دونیا اوشاقلار گونو

مهر آي‌ينين 16 ينجي گونو دونيا اوشاقلار گونو بوتون دونيا چيچكلرينه قوتلو اولسون .

 

دوشونجه‌لي اينسانلار گلين بيزده اوشاقلار كيمي گولوشلريميزي بؤلوشدورك ، كينه‌لري آرادان قالديريب اورك دولو سئوينجله بير ـ بيريميزي سئوك ، اوشاقلارا مهريبان اولوب اونلار اوچون اليميزدن گلني اسيرگه‌مه‌يك . حيات باغچاسينين طراوتلي گوللرين ياشاييش‌ين كولك و شاختاسيندان قورويوب هميشه باهار نفسلي ساخلاياق . اونلار يئخيليب ، دوروب آياق يول گئتمه‌يي اويرنرلر؛ گلين بيزده يئخيلمالاريميزدان گوج آليب نائليت يوللارين ايناملار آددملاياق .

اوشاقلاريميزا آتا ـ آنا اولدوقدا يئتيم بالالاريدا خاطيرلاييب ، اللريندن توتاق . دكتر مبين « شيمشك » جنابلاري( محبت تشنه سي )عنوانلي شعرينده يئتيم اوشاقلار ديليندن بئله يازير :

 

محبت دريادير/ اوج سوز ـ بوجاقسيز/ محبت ايچينده / من بوغولموشام / كيم بيلير / بلكه‌ده بير گون/محبت گؤرمه‌ميش/ من دوغولموشام / آتاسيز ، آناسيز/ سارماشيق كيمي / ساريشيب حياتا/ ياپراق آچميشام .

 

    شعر : بولنت اوزجان

             اوشاقلار اولماسايدي

اوشاقلار اولماسايدي

بئله‌جه سئومزديم ياشامي

بئله‌جه سئوينج سازمازدي اوره‌ييمي

بئله‌جه دايانمازديم آجي‌يا

بئله‌جه شعرلر يازمازديم

اوشاقلار اولماسايدي

آنالار بئله‌جه گؤزل اولمازدي

                          ***
    شعر ناظيم حكمت :

دونياني اوشاقلارا وئره ليم

 

دونياني اوشاقلارا وئره‌ليم هئچ اولمازسا بير گونلويه

آللي ـ پوللو بير بالون كيمي وئرليم اويناسينلار

اويناسينلار توركولو سؤيله‌يه‌رك اولدوزلارين آلتيندا

دونياني اوشاقلارا وئره‌ليم

ايري بير آلما كيمي

ايستي بير كوماش كيمي

هئچ اولمازسا بير گونلوگونه دويسونلار

دونياني اوشاقلارا وئرليم ، هئچ اولمازسا

هئچ اولمازسا بير  گونلوگونه اؤيرتسينلر بيزه

يولداشليغي

اوشاقلار آلاجاق

اليميزدن دونياني آلاجاق

و اؤلومسوز آغاجلار تيكه‌جكلر

دونياني اوشاقلارا وئره‌ليم

                            ***

ـــــــــــــــــــــــــــــــــــــ

يوخاريدا يازيلان ايكي اوشاق شعري بو ياخينلاردا دونيا اوشاق گونو موناسيبتيله ، «بيليم يولو تشكيلاتي»تشبوثي ايله اورمودا كئچيريلن مراسيمده مهندس عليرضا صرافي ، ديلماج درگي‌سي‌نين صاحيب امتيازي و سوروملو مودورو اؤز دانيشيقلاري آراسيندا اوخويوبلار .

 

 

ساغالماز یارا

 

نادير پاشا دان ، کؤوره لدیجی بیر شئعر

 

ساغالماز يارا

 

ايچريمده ساغالمايان ،مني سيًخان                   

مين يارام واردير

كؤنلوٍم سوسوز بايير بير چؤل

جادار جادارديًر

آدديم باشي گؤز به ره لدير فلاكت ، كدر

هارا گئتسه م 

آجي بير غم يولومو گؤزلـَر

هر ساده جه بير پوزقونلوق

نياز  دولو  هر بير باخيش

درد اولور منه

آ ليشيرام هر باخديقجا آنا وطنه

باغچاداكي چيچكلري

گؤردوٍكجه سولغون

چينارلارين قامتيني

گؤردوٍكجه يئرده

 اوره ك، گيزلي سيزيلدادير پاسلي  سازيني

آدديم آدديم

دولانديقجا اوبادا ائلده

كدر باخير، آجيق گه زير

قوشدوقوم، شعرد ه                                                              

قايالاردا صؤحبت آچير ،آجي كده ردَن

ياماجلاردا بيرجه داملا

ياغيشين، نمين

حسره تينده گؤزلريني

تيكيبلر گؤيه

گور بولاغلار قورويوبلار

داها سئل آخمير

قاري ننه ايش اوزاتمير

ايلديريم شاخمير

باغ باهاري

خياليندان، چيخارتميش چوخدان

ياشيل تئللي چيچك لرين

سولموش ايرَنگي

داها بوردا ، موچورله مير

گيلاس آغاجي

به زك وئرمير،بو باغچايا

چيچك ، چه لنگي

شيطان تورون بوتاغلارين اوستونده قورموش

باغ دئمه كي، اوزگؤزوٍنده نيكبت اوتورموش                         

قارا بؤوه،خاللي ايلان

هر كول ديبينده

گؤزله ييرلر حريص حريص

گه ليب گئده ني

او تيكانين

بودا ديشين

قيجيدميش، آنجاق

چالماق ايچون

هر گوناهسيز يولدان اؤته ني

ايچريمده ،ساغالمايان،مني سيخان

مين يارام واردير                                                                           

كؤنلوم،سوسوز بايير بير چؤل

جادار جاداردير

                       ۱۳۶۳- تبريز

 

نئچه داملا دویغو

ناظيم حكمت

.....

