين هئچ نهيي يوخدور ، حتا اؤزونه اؤزهل بير حياتيدا يوخدور آنجاق ياشاييشين طراوتي اونا باغلي دير . بولاق نه گؤزهل سسسيز و ايديعاسيز باغشلايا بيلير .
سورغو
زهرا نظرنژاد «داملا»
يالان دانيشسان
تانري اَتيني شيشه تاخار !
اوغرولوق ائتسن
تانري اَتيني شيشه تاخار !
عوصيان ائتسن
تانري اَتيني شيشه تاخار !
يوخسا تانري
بير منيم اَتيمين آجيمييدي ؟
كي ايندي ايستهمهدن عوصيانا چاتيرام .
شعر دئييل بونلار
زوققولتو ماهنيسيدير آغرييلاريمين .
دينله گوجون وارسا
من بؤيله ياشاميشام آنا !
اونوت دئدييين
ياشاماديغيم آرزولارا نيسگيللنمهميشم
و ياشاميمي ايتيرميشم
ايتگين اورهييمين واراقلارينين اورتاسيندا
من بؤيله ياشاميشام آنا !
دوداقلارينين بيتمز هوسيندن
اييرندييم دونيايا اؤپوش اؤيرتميشم
بؤيله ياشاميشام آنا !
بير تيكه چؤرهيه مين تندير قابار ...
دء بونلارين حسابيني كيمه سوروم ؟
من كيمين اَتيني شيشه تاخا بيلهرم ؟
كيميني ساللاغا چكهبيلهرم ؟
هلهليك
اؤزوم ـ اؤزومه داراشميشام
من
ان ويجدانليسي
اؤنجه اؤزومه داراشميشام
و سونرا
سونراسيدا سنده آنا
آنا !
آمان دير
ديرناقلاريني چئينهمه
بير گئجهليك چؤرهييم آز گلر بيردن
و ساساديغيم زامان
شاه داماريني دوداقلاريما باغيشلا سن
آنا لوطفن ...
من بونلارين حسابيني كيمه سوروم ؟
تانرينين ديلي يوخ ،
يالنيز سس سيز بير كؤتك آغاجي وار
دونيا ايسه ويجدانسيز بير قضاوتچي
من بونلارين حسابيني كيمه سوروم ؟
|
