| تبليغات | X |
|
شعر چلنگی
|
||
|
تورکجه مدرن دويغوسل وب صايفا |
موغان
چئينك عؤمور ، اؤزومون دؤردن بيري
يازسيز - يايسيز ، گؤزومون دؤردن بيري
چئيرك عؤمور - سئيرك حيات ، بيزده دير
اود يوردوندا ، اورمودا - تبريزده دير
يازيق جانيم ، هاميسي ائوميزده دير
باشدا اوچان ، توزومون دؤرددن بيري
دؤرد عونصردن تشكيل تاپيرسا اينسان
اود گوج سالير ناسيل بيزده هر زامان
اوره ك يانير ، آلازلانير آهدا ، جان
گؤزدن آخان كؤزومون دؤردن بيري
بيزده ياشام ، اوزو قارا بير كؤمور
ياز - ياز دييه قيليشلي قيشدا گؤمور
اوزدن - گؤزدن اولموش اؤلومجول عؤمور
سينيق ، سالخاق ، لوزومون دؤرددن بيري
سايمازيانا باخما منه كئچري
گؤزلريني قايتار بير آز ايچري
نه قده رده باخيش اولسا كؤچري
سنده قالير گؤزومون دؤرددن بيري
هر آغارتي سانما گؤزه جيغال دير
گؤز اؤنونده دوغرولانلار دوغال دير
سونوچلانان سوروم - سورغو كامال دير
هر بير يازيم ، پوزومون دؤرددن بيري
گيزلي - گيزلي ، گيزيلتيده ، كوره ييم
اوغرون - اوغرون ، آلقاسايير ، اوره ييم
گؤزدن دوشور ، ديلدن دوشمور ديله ييم
هر بير جوزوو ، جوزومون دؤرددن بيري
سؤزلريمي يانيتلايا ، كيم سورا ؟
كيملر ياريب ايچ ائيله يه ؟ كيم يورا ؟
اوچ پاييني تاپشيرسامدا ، سانسورا
سنه چاتير سؤزومون دؤرددن بيري
آلت - اوست اولموش بيزده ياشام اساسي
قلمديرسه شئعر الينين عصاسي
هر سؤز يازير دؤنور اولور سيياسي
يئرده قالان ، دؤزومون دؤرددن بيري
-----------------------------
آچيقلاما :
گوز : پاييز
آغارتي : سراب
سئيرك : هاندا بير ، آددا – بوددا
آلاز : شويله
گؤممه : باسديرما
آلقاساماق : آغري لا بيرگه توكولمك
يورماق : تعبير و تفسير ائتمك
منيم اوره ييم
ساري گلين ( پري )
اوره ك وار داملايا ، اوره ك وار عوممانا بنزه ر .
منيم اوره ييم نه داملا دير نه عوممان ،
چاغلايان ، جوشان شلاله يه بنزه ر .
***
اوره ك وار داشلار كيمي ، اوره ك وار موما بنزه ر .
منيم اوره ييم نه سرت بير داش نه اريين موم ،
باغريندا جئيران بسله ين داغلارا بنزه ر.
***
اوره ك وار صحرايا ، اوره ك وار باغا بنزه ر .
منيم اوره ييم صحرا دئييل ، باغ دئييل ،
آمما عطيرلي باغچايا بنزه ر .
***
اوره ك وار آغلار بولود ، اوره ك گولن گونشه بنزه ر.
منيم اوره ييم بولود يوخ ، گونش يوخ ،
گوزو ياشلي دوداغيندا تبسوم نرگيزه بنزه ر .
***
اوره ك وار تيكان بوداغي ، اوره ك وار قرنفيله بنزه ر.
منيم اوره ييم تيكان بوداغي دئييل ، سئوگي قرنفيلي يوخ ،
ازلدن عاشق اولان لاله يه بنزه ر.
***
اورهك وار بيگانه بير نوت،اورهك وار تانينميش ترانهيه بنزهر
منيم اوره ييم نه بيگانه نوت ، نه ديللرده اولان ترانه ،
حزين سسلي سينميش بير تارا بنزه ر .
***
اوره ك وار قيفيلي بير اوتاق ، اوره ك وار آچيق سارايا بنزهر.
منيم اوره ييم نه قيفيلي اوتاق ، نه آچيق ساراي ،
محبت اوچون چيرپينان ايستي يووايا بنزه ر .
اوچ شعر
سيامك حسينعليزاده ( ارگين )
قارشيلا
دئدين مني قارشيلا،
گله جه يم ؛
ايندي ده هرگون
آياغي نين سسيني داها
ابدي اولاراق
دويمايان
يوللاري قارشيلاييرام .
سئومك
سئويلمه يي
دوشونمه
سئومه يي
اؤيره ن
....
سئل
دنيز بؤلونورسه
بير نئچه چايا چئوريلر .
