| تبليغات | X |
|
شعر چلنگی
|
||
|
تورکجه مدرن دويغوسل وب صايفا |
كند شاعيري
عشوه لي آي
خومار گؤزلو بير قيزا تاي
نازلانيردي بير گئجه نين گرده يينده
ده لي سوولو ياز هوه سلي بوز بولودلار
اوردو ـ اوردو ، ايديريملي قيهالارلا
دؤرد بير نالا چاپيرديلار
بو دورومدا
بوسات قوروموش كند شاعيري اؤز ايچينده
خياللاري بير بيچيمده
اونا؛
« دورو گؤز ياشي تك ، آجي آنجاق سرخوش ائدن »۱
حال وئرر كن
سوي بزكلي سؤز باغينين
كرديسيني آلاخليردي
دوداقيندان شئعرين گولو بوي آتمادا؛
اوخويوردو:
«صاباح گلسه بيچيم واختي
كنديميزين تايالاري
نغمه ايله قالاناجاق
بركتين آل شرابي
عؤمورلره جالاناق»
(اوياق)
ــــــــــــــــــــــــــــــــــــــــــــــ
۱ – « م . اميد» اخوان ثالثدن اقتيباس
شاعير تانيتما
بؤيوك عاليملر ، ضيالي داهيلر ادبيات زينتي شاعير و يازيچيلار مسكني اودلار دياري محشتم تبريز اؤز ايستي قويوندا بير باجاريقلي شاعير بسلهييب كي شعرلري اوره ك سيغاللايان و دويغو يارالداندير . بو لطيف احساسلي شاعير 1358 جي گونش ايلي اينقلابلار بئشيگي تبريز شهرينده آنادان اولوب و شكرانه عالم آديلا تانينيدير . شكرانه خانيم 1378 جي گونش ايليندن بري تورك و فارس ديللرينده شعر يازماغا باشلاييب . ديلهييريك اوز ادبي چاليشمالاريندا آدديملارين گوجلو گؤتوروب و آشار داشار تورك ادبياتا قالارگي اينجيلر آرتيرسين . بو حورمتلي شاعيره باشاريلار آرزوسيلا دامو آدلي شعرين اوخويوروق .
دامو
|
گوناها باتديغيم گونلر گوناهسيز قورآندان اَينيمه كؤينك بيچمهيين دورمادان آلووا دويون سال مني آغيزدان ـ آغيزا ائشيتميشم كي قورخورام او دامين سنسيزليييندن گوناها باتديغيم گونلري سئوديم |
ائل قيزي تخللوص ائدن معصومه خانيم مهين باقري تيكمه داشين ياخينلغيندا يئرله شن « گجين» كندينده ايشيق دونيايا گوز آچيب . يوخاري دويغويا يييه اولاركن اؤز رسامچيليق قلمين يوردونون موباريز و داهي اينسانلارين گنج نسله تانيتديرماغ يولوندا ايشله ديب و بو گونه قده ر « بابك، ستارخان ، كور اوغلو، شهريار ، پروين اعتصامي وعاشيق چنگيز مهدي پور» ون شكيللرين چكهرك قصدي وار گلهجكده « فضولي ، صمد بهرنگي ، قاچاق نبي ، جوانشير ، نسيمي و دده قورقود»ون شكللرينده چكسين . بو هونرمند خانيم 18 ياشيندان بري شعر يازماغا قيزغين مارق گوستريب و چاليشير بو يولدا دا اؤز باجاريغين سيناسين . اونا اؤز توتدوغو يولوندا باش اوجاليق و باشاريلار ديلهيهركن آشاغيدا «ائل قيزييام» آدلي سربست شعرين اوخويوروق :
ائل قيزييام
توپراغي دوز باسيلميش
كؤنلو اوخلانميش
سينه سينه كؤز باسيلميش
يوردو تالانميش !
نه بيله جك سينيز ! ؟
نه لر چكميش
نه لر گؤرموش
داها بس دير بو قارانليق . بو دومانليق
خير وئرين
ائللر گلسين
گول چيچك لر عطير سپسين
گؤي گئنيشلنسين ، مايالانسين
بيرليك اولسون .
نه قدهر يوخسوللوق بيز
بير گون بير وارلي كيشي اؤز كيچيك اوغلون بير كنده آپاردي ؛ اوردا ياشايان اينسانلارين نه قدهر يوخسول اولمالارين اونا گؤسترسين . آتا ، بالا كند آداملارينين بيرينين داخماسيندا بير گئجه ـ گوندوز قولاق قالديلار .
سفرلري سونا چاتاركن يولدا كيشي اوغلوندان سوروشدو : « سفريميزه گؤره فيكرين نه دير ؟ »
اوغلان : « آتا ياخشي ايدي » دئدي
آتا سوروشدو : « اونلارين ياشاييشلارينا دريندن باخدين ؟ »
اوغلان : « هن ، آتا »
يئنه آتا سوروشدو : « بو سفردن اؤيرنديكلرين نه اولدو ؟ »
اوغلان بير آز فيكيرلهشيب سونرا ياواش دئدي : « دوشوندوم كي اونلارين دؤرد ايتينه بيزيم بير ايتيميز وار . بيزيم حهيطده كي فوارهنين يئرينه اونلارين سونو بلسيز آخار چايلاري وار . بيزيم حهيطده بزه كلي فانوسوموز وارسا اونلارين پارلاق اولدوزلاري وار . بيزيم حهيطيميز دووارلارلا حاصارلانيب آنجاق اونلارين باغلاري اوجسوز بوجاقسيزدير ! »
اوغلونون سؤزلرين ائشيدن كيشي نين ديلي توتولموشدور . اوغلان آرتيردي : « آتا بيزيم نه قدهريوخسول اولماغيميزي منه گؤستردييينه گؤره سنه مينتدارام . »
|
