یئنی سلام

 

یازین یاشیل ماهنیسی قولاقلاری سیغاللاییر عطیرلی نسیم شئلی الی ایله گول دفترین واراقلاییر . ماوی یاشماق بولاقلارین پیچیلدیسی قیش یوخوسوندان آییلان یئرین اوره یین اوخشاییر .

سویوقدان دوداقلاری چاتلامیش آغاجلار یازین گلیشیندن سئوینجک اولاراق چیچکلی گولوشلرله اونو قارشیلاییرلار.بو صحیفه ده سیزینله بیرلیکده باهار پئشوازینا گئده مه لیدیر.

اولسون کی بو یئنی ایلده بوتون دونیا خالقیلاری خصوصیله تورک مللتی اوز وارلیقین منیمسه یه رک باش اوجالیقلا عومور سورسونلر . یازین گلیشیله بیرگه (شعر چلنگی) اوخوجولارینا شن یاشایین و بارلی بهره لی گونلر آرزیلاییر .

 

 

يئني سلام

 

ساعاتيمين عقربه سي

                  اوٍره ييمين ،‌

                         غمدن شيشميش نيسگيللرين ،

                                                بير ـ بير دئشير .

اؤز ايچيمده دانيشمالار

                             حياتيمين

                                         ايپين ائشير .

 

يالقيزليغين چپرينده

                         دوستاقام من

                                   دانين يئرينين سوٍكولمه سين

                                                           گؤزله ييرم .

يوْرور مني 

           سوسمالارين آغير يوٍكو

                         ـ چاليشيرام ـ

بو داريسقال قفسيمدن ,

                        جان قوُرتارام ، اوچوب ـ قاچيم

 يئني ، يئني سلام لارلا

                          دوْداغلاردان

                              سكوت وٌوران قيفلاري

                                                    بير ـ بير آچيم

                                                                          ( اوياق )

کیچیک لیکده بؤیوکلوک

سيتم   

             بدري رحمي ايوب اوغولو ( 1975 ـ 1913)

 

اؤنده زئيتون آغاجلاري آرخاسيندا يار

سنه 1946

مؤوسوم

سون باهار

اؤنده زئيتون آغاجلاري نئيله ييم ،  نئيله ييم

داللاري نئيله ييم

يار يولونا تؤكولمه ديك ديللري نئيله ييم .

يا ر، يار! ... سني قار ساپلي بير بيچاق كيمي

                                            سينه‌مه ساپلاديلار

ده ييرمان  ميثالي دؤنر باشيم

سئودا دئييل بو بير ظولوم

گل گؤر مني دارماداغين .

تئل ـ تئل چؤزولوب ( آچيليب ) قالميشام .

يار ، يار

جانيمين توخوموندا تيكان

گؤزومون ببه يينده سيتم وار .

 

سالام ايله حارام

بيز دونيادان گئدر اولدوق

قالانلارا سالام اولسون

آمما هئي بؤيله گئده جكسه بو دونيا

قالانلارا حارام اولسون

                         ***

 

معلوم

                  حليم شفيق گؤزل سون ( 1990 ـ 1913 )

 

شعر بير امكچي دير

ان گؤزه ل شئيلر يارادير

بير يئرده راستلاشسان اونا

گير قولونا بيزه گتير

***              

 

آرازانليق                          

                   محمدعلي نهاوندي ( موغان )

گؤزلريندن ،

             شيرين ، آخير

                            آرازانليق شلاله سي

... دوداقلاري كؤهنه ايچكي

... ايلش ايچك .

..........

            ـ گؤزلرينين ساغليغينا !

***                       

 

ياغار خاطيره

                              حميده رئيس زاده ( سحر)

 

هر اولدوزدان

               بير باخيشليق سئوينج

هر يولون نهايتيندن

                        بير توزقون دؤنوم

هر دنيزده ن

              بير بارداق طراوت قالدي

                                            گؤزلريمين آيناسيندا

هر يازدان

             بير ياغار خاطيره

آياقلاردان

           تكجه بير ايز قالدي

                                   قلبيمين يارپاغيندا

سندن

      دويغولار اؤلچوسونه سيغماز بير سئودا قالدي

من قالديم

           دونيا قالدي .

                            ***

 

احمد آذر لو دونیاسین ده ییشدی

احمد آذرلو  آذربايجانين ايتگين وورغونو دونياسين ده ييشدي

آذربايجان ادبياتينا سونسوز محبت وعلاقه بسله ين و بو يولدا دورمادان چاليشيب آناديلينده اولان فولكلورلاري توپلايان احمد آذرلو جمعه آخشامي بهمن آيي نين 27 جي گونو نئچه ايل خسته ليكدن سونرا چوخ نيسگيلي حالدا تبريز شهرينده اؤز دونياسين ده ييشدي .