چايدا بؤلونورسه
بير نئچه آرخا
آرخين سويودا
سيزار ، گئده ر تورپاغا
بولونن دنيزدن
داها قالماز بير ايز
آمما داملا ـ داملا
بيريكن سولار
گؤل اولار.
گؤللر دولار
انگل بيلمز
سئل اولار .
دوكتور سيد محمد حسين مبين (شيمشك ) ، محتشم تبريز شهري نين گؤركملي شاعيرلريندن دير . دوكتور مبين ، حكيم دير و ايللردير تبريزده ظبابت له چاليشير . او ايللردير بابا باغيندا يئرلشن جذامي لر مركزينده ، فخرله بو اينسانلارا خدمت ائدير . اونو جذامي لرين آتاسي آدي ايله آدلانديرييلار . اوشا اولدوغوموز زامانلار ، ابتدايي درسليك كيتابلاريندا دوكتور آلبرت شوايتزر آدلي بير حكيم ايله تانيش اولوردوق . دوكتور آلبرت شوايتزر ، اؤزو آوروپالي اولاركن ، اوزون ايللر آفريقادا قارا دريلي اينسانلارا اوره كدن خديمت ائتميشدير . شوايتزرين آدي درسيلك كيتابلارينا سالينيرسادا ، اؤز شهريميزده حكيمليك امكانلاريندان ال اوزوب ، جذامي لرله ياشاييب ، اونلارين يارالارينا و دردلرينه مرهم قويان دوكتور مبين ، تاسفله هله ده لازيمي قدر بوتون تبريزليلره تانيش ده ييلدير و اونو تكجه حكيم دوستلاري ، هم ده آذربايجان شعر و ادبياتينا مازاق گؤسترنلر تانير لار . دوكتور مبين شعرده شميشك تخلص ائدير و اوندان گؤزه ل ـ گؤزه ل شعرلر و منظومه لر ،او جومله دن « جذاملي سارا » ادبياتيميزا ياديگار قالميشدير . تبريزين قوجامان شاعيري حؤرمتلي كريم مشروطه چي( سؤنمز) جنابلاري شيمشك ي عزيزلمك اوچون اونون تجليل توره نينه منظوم بير مكتوب يازيب كي يئري گلميش كن بورادا او گؤزه ل مكتوبو بيرليكده اوخويوروق . هر ايكي قوجامان شاعيرلريميزه اوزون عؤمور و اوغورلو گونلر آرزيلاييرام
***
قارداشيم جان جيگريم ، سئوگيلي « شيمشك » :
ايييد اينسانلارا اؤرنك !
دئديلر : ائل بو گلن هفته ده گون خوشلاياجاقدير ،
تزه دستانيني ،اول ، سن ايله باشلاياجاقدير ،
توپلاشاركن سني آلقيشاياجاقدير .
***
سن كي ،عؤمرون بويو خالق ايچره عزيزدين و عزيزسن ،
يويدا ،داغلارجا اوجالسان دا ، درينليكده دنيزسن ،
سن ايگيت ليكده ، كوراوغلو يلا اكيزسن ،
نيتي ، فيكري تميزسن .
***
سن ، او شيمشك كي ، قوراقليقدا افقلرده چاخارسان
وئره رك خالقا ياغيش مژذه سي ، سونسوز دا آخارسان
تشنه تورپاقلارا رحمتله ،سخاوتله باخارسان .
***
چاققيشاندا قرانيت قلپه لري ، سن دوغولارسان ،
قور اولوب داشلاناراق ، ائللره الهام دا وئررسن،
ايشيق عاشيقلري نين اللرينه شام دا وئرسن ،
اونلارين هر بيري اؤز شانينجه سندن پاي آلارلار،
سنه اولدوز وئره لر ، وجهينه سندن آي آلارلار.
***
گؤرمه ديم بير كسي كي ، سن قدر آلچاق گؤيول اوسون
بهره لي ـ بارلي آغاج تك ،
داللاري خالقا باش اگسين
ظاهري ساده اولاركن ،
معرفتله ايچي دولسون .
***
حقه دوغرو جغير آچدين بو فاغير خالق اوره ييندن،
خالقدان خاليقه چاتدين !
« خالقيميز ، حقه قووشان » ـ دئدين اولماز ، بو محالدي ،
كيمسه ده هر نه دئسه ، سوزودو بو صحبتدي بو ، قالدي .
***
سن ، او شيمشك كي ،بشر ، ايلك ايشغي اوندان آلارميش ،
چاخماسايدي ، گئجه وقتي ،بشر اؤولادي قارانليقدا قالارميش ،
شاختادان قيشدا دونارميش ،
***
ايشيغين اود ـ آلووون قايناغي شيمشكدي ـدئييبلر ،
اودي « شيمشك »كيمي لر ، آزدي ، و يا تك دي ـ دئييبلر ،
دوغرو اينسانليغا اؤرنك دي ـ دئييبلر .
***
من ، اوركدن بو سؤزه سس وئريرم ، گئت اوغور اولسون !
