|
شعر چلنگی
|
||
|
تورکجه مدرن دويغوسل وب صايفا |
بایرامین موبارک آتا جان!
پری (ساری گلین )
سلاملار آتا جان!
بو 3- جو باهاردیر کی سنسیز قارشیلییاجاغام. بو 3- جو بایرامدیر کی یئنه سن یانیمدا اولمادان، سانکی بایراممیش کیمی قبول ائتمیه مجبور اولاجاغام! آتا جان، سنسیز باهاردا بئله سویوق کولکلر اسیر پنجرمده... هارداسان؟؟...
آتا جان، یئنه نووروز گلیب چاتدی و یئنه آنام هر ایل کیمی بایرام تلاشیندادیر. یئنه بایرام سوفره سینی، ائویمیزین هر طرفینی نئجه ده گؤزل حاظیرلاییبدیر بیر بیلسن...
آتا جان، آنام دئییر باهار گلنده قیشدان قالان سویوغو، قاری، آغیرلیغی و تنبللیگی سیلیب آپارار، یئرینی گونشلی گونلر، آیلی گئجه لرله دولدورار، ائله اینسان دا گرهک باهارین گلیشییله ائوینده و اوریینده یوک سالمیش سویوغو، توز- دومانی یویوب، تمیزله ییب آیدینلاشدیرماغا چالیشا، اوریینده سئوگی فیدانی اکه، محببت چیچه یینی بسلیه و اطرافینا عطیرلی تبسسوملر ارمغان ائدیب، دوستلوق پایی بخش ائده و ... آتا جان، من ده باهاریما چاتماق اوچون نه لر ائتمزدیم کی... اللریمله قارلاری کورویوب، نفسلریمله جان وئرردیم بوز باغلامیش باغچاما!. آتا جان، سنسیزلیک شاختا بوران کیمی دوندوروب روحومو... آه بیر دؤنه بیلسن، کاشکی دؤنه بیلسن!!!... گئری گتیرسن مهریبان سسینله باهاریمی، یازیمی...
آتا جان... آنامین بوتون حاظیرلیقلارینا و چکدییی اذییتلره راغمن، یئنه ده ائویمیزده، بایرام شنلیگیمیزده بؤیوک بیر اسکیییمیز اولاجاقدیر. بونو هم من و هم آنام جوخ یاخشی بیلیریک. وهم بونو دا بیلیریک کی او بوشلوغون یئرینی هئچ کیمسه دولدورا بیلمیه جکدیر. آتا جان، ائویمیزده ایندی تک اسکیییمیز، ان بؤیوک ائحتییاجیمیز سنسن، سن. سن اولمایینجا آنامین او چوخ اؤزنله حاظیرلادیغی بایرام سوفره سی یئنه ده هئچ گؤزل اولمایاجاق بیلیرم. ایل تزلندییی زامان او سوفره نین ان باش گوشه سینده سن اوتورمایینجا هر شئی یئنه سولغون، یئنه سوسقون و غملی گؤرونه جک بیلیرم. دوداقلاریمیز گولسه ده، کؤنلوموز هئچ گولمیه جک بیلیرم. چیراغلار نه قدر هر طرفده یانسادا، نه ائویمیز ایشیقلاناجاق نه گؤزوموزون نورو اولاجاق بیلیرم. سنین سسین ائویمیزده گلمه یینجه، خوش نغملی بولبول بئله غمنامه اوخویاجاق بیلیرم.
آنام و من 3 ایلدیر کی بو آجینی توم درینلیگی ایله اورییمیزده، جانیمیزدا حیسس ائدیب، داشیییریق.و آنام، منیم بو مهریبان آنام، من اوزولمه ییم دییه هئچ واخت آجیلارینی بیر دفه بئله اولسون دیله گتیرمه ییبدیر آتا جان. آمما من، نئجه آجیلار چکدییینی اونون حوزون دولو گؤزلریندن، غملی باخیشلاریندان چوخ یاخشی آنلاییرام.
آتا جان، آنام چوخ صبیرلی دیر بیلیرسن. آمما ایکی گون اونجه ایلین سون چرشنبه سینده، مطبخده یئمک حاظیرلارکن (سنین ان سئودییین یئمیی) یئنه اونو آغلارکن گؤردوم...منی گؤرونجه یئنه تئز اوزونو چئویریب، گیزلیجه گؤزیاشلارینی سیل مه یه چالیشدی...اتا جان، آنام سنی چوخ اؤزلمیش، بونو سن ده بیلیرسن، بیلیرم.
