| تبليغات | X |
|
شعر چلنگی
|
||
|
تورکجه مدرن دويغوسل وب صايفا |
بو ايل باهارينين سون گونلرينده چاغداش اولدوزو ؛ گنج شاعير( ائلناز خانيم نستوه ) آجيناجاقلي گئديشيله اوز دونياسين ده ييشدي ؛ روحو شاد ، اثرلري اولمز اولسون .
خاطيرين عزيز ساخلاماق اوچون ، بير شعرين اوخوياق :
توخونمادي سئوگي ميز
ديله ييميز, ياريمچي ليق اوره ييميز
او سحر
دئپرم يووانين باشيندا توتساق
قاپي ني آچمامالييديق
بير بارداق سو بئله 000
هئي,
داغيلدي توخودوقلاريميز
ديله ييميز
ياريمچي ليق اوره ييميز
داغيلدي سئوگي ميز
بو گون,
ال اله توتوشوركن
يالانجي دويغولارا پاي اولدوق
گل!
آياق لاريمين ايزي ايله گل.
اورايا
هئپ ايسينديغيم يئره
ياني اوره ييمه
ديله ييمه
دويغولاريما
گل!
ايسينديغيم يئره گل!
اوخو مني
اوياق
اوزاقلاردان اوتمه بؤيله !
آراميزدا
آيريلغين يارالاري درينله شير
اوستوموزه آغير حسرت سازاقلاري اسه – اسه
صاباحيميز سرينله شير
اوتوب كئچه ن گوندن بري سايماز يانا ؛
گوزلريمي آدديمينين ايزي ايچره
يايديم يئره
بلكه بير آن قاييداسان
حسرتينده ن اويوم – اويوم ،
اويولدوم كي ؛
گوزلريني كال دويغودان آييلداسان
اوخو مني ؛
اوخو گولوم !
سوزلريمين گوي قورشاغي
سوسله يه جك گوزلرينين
گوزه ل گزه ر ماوي گويون .
چيلپاق فيكير
پايئز يئللي اَيري اَللر
شَن روحومون
ياشيلليغين
طراوتين
بار بوداغين
ـ قارانليقدا اوغورلوغا گئدنلر تك ـ
سيل ـ سوپور ائتمهسين دييه
اورهييمله بورويورَم
وارليغيملا قورويورام .
گل !!!!
حميده رئيس زاده (سحر)
حسرت ياش اولوب گوزلره دولماقدادي ؛ داي گل !
گوز ياشلاري آخماقدا سئل اولماقدادي ؛ داي گل !
هجران تورو دونياني قفس تك بورويوبدور
دونيا كيمي باغريم دا دارالماقدادي ؛ داي گل
سال داغلارا هاي ، گويده بولودلار ديله گلسين
يارپاق كيمي وارليق بويو سولماقدادي ؛ داي گل !
هجرينده كئچن لحظه لري يانقيلي ساز تك
غم پنجه سي ، آه زخمه سي ، چالماقدادي ؛ داي گل !
سنسيزليگه دوزمك نه ساياق ممكن اولارميش
دوزودوم ، دوزوموم جانيم آلماقدادي ؛ داي گل !
گل قوي گونشين بايدا سي دونيايه جالانسين
باغريمدا قارانليق ايزي قالماقدادي ؛ داي گل !
ياتماز ، يولونو گوزلريم اولدوز كيمي گوزلر
گوزلر كوكو ، حسرتله سارالماقدادي ؛داي گل !
هر گون " سحر" آدديملارينين ماهني سين ايزلر
آچميش سحرين باغري قارالماقدادي ؛ داي گل !
|