قوي بو سسلر قوووشوب داغلارا دوشسون ،
سسلرين عكس صداسي ،هامي سرحدلري آشسين ،
گونو ـ گوندن ده گور اولسون .
***
سنه «شيمشك » دئديلر كي ، چاخاراق قور سالانارسان ،
خالقيمين نيسگيلينه ،درديني دايم دوشو نرسن ،
دوشونركن ده يانارسان .
***
سن جذامي لر اوچون هم آتاسان ، هم ده حكيم سن ،
چوخلو بيلمز بونو كيمسن ،
مگر اونلار كي ، سنينله آغير ايللرده تانيشدي ،
يوكسك آماله قوووشسون دئيه رك سنله ياريشدي ،
ايشيغا دوغرو ، قارانليقلا ووروشدو .
***
سني ، احساسلي قلم صاحيبي تك وصفه چاليشديم ،
قلميندن چاخان آتشلره من يانديم ، آليشديم ،
سن ، « جذاملي سارا » ني ،
اونلار برابر ياشاياركن ، ياراديبسان ،
ياراداركن ده يانيبسان ،
سارانين درديني ، منجه ، سارادان ياخشي قانيبسان.
***
سن او دستاني يازاندا ، نييه اود توتمادي دفتر ؟
نييه سارسيلمادي اوستونده قلم گزديرن اللر ؟
سوز كي ، حقدن مايالاندي ، بئله جه روحلارا ايشلر ،
دونيادا ائلجه بيلنلر ، هاميسي بؤيله دئميشلر .
***
سني « آلبرت » ايله تمثيله ده منطق گوجو چاتماز ،
اودا آفريقادا ، سن تك ، قارا خالقين داياغي ايميش ،
گوندوز ايشلر ، گئجه ياتماز .
نئچه ميليون اويويان گؤزلرين آنجاق اوياغي ايميش ،
اودا اينسانليغا لايق كيتابين بير واراغي ايميش ،
چوخونون سيغناجاغي ايميش .
***
حيف اولا ،ايندي اليم چاتميري توتسون اتگيندن ،
هر زامان تبريزه دؤندوم ،ايشيق آلديم اوره گيندن .
فايدالانديم اؤيودوندن ،
دويماديم دوز ـ چؤرگيندن .
***
آتاميزدان بيزه ده آنديرا قالميشدي بو دوستلوق ،
سو ايچيب ، گؤز ياشيميزدان دا اوجالميشدي بو دوستلوق ،
بيز ايلن بيرگه قوجالميشدي بو دوستلوق ،
«كهنه دوستلوق » دئيه ، بيزدن ده باج آلميشدي بو دوستلوق ،
***
سني « اينسانليغا اؤرنك » سايان ائل ،هئچ ده يانيلماز
كيم محبتله ياشار ، ائل طرفيندن او ،دانيلماز خالق ايچينده ،
قورو ـ بوش سؤزله ، اؤلومسوز ، گؤزه ل آدلار قازانيلماز .
ائلين ايدراكينا آلقيش !
سو سؤزو ،ائل دئير آنجاق ،
او وئرن قيمته « تاريخ » ده دئييبلر .
او داكي ، سهل سانيلماز .
***
سو او سيمرغسان ، اي قارتال اوچوشلوم !
توتسالار آتشه هاردا يئله گين ، اوردا حاضيرسان ،
هر كلك قورسا دا شيطان ، اونو شيمشكله پوزورسان ،
شيطانا گور دا قازيرسان .
بهره لي ـ بارلي ، گوزه ل عؤمرونو تاريخه يازيرسان .
***
يوخسولا نسخه يازاركن ، اونا درمان دا وئررسن،
خالقيميز ايسته سه ، اوغروندا اونون جان دا وئررسن ،
وطن آزادليغي ايجاب ائله سه ، قان دا وئررسن ،
او شيرين جانيني قوريان دا وئررسن.
***
سانما كي من سني تبريك ائديرم چوخ دا اوزاقدان ،
سني باغريمدا دوياركن ،
اؤز ـ اؤزومله دانيشيرميش كيمي يم سنله باياقدان .
سئوگي سيزلر بونو ايدارك ائله مز باخسا قيراقدان .
سئوگي گئرچكده ، زامانسيزدي ،مكانسيزدي ازلدن ،
او ، كيمين قلبينه سينسه ،
او ، كيمين روحونا هوپسا ،
اونو قاوسان دا اوجاقدان ،
گله جك باشقا بوجاقدان .
***
كاش او شفقتله باخان گؤزلري نين جووجولرينده ـ
بيرجه تئل كيرپيك اولايديم .
گؤز قاشين كؤلگه سالايدي باشيما جانلي چينار تك ،
سايه سينده دوشونه يديم ،داشينايديم ،
احتراصدان بوشاليب ، بلكه محبتله دولايديم ،
سنه من قوربان اولايديم !
**********
|