آتا جان، بایرام هدییه نی آلیب، اوتاغینا قویموشام. بیلیرسن کی ایلده 3 دفه سنه هدییه آلارام. آتالار گونو، سنین آد گونونده و بیر ده بایرامدا، سن گئتدیییندن بری بو 9- جو هدییندیر کی آلیرام، آمما سن هئچ پاکئتینی بئله آچمیرسان!. آتا جان بو دفه سنین اوچون، سنین سئودییین رنگده بیر کؤینک آلمیشام. آه... آتا جان بیلیرم گئیسیدین سنه جوخ یاراشاجاقدی، آخی گؤزلرین کیمی ماویدیر رنگی...
آتا جان... کئچن بایرام یوخوما گلدین و مندن سنه آلدیغیم هدییه لری خسته خانالاردا یاتان، کیمسه سیز بلکه ده ائولادلاری طرفیندن اونوتولموش آتالارا!! هدییه ائتمگیمی ایسته دین. آتا جانیم، بیلیرسن کی سن نه دئسن من سؤزوندن هئچ چیخمارام. سنین ایسته دییین کیمی ائتدیم و آلدیقلاریمین هر بیرینی هارداکی گؤزو یولدا بیر آتا گؤردوم سئوه سئوه هدییه ائتدیم. آتا جان... کاشکی اونلارین گؤزلریندکی سئوینجی، هدییه لرینی وئردی ییم زامان سن ده گؤره بیلسه یدین. آخی او محببت دولو گؤزلر، او مهریبان اللر نئجه ترک ائدیله بیلرکی؟!... بیر ائولاد اؤز دوغما آتاسینی، آناسینی نئجه اونودا بیلر کی؟!!
آتا جان، بیلیرسن می... من هر دفه اونلاری زییارته گئدنده، سنین شیرین گولوشونو، سئوگی دولو باخیشلارینی و ایستی اللری نین شفقتینی 10-لارجا آتانین تبسسومونده، گؤزونده و اللرینده گؤرورم!.
آتا جان... سنه جوخ تشککور ائدیرم. او زامان کی یانیمدایدین همیشه منه اینسانلیق و حیات درسی وئرردین، ایندی ده کی مندن چوخ اوزاقلارداسان، بلکه روحون گؤک اوزوندن هر زامان منی سئیر ائدیر، ایندی ده منیم رؤیالاریما گلیب یئنه ده منه حیات درسی و مهریبانلیق اؤیردیرسن. آتا جان سنه عؤمور بویو میننتدارام، میننتدار قالاجاغام، هر زامان آرخامدا، یانیمدا اولدوغون اوچون...
آتا جان... سنه بیر سؤز وئرمیشدیم، "آنامی هئچ بیر زامان و یاشادیغیم سوره آصلا یالنیز بیراخمییاجاغام"... امین اول کی سؤزومو توتموشام و توتاجاغام.
آتا جان، مزاریندا راحات یات...گئتدییین یئردئ موتلو اول!... روحون شاد اولسون!. بیزه گؤره هئچ قایقیلانما. بیزیم اوچون ائله راحات بیر یاشام ساخلامیشسان کی عؤمروموزون سونونا قدر هئچ اکسیییمیز اولمادان یاشییا بیلریک... باخ، گؤر... سن بئله بیر آتاسان. میننئتداریق سنه آتا جان...
آتا جان... بایرامین موبارک اولسون!. بایرامین ایلک گونو، ایلک ساعاتی، آنام و من سنی زییارت ائتمیه گله جه ییک. سنه جوخ سئودییین بایرام چیچه یی و سونبول گولو گتیره جگم، سؤز...
ساغلیقلا قال منیم عزیز آتام!. نه اولار بو گئجه یئنه یوخوما گل!. آخی سنی قوجاقلاماغی، بوینونا ساریلماغی، دویا دویا اوپمه یی ائله چوووخ اؤزلمیشم کی آتا جان!... نه اولار گل... یوخوما گل...
16 مارس 2006
یاشیل باخیشلارینیزی گوزله ییرلر:
|