| تبليغات | X |
|
شعر چلنگی
|
||
|
تورکجه مدرن دويغوسل وب صايفا |
سئوگي آبيده سي
رقيه صفري
گؤزلريمدن چكيلديكجه ؛
حسرتين اوره ييمه داميردي ،
دامجي - دامجي .
و اؤلوم ماهنيسي چالدي ديزلريمه .
گئده نده چانتاندا گؤتوردون ؛
سئودالي روحومو .
و منده قالان
- يول بويو اوزانان كؤلگم -
يئييليردي ديليم _ ديليم .
و بير تك قالاجاق
قوروموش آغاجا بنزه يندير
شيديرغي ياغيش آلتيندا
بوينو بؤكوك گؤرونوردو
بومنيم ايديم ؛
هئچ يئرده يونولماميش ،
سئوگي آبيده سي !
*******
دويغو
رقيه صفري
دويغولاريم كؤرپه كپنك
قاناد چالير
حياتيمين خزان وورموش باغچاسيندا
پاييزين كوله يينده
آل – الوانلي قانادلاري
ناخيش سالير
قيزاريلميش يارپاقلارين اوزه رينده
قانادسيز دويغولار
كؤرپه كپنك
باسديرير خزانا
آمانسيز كولك .
سني من ياراتديم
دكتر حسن صفري
سن
آلاهين
يئددي قات گؤيوندن دوشن
آي پارچاسي
و ياراتديغي
خياللار مله يي ده دئييلدين .
ميليونلارجا
باخماديغيم
اينسانلارين بيري كيمي
بير اينساندير
آدي اينسان .
سني من ياراتديم
دويغولاريملا
روحومون
دوپ ـ دوغما بالاسي كيمي
اصلينده دوشمنيم
قاتي دوشمنيم
سني من ياراتديم
دويغولاريملا
اؤزومون دويدوغوم
ملهييم كيمي .
|