آذرلو 1305 جي ايل تبريزده آنادان اولوب 9 كيلاسادك درس اوخويوب ، ياشاييشين قارا و آجي كولگه سي اونو آرتيق تحصيل گونشين دويماقدان محروم ائديب . او گونده ليك احتياجلارين آرادان قالديرماق ايچون نفت شركتينده ايشچي اولوب و اوزون مودت چاليشاندان سونرا تقاعد مقامينا چاتيب . آذرلو حياتيندا عائيله قورما ايمكاني تاپمادان عؤمرونون سونونا ده ك يالقيز ياشاييب و ائولادلاري توپلاديغي فولكلور كيتابلاري ايله يازديغي باياتيلار اولوب . او 10000 دن آرتيق باياتي ، 12000 دن آرتيق آتالار سؤزو اللي ايل عرضينده كندلردن ، باكي دان . توركيه دن توپلاييب و آشاغيدا آد آپارديغيميز كيتابلاري چاپ اولوب :

1 ـ دؤرد دفتر تبريزدن ( آتالار سؤزو ) باكي دا چاپ اولوب

2 ـ حكمتلر و مثللر  . باكي دا چاپ اولوب

3 ـ سارا و اليف باء ( اوشاق اوچون كيچيك حيكايه ) باكي دا چاپ اولوب

4 ـ تاپماجالار ( بو ياخينلاردا تبريز اختر نشرياتي طرفيندن چاپ اولاجاق )

 

رحمتيلك آذرلو شاعير اولماسايدي دا ، باياتي و نثر يازماغا چوخ ماراق گؤستريب و بوللو باياتيلار يازيب كه اونلاردا آنا ديلينه و وطنه عايد سؤزلر اوخوجونو اؤزونه چكير . حؤرمتلي يازيچي ، شاعير و ژورناليست دوستوم سيامك حسنعلي زاده « ارگين » جنابلاري بويوروقلارينا گوره ؛ آذرلوعؤمرونون  سون ساعاتلاريندا دئييرميش « مني خسته ليك يوخ  كيمسه سيزليكله تكليك اؤلودره جك» .

احمد آذرلو اؤز آنا ديلي يولوندا عؤمور بويو چاليشسادا اؤز وطنيده بير قريب كيمي ياشاييب و دونيادان كؤچدو. يازيقلار اولسون بوگون اؤلكه ميزده آذرلو كيمي سايسيز آذربايجان وورغونلاريميز ايتگين و سس سيزـ  سميرسيز ياشيب و خبريمز اولمادان آغير شراييطده عؤمورسورورلر.هاچان بو دوروم ده ييشه جك بيلمه ييريك بو سؤزلري آذرلودان نئچه باياتي لا سونا چاتيريرام . روحو شاد يولو گئدرلي اولسون .

 

من عاشيم سؤز قالا                         ائل سؤزوندن سؤز قالا

قويما سؤنسوز بو اوجاق                  دورما گتير سؤز قالا

 

عزيزي يم سؤز قالار                       ائل سؤزوندن سؤز قالار

كؤچه ريك بيز دونيادان                   آد قالماسا ، سؤز قالار

 

عزيزي يم وار منده ،                       اوره ك سؤزو وار منده

ائيلن ،‌ غمي ـ شادليغي ،                    نه ايسته سن وار منده

 

××××

اسفند آيي نين ايكسي فوريه نين 21 جي گونو دونيا آنا ديلي گونو بوتون آنا ديللرين وورغونجاسينا سئونلره قوتلو اولسون .

دونيا چاغداش فيلسوفلاريندان اولان ويتگنشتاين دئيير : « منيم ديليم دونيامدير و دونيام ديليم دير »

بئله سؤزلره ياناشي ايران اؤلكه سينده 35 ميليون اينساني اؤز آنا ديللرينده تحصيل آلماغي ياساق ائده نلره يازيقلار اولسون . آرزي ائديريرك كؤتله برابرليگي ،‌ تمدنلر دانيشيغي ، عدالت پايي و ... شوعارلاري وئرنلر اؤزلرينه گليب و بير اولو مللتي اؤز طبيعي و دونيا سويه سينده تانينميش حاقلارندان اوزاقدا ساخلاماقي اينسانليق اوصوللاريندان اوزاق بيليب و اؤز غرضيلي ايشلريندن  ال گؤتورسونلر .