بير آلمانين ياريسي بيز

                             ياريسي بو قوجامان دونيا .

بير آلمانين ياريسي بيز

                            ياريسي اينسانلاريميز .

بير آلمانين ياريسي سن

                            ياريسي من

                                          ايكيميز ....

                                                       19454     

 

*******

معصومه شقاقي

 

بو سون چيرپينيشيم

                       بو سون يالواريشيم

                                  بو سون آغلاييشيم

آسيل ساندا اؤلمه

        ياشاميم سنين دوداقلاريندان

                                            سو ايچير

                                                                      

********

سيما صمدي

يووا

 

گؤزلريم

           باغلي دئيل  ،

                             باغلييام سنه .

گئتمگين ، قالماغين

                          اؤز الينده دير .

من تكجه ، سئويره م .

                           سئومكدن باشقا ،

                                                 بيلميره م هئچ نه .

گليرم گؤزونده

                   يووا سالماغا ،

گؤزه ليم !

             باخيشين بنزه يير ،

                                     آنا تورپاغا !

                                     آذربايجانا !

                                                             

*********

ناظيم حكمت

 

شهر ، آخشام و سن                          

 

قوينومدا چيل ـ چيلپاق سينير

شهر ، آخشام و سن ...

ايدينليغينيز اوزومه وورور

بيرده ساچلارينيزين قوخوسو

بو چيرپان اوره ك كيمين

سس لري نفس لريميزين اوستونه تاپپا تاپ ووران

سنين مي ، شهرين مي ، اخشامين مي

يوخسا منيم مي دير ؟

آخشام هاردا قورتولور ، هاردا باشلانير شهر ؟

شهر هاردا قورتولور ، سن هاردا باشلانيرسان؟

من هاردا قورتولوب هاردا باشلانيرام ؟

1959

 

سورغو

يازار : رابين درانات تاگور                      

 فارسيجا متندن چئويره ن : اوياق

سورغو

اوشاق آنادان سوروشدو من هارادان گلميشم ؟ مني هاردان گتيرميسن ؟ آنا ياري گولر ، ياري آغلار اوشاغي باغرينا باسيب بئله دئدي : شيرين جانيم ، سن آرزو ديلك كيمي منيم كونلومده گيزلنميشدين . اوشاقليدا اويناياندا سني اويونچاقلاريمين ايچيندن آرايارديم . اونداكي هر سحر اوره‌ك‌ ايسته‌ييمي پالچيقدان ياپارديم سني بنا ائديب يئنه ده بير ـ بيره وئرارديم . سن بيزيم ائل ـ تباريميزين مقدساتينين ضريحينده يئر سالميشدين و من اونلارا بويون اَيمك‌له سني عزيزله‌ييرديم .

منيم عشق و آرزيلاريمدا ، جانيم‌ين و  اوره‌ييمين درينليگينده ، آتامين جان و حياتيندا سن ياشايارميشسان .

بيزيم ائليميزه حكم سوره‌ن اؤلمز و اوُلو روحون اَته‌يينده ايللر سني قورويوبلار .  گنجليك چاغلاريمدا هر  آن كونلومون تومورجوقلاري چيچك آچاردي سن گول عطري ساياق اونون يان ـ يووره سينده ياييلاردين . سنين بو طراوت و گؤزه‌لليگين او نوردوركي گنج چاغيمدا گونشين باش قووزاماسيندان اؤنجه سماني ايشيقلانديراراق غونچه كيمي منيم بند ـ بنديمده گوللنردي .

اي سمانين اوره‌گينين بندي ، اي سحر گونشينين ايشيقيلا بيرگه دوغولان ، سن ياشاييش چايينين داشقين سئلي كيمي‌سن كي و دونيادان قاچيب و منيم قلبيمين ساحيلينين قيراغينا يئتيشميسن . اونداكي سنين اؤزونه گؤز تيكيره‌م بو سير مني حيران ائدير . سنكي بو دونيانين هاميسينا عايد ايدين نئجه اولوب كي منيم اولموسان .

اونون قورخوسوندان كي اولمايا بير گون سني الدن وئره‌م وار گوجومله باغريما باسيرام . گورنه بخته‌ورم كي بوتون دونيانين ثروتي منيم بو ضعيف قوللاريمين جله‌سينه دوشوب .

                                                                     سون

 

یانمیش دیلکلر

يانميش ديلكلر

 

گؤيوٍن موُبارك

                قه‌هريْ له ‌بيْرگه

گؤزلريْمده

           ميْنلر بوُلوُدلار

                            اوْينايير

اوْندا كيْ

         دوُيغوُ يئللريْ

                          حيات چيْچكلريْن

                                                 توُمارلايير

باخيشلاريم

             خاطيْره‌لر باخينجاسينين داليسيندان

             يٌاشام ايْيٌــيْ وٌئــرن تابــلولار اوٍستــه

                                                        دايانير     

.......... بيْر آن قاييديرام ايْچيْمه

آه اي ... يانمــيش ديْلـكلـــر

آه اي ... كوٍل اوْلموُش ايْستكلر

تبريز ـ 23/7/82